ՕՐԵՆՔԻ ԲԱ՞ՑՆ ԷՐ ՀԻՎԱՆԴԱՆՈՑՆԵՐՈՒՄ ՄԱՀՎԱՆ ԿԱՍԿԱԾԵԼԻ ԴԵՊՔԵՐԻ ՊԱՏՃԱՌԸ

ՕՐԵՆՔԻ ԲԱ՞ՑՆ ԷՐ ՀԻՎԱՆԴԱՆՈՑՆԵՐՈՒՄ ՄԱՀՎԱՆ ԿԱՍԿԱԾԵԼԻ ԴԵՊՔԵՐԻ ՊԱՏՃԱՌԸ

Վերջին ժամանակներս հաճախակի ենք լսում տարբեր բժշկական կենտրոններում գրանցված մահվան դեպքերի մասին, որոնց հետ կապված, այսպես ասենք, միանշանակ բացատրություն չկա: Թեեւ նման վիճահարույց իրավիճակների լուծումը պետք է տրվեր դատաբժշկական փորձաքննություններ միջոցով, բայց դրանք էլ են արվում, եւ մահացածների հարազատները շարունակում են պնդել, թե բժիշկներն են մեղավոր, բժիշկներն էլ` թե մենք ամեն ինչ ճիշտ ենք արել: Եվ նկատենք, որ դատաբժշկական փորձաքննությունների մեծ մասը, որպես կանոն, բժիշկների մեղքը հերքում են, թեեւ դա էլ առանձնահատուկ վստահություն չի ներշնչում:

Նմանատիպ դեպքերից մեկն էլ դեռ հուլիսին ծննդկան Մերի Մարգարյանի մահն էր, որի համար հարազատները մեղադրում են «Շենգավիթ» ԲԿ-ի բժշկուհուն: Աղջկա ծնողները, չնայած բազմաթիվ փորձաքննությունների, մինչ օրս էլ այդ համոզմունքին են: Եվ դա չնայած այն հանգամանքին, որ «Շենգավիթ» ԲԿ-ն հանրության շրջանում հայտնի է որպես «հարուստների, ընտրյալների կանանց» հիվանդանոց, եւ, ենթադրաբար, ծառայություններն էլ պետք է դրան համապատասխանեին:
Ինչեւէ՝ ով է ի վերջո նմանատիպ իրավիճակների պատասխանատուն: Հարցի պատասխանը փորձեցինք ստանալ ԱԺ Մայրության եւ առողջապահության հանձնաժողովի նախագահ ԱՐԱ ԲԱԲԼՈՅԱՆԻՑ, ով նկատեց.
- Նախ՝ ես չէի ցանկանա առանձնացնել «Շենգավիթ» ԲԿ-ն որեւէ այլ բժշկական հաստատությունից: Միանգամից ասեմ, որ մենք օրենքի մեջ փոփոխություններ ենք կատարել, մտցրել ենք որոշակի շտկումներ, որոնցով ամրագրվել են հետեւյալ հասկացությունները` կլնիկական ուղեցույցներ, ընթացակարգեր, գործելակարգեր: Այս բոլոր հասկացությունները պետք է լիազոր մարմինը հաստատի, որից հետո այն կմտնի ուժի մեջ: Այս փոփոխությունները մեզ կտան հնարավորություն, որ ճիշտ գնահատենք: Օրինակ, եթե բժշկական հաստատությունները կամ բուժաշխատողներն աշխատել են օրենքի տառին համապատասխան, բայց առաջացել է կյանքի հետ անհամատեղելի իրավիճակ, ապա բժիշկները պաշտպանված կլինեն օրենքով: Իսկ եթե չեն կատարել իրենց` օրենքով սահմանված պարտականությունները, ապա պատասխանատվության կենթարկվեն կրկին օրենքի տառով:
- Ուզում եք ասել, որ օրենքի բա՞ցն էր մինչ այս թույլ տալիս որոշ բուժաշխատողների՝ իրենց գործը ոչ լիարժեք իրականացնել:
- Տեսեք, քանի որ չկային վերոհիշյալ կետերը, դուրս էր գալիս, որ ամեն անգամ դեպքերը քննարկելիս` տարբեր հանձնաժողովներ են ստեղծվում, մի հանձնաժողովի անդամը պաշտպանում էր մեկին, մյուսին՝ ոչ, մեկը սրան սիրում էր, մյուսը՝ ոչ: Այսինքն՝ սա այն ոլորտը չէ, որ պետք է թողնել անհատների հարաբերությունների վրա:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝