ՀՀԿ ՊԱՏԳԱՄԱՎՈՐ. «ՌՈԲԵՐՏ ՔՈՉԱՐՅԱՆՆ ԻՐԱՎՈՒՆՔ ՉՈՒՆԻ ԽՈՍԵԼ ԸՆՏՐԱԿԵՂԾԻՔՆԵՐԻՑ»

ՀՀԿ ՊԱՏԳԱՄԱՎՈՐ. «ՌՈԲԵՐՏ ՔՈՉԱՐՅԱՆՆ ԻՐԱՎՈՒՆՔ

ՉՈՒՆԻ ԽՈՍԵԼ ԸՆՏՐԱԿԵՂԾԻՔՆԵՐԻՑ»

Ռոբերտ Քոչարյանի գրասենյակը երեկ  հայտարարություն է տարածեկ դեկտեմբերի վեցին  սահմանադրության հանրաքվեի  մասին, որտեղ ասվում է` տեղի ունեցածը հազիվ թե կարելի է համարել  ժողովրդի կամարտահայություն:

«Իրավունք»-ը Քոչարյանի գրասենյակի հայտարարության մասին խոսեց  ՀՀԿ պատգամավոր Լեռնիկ Ալեքսանյանի հետ:

- Պարոն Ալեքսանյան,  Քոչարյանի գրասենյակը վկայակոչում է ԶԼՄ-ի,  ՀԿ-ի, քաղաքական տարբեր ուժերի արձանագրած զանգվածային խախտումները եւ հենց դրանց հիման վրա  հայտարարում` դեկտեմբերի վեցի հանրաքվեն  ժողովրդի կամարտահայտությունը չէ:

- Տարբեր կազմակերպություններ տարբեր գնահատականներ են տվել, բայց չեմ լսել, որ  խախտումներն էականորեն ազդեն հանրաքվեի արդյունքների վրա: Իշխանությունը գնահատական է տալու յուրաքանչյուր փաստի:

- Ուզում եմ հասկանալ` Քոչարյանի այս հայտարարությունը մերկապարանո՞ց է:

-Ես հեռու եմ մնում գնահատական տալուց: Բնականաբար ինքը հայտարարություն է արել` իրեն հասած տեղեկատվության հիման վրա: Կոնկրետ մեր ընտրատարածքում` Արարատում, մասսայական խախտումներ չեն  եղել:

-Ներողություն,  Ձեզ ընտրատարածքում «այո»-ն, թե՞ «ոչ»-ն է հաղթել:

-«Այո»-ն:

-Դուք   երկար ճանապարհ անցած  քաղաքական գործիչ եք, ով  պատգամավորական գործունեություն է  ծավալել Ռոբերտ Քոչարյանի ղեկավարման ժամանակ:  Կարո՞ղ եք ասել`  արդեն նախկին սահմանադրության հանրաքվեն` 2005-ին, խորհրդարանական ու նախագահական ընտրությունները ժողովրդի կամարտահայտությունն էին:

- Բոլոր ընտրություններում եղել են ընտրախախտումներ: Թե՛ Քոչարյանի, թե՛ Լեւոն տեր-Պետրոսյանի, թե՛  այս իշխանության օրոք եղել են խախտումներ: Խնդիրը ձեւերի ու մեթոդների մեջ է: Բոլոր դեպքերում  յուրաքանչյուր ընտրություն  որակապես տարբերվում է նախորդներից: Այն տարիներին`1995 թ-ի ընտրություններում, տեսել ենք ծեծուջարդ, ղալմաղալ,  յաշիկ գողանալ: 2000-ականներին էլ տեսել ենք ընտրակեղծարարության դեպքեր` ընտրակաշառքի բաժանում,  հատկապես մեծամասնականով ընտրվելու դեպքում:

- Ռոբերտ Քոչարյանի ղեկավարման տարիներին, թե՞ հիմա են պատշաճ անցնում ընտրական գործընթացները:

- Բնականաբար, հիմա, հատկապես հանրաքվեի ընտրությունները: Ամբողջը կապել իշխանության հետ ես ճիշտ չեմ համարում: Այն ժամանակ էլ ես ամեն ինչը չէի կապի Ռոբերտ Քոչարյանի անձի  հետ: Կան իրոք բաներ, որոնք իշխանությանը դուր չեն գալիս:  Էս անգամ չկար անհրաժեշտություն, թեկուզ տասը ձայն ավելի բերելու:

-Ռ. Քոչարյանի  իշխանության տարիներին  ընդդիմադիրների դիրքերից հանդես եկողները   վերհիշեցին 2004թ-ի ապրիլի 12-ի դեպքերը, մասսայական լցոնումներն ու  ընտրակեղծարարությունները: Արդյոք այսքանից հետո, ինչպես ասում են ընդդիմադիրները, իրավունք ունի Ռոբերտ Քոչարյանը խոսել ժողովրդի   կամարտահայտությունից:

- Իհարկե ոչ: Ոչ միայն Ռոբերտ Քոչարյանը, այլեւ նախորդ ընտրություններին մասնակից մարդն իրավունք չունի խոսել, քանի որ քիչ թե շատ, ամեն մեկն իր չափով մասնակից է  եղել   ընտրական գործընթացներին, այդ թվում Ռոբերտ Քոչարյանը: Նա ցանկացել է, թե ոչ,  իրավունք չունի  խոսել ընտրակեղծիքներից, ընտրախախտումներից, քննադատել  այսօրվա ընտրական գործընթացը: Էն մարդիկ, ովքեր նախորդ ընտություններում պաշտպանել են իշխանությանը, մասնակցել  ընտրություններին, իրավունք չունեն քննադատել այսօրվա ընտրական գործընթացը: Ես  երբեք ընտրակեղծարարություն չեմ արել, բայց դարձյալ ինձ իրավունք չեմ վերապահում քննադատել անցյալը: Ի դեպ, ասեմ, որ իշխանության  կողմնակիցների մի մասը, հատկապես մտավորականության  հատվածի ներկայացուցիչները,  ասել են «ոչ» հանրաքվեին, քանի որ կարծում են` մեզ պետք է ուժեղ  նախագահ կիսապատերազմող վիճակում: Ես անձամբ նման մարդկանց տեսել եմ  Արարատում եւ ասեմ` հարգում եմ նրանց կարծիքը:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝