«ԳԻՏԵՔ ԷԴ ՎԱՐԿԵՐԸ ԻՆՉ ՕՐՆ ԵՆ ԳՑԵԼ ԺՈՂՈՎՐԴԻՆ»

«ԳԻՏԵՔ ԷԴ ՎԱՐԿԵՐԸ ԻՆՉ ՕՐՆ ԵՆ ԳՑԵԼ ԺՈՂՈՎՐԴԻՆ»

Երեկ Արագածոտնի մարզի Արտենի համայնքում հուղարկավորեցին նախօրեին ինքնասպանության դիմած գյուղի 40-ամյա բնակչին: Տղամարդը` Հարություն Թորոսյանը, ինքնասպան է եղել կախվելու միջոցով: Արտենիի գյուղապետ Գեղամ Խլղաթյանը անդրադառնալով տեղի ունեցած ողբերգությանը` նկատեց. «Նորմալ, խելոք աշխատող մարդ էր, ամուսնացած էր, երկու երեխաների հայր: Դեպքի օրը երեխաներին ուղարկել է տատի տուն, իսկ ինքը կյանքին վերջ տվել: Կախված վիճակում նրան հայտնաբերել է հորեղբայրը»:

Թե ի՞նչն է պատճառը, գյուղապետը նկատեց. «Չեմ կարող ստույգ բան ասել, բայց սոցիալապես անապահով պայմաններում էին ապրում, բանկերում չմարված վարկեր ուներ. գիտեք էդ վարկերը ինչ օրն են գցել ժողովրդին»:
Այսպիսով՝ այս էլ որերորդ դեպքն է, երբ մարդկանց գլխին կրակուպատիժ դարձած վարկերը հասցնում են ինքնասպանությունների, սպանությունների. համենայնդեպս՝ հենց վարկային նման մի պատմության հետ է կապվում վերջերս «Անելիք բանկի» իրավաբանի սպանությունը: Օրեր առաջ էլ անդրադարձել էինք ռուսական ռազմաբազայի հայազգի զինծառայողի ինքնասպանության դեպքին. հարազատներն էլի այդ քայլը կապում են բանկերում ունեցած վարկերի հետ: Եվ այս բոլոր դժբախտ դեպքերի կողքին՝ արդեն չի էլ երեւում, թե քանի-քանիսն են ունեցած-չունեցածը, տունուտեղը կորցրել` վարկ կոչվող այդ վաշխառության պատճառով:
Թե ինչ է այս մասին մտածում Կենտրոնական բանկը, երբ համատարած նման ողբերգական դեպքեր են գրանցվում` գերծանր տոկոսներով բանկային վարկերի պատճառով, փորձեցինք պարզել ԿԲ-ի լրատվական ծառայությունից: Հարցը գրավոր խնդրեցին: Լավ, կտեսնենք ինչ են ասելու:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝