«ՑԵՂԱՍՊԱՆՈՒԹՅՈՒՆԸ ՏԵՍԱՎ ԵՎ ԱՆՏԱՐԲԵՐ ԹՈՂԵՑ ՔԱՂԱՔԱԿԻՐԹ ԱՇԽԱՐՀԻ ՄԻ ՍՏՎԱՐ ՄԱՍԸ»

«ՑԵՂԱՍՊԱՆՈՒԹՅՈՒՆԸ ՏԵՍԱՎ ԵՎ ԱՆՏԱՐԲԵՐ ԹՈՂԵՑ ՔԱՂԱՔԱԿԻՐԹ ԱՇԽԱՐՀԻ ՄԻ ՍՏՎԱՐ ՄԱՍԸ»

Հայաստանի եւ համահեղինակ 83 այլ պետությունների կողմից ներկայացված բանաձեւը դեկտեմբերի 9-ը հռչակել է Ցեղասպանության հանցագործության զոհերի հիշատակի եւ արժանապատվության ու այդ հանցագործության կանխարգելման միջազգային օր: Բանաձեւի ընդունման համար ընտրվել է դեկտեմբերի 9-ը նաեւ այն իմաստով, որ այն 1948 թվականին Ցեղասպանության հանցագործության կանխարգելման եւ պատժի մասին ՄԱԿ-ի կոնվենցիայի ընդունման օրն է: Այս մասին նշել է ՀՀ արդարադատության նախկին նախարար ՀՈՎՀԱՆՆԵՍ ՄԱՆՈՒԿՅԱՆՆ ու հավելել. «Ցեղասպանությունների ոգեկոչման եւ համամարդկային դատապարտման, դրանով իսկ այլ ցեղասպանություններ բացառելու գործին հետեւողականորեն լծված մեր ժողովուրդն այս տարի Հայոց Ցեղասպանության 100-րդ տարելիցի միջոցառումներին հարգեց նաեւ այլ ցեղասպանված ազգերի հիշատակը: Այս առումով վերջին բարբարոսությունները բաժին էին հասել մեր եղբայր եզդիներին, որոնց ցեղասպանությունը տեսավ եւ անտարբեր թողեց քաղաքակիրթ աշխարհի մի ստվար մասը: Գյումրեցու, Վանաձորցու, անգամ մայրաքաղաքաի տարբեր թաղամասերում բնակվող հայի մեջ տարբերություն դնող մեր ժողովուրդը խորը իմաստությամբ է մոտենում մեր ազգային փոքրամասնություններին, հետաքրքրվում նրանց կյանքով, ձեռքբերումներով հավասար ուրախանում: Մենք պետական մակարդակով կիսեցինք եզդի եղբայրներին պատուհասած չարիքը՝ հերթական անգամ հավաստելով մեր դարավոր բարեկամությունն ու ընկերությունը»: Հ. Մանուկյանը հպարտ է, որ մենք կարողանում ենք մեր ունեցած փոքր տարածքը կիսել մեր եղբայրների հետ, ձեռք մեկնել ոչ թե Հայրենիք ունեցողի հայրական բարեսրտությամբ, այլ եղբոր, ընկերոջ պես. «Համամարդկային արժեքներ հարգելը մեր գեներում է եւ այս ԱՍՏՎԱԾՆԵՐԻ ՊԱՏԵՐԱԶՄԻ վտանգավոր ժամանակաշրջանում մեզ հաջողվում է անսասան մնալ մեր սկզբունքայնության, ուրիշներին հարգելու եւ վշտակցելու հարցերում: 
Մեր ազգի պարադոքսալ հումանիզմը մեր գլխավոր ձեռքբերումներից է. որպես հայ՝ չենք մոռանում մեր ավիրված սրբավայրերը, միեւնույն ժամանակ, որպես մարդ՝ մայրաքաղաքի սրտում այլ կրոնի ներկայացուցիչների համար վերականգնում ենք իրենց աստծուն աղոթելու հնարավորությունը ...», - եզրափակելով խոսքը` շեշտել է ՀՀ արդարադատության նախկին նախարարը:

ՀՐԱՆՏ ՍԱՐԱՖՅԱՆ

Հ.Գ.- Նկարը պատկանում է հայտնի Դոկտոր մահ Ջեկ Կեւորկյանի վրձնին եւ ի հիշատակ 20-րդ դարի երկու խոշորագույն ցեղասպանությունների՝ Մեծ Եղեռնի եւ Հոլոքոստի, վերնագրված է «1915 - Գենոցիդ - 1945»:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝