ԽՈՐՀՐԴԱՅԻՆ ՓՐԿԱՐԱՐ- ԶԻՆՎՈՐԻ ՀՈՒՇԱՐՁԱՆԸ ՏԵՂ ԳՏԱՎ ՍՊԻՏԱԿԻ ՀՈՒՇԱՀԱՄԱԼԻՐՈՒՄ

ԽՈՐՀՐԴԱՅԻՆ ՓՐԿԱՐԱՐ- ԶԻՆՎՈՐԻ ՀՈՒՇԱՐՁԱՆԸ ՏԵՂ ԳՏԱՎ ՍՊԻՏԱԿԻ ՀՈՒՇԱՀԱՄԱԼԻՐՈՒՄ

Դեկտեմբերի 7-ին Սպիտակ քաղաքի հուշահամալիրում բացվեց 3,5 մետր բարձրությամբ խորհրդային փրկարար-զինվորի հուշարձանը: Այն իր մեջ ամփոփում է Խորհրդային զինվորի հավաքական կերպարը, ով երկրաշարժի ժամանակ օգնության ձեռք մեկնեց աղետի գոտու բնակիչներին: Մինչ հուշարձանի բացումը` միջոցառմանը ներկա մասնակիցները մեկ րոպե լռությամբ հարգեցին երկրաշարժի զոհերի հիշատակը, այնուհետեւ Տեր ՆԱՎԱՍԱՐԴ արքեպիսկոպոս ԿՃՈՅԱՆԸ ներկաների հետ միասին Տերունական աղոթք հղեց առ Աստված` հանուն անմեղ զոհերի հոգու հավերժության:

Օրը խորհրդանշական էր ՌԴ մշակույթի նախարարի քարտուղար ԳՐԻԳՈՐԻ ՓԻՐՈՒՄՈՎԻ համար. «Իմ հայրը հայ է, ճիշտ է, ծնվել եւ ապրում եմ Ռուսաստանում, սակայն 1988 թվականի աղետը` ինչպես բոլոր հայերը, այնպես էլ ես շատ լավ եմ հիշում, դժվար ժամանակաշրջան էր բոլորիս համար: Կարծում եմ Խորհրդային զինվորի հուշարձանի ստեղծումը շատ տեղին էր, քանի որ նա առաջիններից մեկն էր, ով օգնության ձեռք մեկնեց հայությանը: Սա հիանալի գաղափար է»:
ՀՀ մշակույթի նախարար ՀԱՍՄԻԿ ՊՈՂՈՍՅԱՆԸ կարեւորելով, որ հուշարձանի ստեղծման ամբողջական ֆինանսավորումը կատարվել է Ռուսաստանի կողմից, շնորհակալություն հայտնեց Ռուսաստանի իր գործընկերոջը եւ ընդգծեց. «Այս հուշարձանն ունի մի քանի խորհրդանշական գաղափարներ. Սա այն մեծ շնորհակալությունն է, որ հայտնում ենք Խորհրդային զինվորին, ինչպես նաեւ մեծ բարեկամության խորհրդանիշը` ռուսների եւ հայերի միջեւ: Անշուշտ, հուշարձանը նաեւ Հայաստանի վերածննդի խորհրդանիշն է` զինվորի գրկած երեխան` փրկված Հայաստանն է: Այն ողբերգությունն ու փորձանքը, որ մեր գլխին եկավ, խնդիր էր ամբողջ Հայաստանի համար»:
Հուշարձանի հեղինակներ Վադիմ Ֆրոլովը եւ Ալեքսանդր Միրոնովը շնորհակալություն հայտնեցին բոլոր այն աջակիցներին, ովքեր հուշարձանի ստեղծման հենց առաջին օրվանից իրենց կողքին են եղել. «Ցանկանում ենք, որ այս հուշարձանը դառնա կյանքի եւ ընկերության խորհրդանիշ, որը կմիավորի մարդկանց, ինչպես միավորեց 1988 թվականին, երբ բոլորը գալիս էին հայերին օգնության` առանց ազգային եւ կրոնական խտրականության»,- ասաց Ա. Միրոնովը:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝