Զարմացած

Այս քառօրյայի առաջին օրը Զարուհի Փոստանջյանը շատերի նյարդերը կերավ, իսկ նախարար ԱՐՄԵՆ ԱՇՈՏՅԱՆԻՆ զարմանալիորեն դրդեց դաժան գնահատականների: Սակայն բաժին հասավ ոչ միայն տիկին Փոստանջյանին, ում վարքագիծը պարոն Աշոտյանը համեմատեց ուկրաինական «Ֆեմենի» եւ ռուսական «Պուսի Ռայոտի» հետ, այլ ընդդիմության մի մեծ հատվածին. «Մեր երկրի պրոբլեմը հանրապետականը չի, կարծում եմ` հանրաքվեն էլ ցույց տվեց, որ երկրի պրոբլեմը ընդդիմությունն է»: Ավելին, նա իրավիճակը գնահատեց այսպես. «Երբ որ ընդդիմությունը իշխանությունից ավելի վատն է», եւ վերջում ճշտեց. «Այն ընդդիմությունը, որ փորձում էր խոչընդոտել «Այո»-ի քարոզարշավը, այն ընդդիմությունը, որ երկրի ապագան չէր տեսնում»: Ինչեւէ, թեեւ ասվածը հիմնականում արդարացի է, սակայն առանց այդ էլ, արմատական ընդդիմադիրները լրիվ դեպրեսիայի մեջ են:

Ի դեպ, ԼՅՈՎԻԿ ԶՈՒՐԱԲՅԱՆԻ մոտ այդ դեպրեսիան արտահայտվեց նրանով, որ ԱԺ-ում քննարկվող օրակարգի շրջանակներում արտահայտվելու փոխարեն` նա սկսեց իր մշտական երգը «կեղծված ընտրությունների» մասին: Սակայն զարմանալին դա չէ, այլ այն, որ երբ նիստը վարողն անջատեց նրա խոսափողը, նա հայտարարեց, որ ՀԱԿ խմբակցությունը բոյկոտում է այս նստաշրջանը, բայց դահլիճից նրա հետ դուրս եկան միայն Արամ Մանուկյանը եւ Գագիկ Ջհանգիրյանը, իսկ Հրանտ Բագրատյանը, Լյուդմիլա Սարգսյանը եւ Նիկոլ Փաշինյանը մնացին իրենց տեղերում: Դե, իսկ Ստեփան Դեմիրճյանն էլ եղած-չեղած մի հաշիվ է:
Հանրաքվեի օրը մեզ հաճելիորեն զարմացրին ԻՐԱՎԱՊԱՀՆԵՐԸ եւ ԿԸՀ-ն: Թեեւ խախտումների մասին գրավոր դիմումներ գրեթե չկային, այնուամենայնիվ, լրատվամիջոցների հրապարակումների հիման վրա շատ օպերատիվորեն արձագանքեցին ամեն մի ահազանգի: Ինչեւէ, դա նաեւ իր շարունակությունը կունենա, քանզի ՀՀ նախագահը հնչեցրեց հետեւյալը. «Այս ընթացքում ես մեկ անգամ չէ, որ խոսել են արդար եւ թափանցիկ հանրաքվե անցկացնելու կարեւորության մասին: Մի բանում առավել քան վստահ եմ. իրավապահ մարմիններն ամեն ինչ արեցին, որ այս համապետական միջոցառումն անցնի բնականոն հունով: Այժմ արդեն իրավասու մարմինները պետք է պատշաճ ընթացակարգերի շրջանակներում օրենքի տառին եւ ոգուն համապատասխան գնահատականներ տան խախտումների վերաբերյալ բոլոր ահազանգերին: Սա իսկապես կարեւոր է վաղվա համար»:
Եվ եզրափակելով քվեարկության թեման` պետք է արտահայտեմ իմ հաճելի զարմանքը թիվ 4/11 տեղամասի ԸՆՏՐԱԿԱՆ ՀԱՆՁՆԱԺՈՂՈՎԻ օրինակելի աշխատանքի առնչությամբ: Արդեն երրորդ համապետական քվեարկությանն է, որ մասնակցել եմ այդտեղ, ու անկախ նրանից` ընդդիմությունն այդտեղ ներկայացված է, թե` ոչ, վստահված անձինք ներկա են, թե` ոչ, այդ հանձնաժողովը, որի կազմն էլ նաեւ ընտրությունից ընտրություն փոփոխվել է, նույն ձեւով աշխատել է օրինականության ու պարկեշտության չափանիշներով, ինչը երեւում է նաեւ ամեն անգամ այդտեղի արդյունքների վերլուծությունից: Ինչեւէ, մնում է միայն շնորհակալություն հայտնել այդ մարդկանց եւ մաղթել, որ այդպիսի օրինակները լինեն համատարած կանոն:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝