ՀԱՅԱՍՏԱՆԻ ԵՎ ԱԴՐԲԵՋԱՆԻ ՆԱԽԱԳԱՀՆԵՐԸ ԿՀԱՆԴԻՊԵ՞Ն

ՀԱՅԱՍՏԱՆԻ ԵՎ ԱԴՐԲԵՋԱՆԻ ՆԱԽԱԳԱՀՆԵՐԸ ԿՀԱՆԴԻՊԵ՞Ն

ԵԱՀԿ Մինսկի խմբի համանախագահները հոկտեմբերին Երեւան կատարելիք այցի ընթացքում հայտարարեցին, որ նպատակ ունեն մինչեւ այս տարվա վերջ կազմակերպել Հայաստանի եւ Ադրբեջանի նախագահների հանդիպումը: Ըստ նրանց՝ երկու երկրների նախագահների հնարավոր հանդիպումը կարող է տեղի ունենալ դեկտեմբերի 6-ից հետո, երբ Հայաստանում ավարտվի Սահմանադրական բարեփոխումների համար անցկացվող հանրաքվեն: Եվ դրանից հետո էր, որ լարվեցին Թուրքիայի ու Ռուսաստանի հարաբերությունները, որի պատճառով  էլ երկու երկրներն ամրացնում են իրենց սահմանները: Այսպիսի իրավիճակում արդյոք իրատեսակա՞ն է Հայաստանի եւ Ադրբեջանի նախագահների հանդիպումը: Կամ հանդիպման կայանալու դեպքում՝ ինչ-որ արդյունքներ կարելի՞ է ակնկալել: Այս հարցի շուրջ «Իրավունքը» զրուցեց հայաստանյան որոշ վերլուծաբանների հետ:

Քաղաքագետ ՍՏԵՓԱՆ ԳՐԻԳՈՐՅԱՆԸ նշեց.
- Չեմ կարծում, որ ստեղծված լարվածությունը կարող է խանգարել Հայաստանի եւ Ադրբեջանի նախագահների հանդիպմանը: Սակայն այստեղ կարեւորն այն է, որ այդ հանդիպումը չի կարող արդյունք տալ, քանի որ անվստահության մակարդակը շատ բարձր է, իսկ սահմանային լարվածությունը չի թուլանում: Եթե հայ-ադրբեջանական սահմանին վերջին լարվությունը չլիներ, թերեւս հանդիպումն իմաստ կունենար, ինչն էլ հնարավորություն կտար բանակցությունները վերսկսելու երկխոսություն իրականացնել:

Ադրբեջանագետ ՍԱՐԳԻՍ ԱՍԱՏՐՅԱՆՆ ընդգծեց.
- Նախկինում ավելի լարված իրավիճակներ են եղել, բայց Հայաստանի եւ Ադրբեջանի նախագահները հանդիպել են: Այժմ էլ հնարավոր եմ համարում նրանց հանդիպումը: Սակայն այստեղ խնդիրն այլ է` արդյոք հանդիպումը արդյունքներ կտա՞. կասկածում եմ, որ առաջիկայում ԼՂՀ հիմահարցի կարգավորման ուղղությամբ որեւէ առաջընթաց կգրանցվի: Ամեն դեպքում՝ Հայաստանի եւ Ադրբեջանի նախագահների հանդիպումը կազմակերպում է ԵԱՀԿ Մինսկի խումբը, եւ չեմ կարծում որ խնդիրներ կառաջանան հանդիպման հարցով:

Քաղաքական եւ միջազգային փորձագետ ՌՈՒԲԵՆ ՄԵՀՐԱԲՅԱՆԸ փաստեց.
- Իհարկե, երկու երկրների նախագահների հանդիպումը հնարավոր է, համոզված եմ նաեւ, որ շատ անհրաժեշտ է: Կարծում եմ, որ Արցախի հիմնախնդրի կարգավորման հարցում պետք է ներառվեն մի քանի կարեւոր տարրեր: Նախ` երկու երկրների միջեւ կնքված զինադադարի ամրապնդման ուղղված համաձայնագիրը նորից պետք է թարմացվի, եւ մեխանիզմներ ներդրվեն, որոնք կբացառեն սադրանքների հնարավորությունը: Բացի այդ՝ հնարավորություններ կստեղծվեն սադրանքները հետաքննելու համար: Սահմանային այն լարվածությունը, որը պարբերաբար լինում է, թույլ չի տալիս, որպեսզի բովանդակային քննարկումներ տեղի ունենան ԵԱՀԿ Մինսկի խմբի համանախագահների առաջարկությունների վերաբերյալ: Այս պայմաններում, երբ ռուս-թուրքական հարաբերությունները խիստ լարված են, կարծում եմ` Հայաստանն ու Ադրբեջանը հասկանում են, որ շահեկան չէ լինել մուրճի եւ զնդանի արանքում: Այսինքն՝ հանդիպումը տեղին կլինի, եւ այնտեղ քննարկելու շատ բան կլինի: Հանդիպումից առանձնապես ակնկալիքներ չունեմ, բայց հանդիպումն էլ արդեն իսկ արդյունք կլինի, քանի որ բանակցելն ու երկխոսելն ավելի գերադասելի է, քան դիպուկահարների տեղակայումը սահմանին, որը բազմաթիվ երիտասարդների կյանք է խլում:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝