Դավիթ Ղարիբյան. «Ձմեռը պետք է ցուրտ լինի նրանց համար, ովքեր չունեն ջերմ հիշողություններ»

Դավիթ Ղարիբյան. «ՁՄԵՌԸ ՊԵՏՔ Է ՑՈՒՐՏ ԼԻՆԻ ՆՐԱՆՑ ՀԱՄԱՐ, ՈՎՔԵՐ ՉՈՒՆԵՆ ՋԵՐՄ ՀԻՇՈՂՈՒԹՅՈՒՆՆԵՐ»

Ձմռան առաջին օրը մոդել, օպերայի եւ բալետի ազգային ակադեմիական թատրոնի դերասան ԴԱՎԻԹ ՂԱՐԻԲՅԱՆԸ հանրության դատին է հանձնել մի տեսահոլովակ, որի գլխավոր միտքը հետեւյալ հաղորդագրությունն է. «Ձմեռը պետք է ցուրտ լինի նրանց համար, ովքեր չունեն ջերմ հիշողություններ»:  Տեսահոլովակի մասին «Իրավունքը» հետաքրքրվեց Դ. Ղարիբյանից, ով նախեւառաջ նշեց, որ այն նկարահանվել է դեռեւս 2012 թվականին` Մարզահամերգային համալիրին հարող տարածքում.

- Այս տեսահոլովակը մի մասն է կազմում երգչուհի Հասմիկ Կարապետյանի «Սիրուն ասա բարեւ» տեսահոլովակի: Ես, պարզապես, ցանկացա լավագույն պահերը վերհիշել եւ, ինչու ոչ, այն ներկայացնել իմ երկրպագուհիներին ու ընկերներին: Ի դեպ, տեսահոլովակի մոնտաժը ռեժիսոր Արսեն Երեմյանի հետ ենք կատարել, որի համար շնորհակալ եմ նրան:

- Իսկ ո՞վ էր տեսահոլովակի անծանոթուհին:

- Անծանոթուհին իմ հարեւանուհին է եղել` Թինան, ում հետ էլ դարձանք այս տեսահոլովակի հերոսները:

- Տեսահոլովակն ուներ հստակ հաղորդագրություն եւ այսպիսի տեսահոլովակները շատ հայտնի են արտասահմանում, կարելի՞ է ասել, որ նոր մշակույթ եք փորձում ներմուծել Հայաստան:

- Կարելի է կեսկատակ-կեսլուրջ ասել, որ հենց Հայաստանն է այս ոճը թելադրում: Սա նոր ոճ չէ, պարզապես, միշտ էլ հինը ինչ-որ ժամանակ հետո վերադառնում է հետ եւ դառնում նոր, ինչպես այս տեսահոլովակն է:

- Իսկ Դուք ունե՞ք ջերմ հիշողություններ, որոնք տաքացնում են Ձեզ ձմռանը:

- Բնականաբար, ունեմ ջերմ հիշողություններ, որոնք ջերմացնում են իմ սիրտն ու հոգին, ոչ միայն ձմռանը, այլ նաեւ տարվա բոլոր եղանակներին:

- Դրանցից մեկի մասին կկիսվե՞ք մեր ընթերցողների հետ:

- Այդ ջերմ հիշողություններից մեկն էլ հենց «Սիրուն ասա բարեւ» տեսահոլովակի նկարահանումներն էին, որն ամեն անգամ դիտելիս ջերմ հիշողություններ են արթնանում: Այնպես որ, ովքեր չեն տեսել տեսահոլովակը, խորհուրդ կտամ դիտել այն:

- Բացի ջերմ հիշողություններով տաքանալուց, հետաքրքիր է, թե ինչպե՞ս էհաղթահարում ձմեռը Դավիթ Ղարիբյանը:

- Ամենօրյա մարզումներով, տաք հագնվելով եւ, իհարկե, տաք թեյ ըմպելով:

Անկեղծ ասած, այս տարվա ձմեռը շատ եմ հավանում, քանի որ այն մեղմ է եւ նույնիսկ հաճելի:

- Որքանո՞վ է Ձեզ համար սպասված առաջին ձյունը:

-Առաջին ձյունը կարծում եմ` նվեր կանի մեզ հենց ամանորի գիշերը, որը էլ ավելի հեքիաթային կդարձնի տոնական գիշերը:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝