Ո՞ՒՄ ՀԱՑՆ Է ԿՏՐԵԼՈՒ ՄԱՐՈՒՔՅԱՆԻ ԿՈՒՍԱԿՑՈՒԹՅՈՒՆԸ. ՏԵՂԻ ՈՒՆԵՑԱՎ «ԼՈՒՍԱՎՈՐ ՀԱՅԱՍՏԱՆ»-Ի ՀԱՄԱԳՈՒՄԱՐԸ. ՏԵՍ

Ո՞ՒՄ ՀԱՑՆ Է  ԿՏՐԵԼՈՒ ՄԱՐՈՒՔՅԱՆԻ

ԿՈՒՍԱԿՑՈՒԹՅՈՒՆԸ. ՏԵՂԻ ՈՒՆԵՑԱՎ «ԼՈՒՍԱՎՈՐ

ՀԱՅԱՍՏԱՆ»-Ի ՀԱՄԱԳՈՒՄԱՐԸ. ՏԵՍԱՆՅՈՒԹ

Այսօր «Արմենիա Մարիոթ» հյուրանոցում տեղի ունեցավ  «Լուսավոր Հայաստան»   կուսակցության հիմնադիր համագումարը: Համագումարը սկսվեց երեկ սահմանում զոհված զինծառայողի հիշատակը մեկ րոպե լռությամբ հարգելով, որից հետո հնչեց ՀՀ օրհներգը:  Բացման խոսքով հանդես եկավ  «Լուսավոր Հայաստան»-ի անդամ, ապա միաձայն քվեարկությամբ նախագահ դարձած, ԱԺ պատգամավոր Էդմոն Մարուքյանը: Վերջինս ներկայացրեց  նորաստեղծ  կուսակցության անելիքները, տեսլականը: Մարուքյանի ոգեւորվածությունը միգուցե այնքան մեծ էր, որ անգամ խոսափողը չդիմացավ. առաջացավ տեխնիկական խոտան: Մարուքյանի  ելույթից հետո քվեարկությամբ ընտրվեցին  կուսակցության նախագահը, խորհրդի անդամները: Երկու ժամանոց համագումարից հետո լրագրողները  հարցեր ուղղեցին Է. Մարուքյանին:  Ի՞նչ միջոցներով է «Լուսավոր Հայաստանը» «Արմենիա Մարիոթ»-ի նման թանկ հյուրանոցում կազմակերպել համագումար, քաղաքական ի՞նչ դիրքերից է հանդես գալու: «Մեր կուսակցությունը հանդես է գալու ընդդիմադիր դիրքերից: Մեր քաղաքական ուժը, չի ընդունում գործող իշխանության ներքին ու արտաքին  քաղաքականությունը:  Համագումարը կազմակերպվել է երկու դրամահայթայթման շնորհիվ: Շուտով տեսանյութ կհրապարակվի, որտեղ կխոսվի  նաեւ ֆինանսների մասին:  Բայց ասեմ` դրամահայթայթման գործընթացը շարունակվելու է»:

«Իրավունք»-ի դիտարկմանը, թե տպավորությունն այնպիսին է, որ  «Լուսավոր Հայաստանը» հանդես է գալիս  կառուցողական այն ընդդիմության  դիրքերից, որի անհրաժեշտության մասին միայն խոսում է իշխանությունը, Մարուքյանն  ասաց. «Այդ խոսակցությունը որեւէ կապ չունի «Լուսավոր Հայաստան» կուսակցության հետ: Ոչ թե կառուցողական ընդդիմության տեսանկյունից ենք հանդես գալիս, այլ քաղաքական նոր մոդելի դիրքերից: Մենք, օրինակ, կառուցողական որեւէ բան չունենք կոռուպցիայի դեմ պայքարի  հարցի դեպքում»,- ասաց  Մարուքյանը:

Լրագրողներից մեկի այն հարցին, թե «Լուսավոր Հայաստանը»  համարում են իշխանական պրոյեկտ, նոր կուսակցության նախագահն ասաց. « Դրանք բամբասանքներ են, որոնց տարածողները հասկանում են` ընդդիմադիր նորաստեղծ ուժերն իրենց հացը կտրելու են: Մենք չենք որդեգրելու այն մոտեցումը, որ մեզ ասեն ուխտ եք, մենք էլ ասենք` ոչ»:

ՄԱՆՐԱՄԱՍՆԵՐԸ`ՏԵՍԱՆՅՈՒԹՈՒՄ:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝