«ԱՎԵԼԻ ԼԱՎ Է ՄԻԱՆԳԱՄԻՑ ԹՈՒՐՔԻ ՀԱՐՑԵՐԸ ԼՈՒԾԵՆՔ, ՎԵՐՋԱՑՆԵՆՔ»

«ԱՎԵԼԻ ԼԱՎ Է ՄԻԱՆԳԱՄԻՑ ԹՈՒՐՔԻ ՀԱՐՑԵՐԸ ԼՈՒԾԵՆՔ, ՎԵՐՋԱՑՆԵՆՔ»

Շրջանառվում են ակտիվ հրապարակային լուրեր, որ օրերս ՌԴ նախագահ Վլադիմիր Պուտինը հրամայել է ՌԴ Հարավային ռազմական շրջանի 58-րդ բանակի հաշվին հայ-թուրքական սահմանին տեղակայել 7000 զինծառայող՝ համապատասխան ռազմական տեխնիկայով, այդ թվում՝ ամենաժամանակակից: Պաշտոնապես այս տեղեկատվությունը թեեւ դեռ կոնկրետ հաստատում չի ստացել, բայց նաեւ նկատենք, որ մասնավորապես՝ ՀՀ ՊՆ-ից հերքում եւս չի հնչել:

Այն, որ հայկական սահմանն այն միակ հատվածն է, որտեղ թուրքական եւ ռուսական բանակներն ուղղակիորեն դեմ առ դեմ են կանգնած, հայտնի փաստ է: Իսկ դա նշանակում է, որ այս լարվածության պարագայում բավական է մեկ կայծ, որ ամեն ինչ իրար խառնվի: Այս առումով՝ լրացուցիչ 7000-անոց ռուսական խմբավորման տեղակայումը ոչ միայն անհրաժեշտ միջոցառում է, այլ նույնիսկ կարող է եւ անբավարար լինել, նաեւ հաշվի առնելով, որ սահմանային թեկուզեւ ոչ մասշտաբային բախումը կարող է միանգամից պայթեցնել հայ-ադրբեջանական սահմանը եւս:
Ինչեւէ՝ որքանո՞վ է իրականությանը համապատասխանում այդ 7000-անոց խմբավորման մասին տեղեկատվությունը, եւ, առհասարակ, այս լարվածությունից ի՞նչ կարող ենք սպասել: Թեմայի շուրջ զրուցեցինք ԱԺ Պաշտպանության, ազգային անվտանգության եւ ներքին գործերի մշտական հանձնաժողովի անդամ ԱՌԱՔԵԼ ՄՈՎՍԻՍՅԱՆԻ հետ, ով մեզ հետ զրույցում նախ նկատեց.
- Մենք միշտ պետք է կանգնած լինենք Ռուսաստանի Դաշնության կողքին, ինչպես, որ ռուսն է միշտ մեզ աջակցել եւ սատարել, մեր բարեկամությունը դարերի պատմություն ունի: Հետո էլ՝ մենք երբեք չենք մոռանում, որ հայ ազգին կոտորողները թուրքերն են եղել, եւ եթե Ռուսաստանը որոշի Թուրքիայի հետ մտնի պատերազմական փուլ, մենք ինքնըստինքյան կլինենք պատերազմի մեջ: Մենք չենք կարող դավաճանել մեր դաշնակցին, նախ` քանի որ ՀԱՊԿ-ի անդամ ենք, հետո էլ` հայը դավաճան ընկեր լինել չի կարող: Մենք պետք է պատրաստ լինենք ցանկացած պահի, ցանկացած գործողության:
- Այսինքն՝ լայնամասշտաբ պատերազմի վտանգ այնուամենայնիվ տեսո՞ւմ եք:
- Հիմա այն իրավիճակն է ստեղծվել, որ ոչինչ կանխատեսել կամ բացառել հնարավոր չէ: Բայց եթե Ռուսաստանը մտավ պատերազմի մեջ, մի վայրկյան անգամ չկասկածեք, որ մենք էլ ենք հայտնվելու պատերազմական իրավիճակում: Իսկ պատերազմի մենք հաստատ պատրաստ ենք ցանկացած պահի, ցանկացած վայրում: Բա եթե մեր դաշնակից երկիրը մտավ լայանամասշտաբ պատերազմի մեջ, մենք հո չե՞նք մտնելու մի անկյուն ու կատվի պես նվնվանք. պիտի մենք էլ մտնենք պատերազմի մեջ, այլ ճանապարհ չկա:
Վերջապես՝ մեկնումեկը պե՞տք է դաստիարակի Թուրքիային, թե՞ չէ: Ինչ է եղել, թող դաստիարակողն էլ Ռուսաստանը լինի: Այնպես որ՝ ես կողմնակից եմ, որ Ռուսաստանն այդ կոշտ վերաբերմունքը պահի մինչեւ վերջ, եւ մենք միասնական ուժերով, վստահ եղեք, կկարողանանք ջախջախել թուրքերին: Ես կողմնակից եմ միասնականությանը:
- Պարոն Մովսիսյան, հնարավո՞ր է, որ ստեղծված լարվածությունը տեղափոխվի Լեռնային Ղարաբաղ:
- Մենք ոչ մի խնդիր չունենք: Եթե ճիշտ պահենք մեզ, որտեղ ուզում է լարվածությունը տեղափոխվի, մենք պատրաստ ենք ցանկացած պայմաններում հակահարված տալ թշնամուն: Ես Ձեզ ասել եմ, որ մենք միշտ էլ պատերազմի մեջ ենք, ու եթե պահը եկել` հասունացել է, մենք պատրաստ ենք: Թե չէ ո՞ւմ է պետք երկարատեւ պատերազմ. ավելի լավ է միանգամից թուրքի հարցերը լուծենք, վերջացնենք:

«ՄԻՆՉԵՎ ՎԵՐՋԻՆ ՓԱՄՓՈՒՇՏԸ ԿԿՌՎԵՄ»
-Օրերս հայտնի դարձավ, որ ՌԴ-ն հայ-թուրքական սահմանի վրա զորքեր է ավելացնելու...
- Ուրախ չե՞ք, որ նման որոշում կա: Ինչքան շատ ավելացնեն, էդքան մեր օգուտն է, ինչքան զենք ու տեխնիկա բերեն սահման, էդքան մեզ լավ: Լավ իմացեք, եթե ռուսը չլիներ, հիմա Թուրքիան մեզ երեւի հոշոտել էր: Մենք միշտ ամեն ինչի պատրաստ պետք է լինենք. կլինի Թուրքիա, կլինի Ադրբեջան, ով ուզում է լինի, մենք մեր պատմությունը կռվով պետք է պահենք: Էդպես է եղել առաջ ու էդպես կլինի հիմա: Հայը երբեք չի գնա թուրքի դեմ ծնկի գա: Թող թուրքը լավ իմանա՝ Հայաստանը միշտ պատրաստ է պայքարելու ու առաջ գնալու, կռվելու ենք մինչեւ վերջ: Պետք է ու պարտավոր ենք պայքարել, ուրիշ ձեւ չունենք: Առաջ, որ նստել լացել են, ու թուրքը եկել, կոտորել է, էդ լա՞վ էր: Անձամբ ես մինչեւ վերջին փամփուշտը կկռվեմ, թող մեռնեմ` ինչ է եղել, բայց թույլ չեմ տա թուրքը անի էն, ինչ արեց 1915 թվին: Ճիշտ է, ասում են՝ պատերազմում ոչ ոք չի հաղթում, բայց որ մենք առաջադիմություն կունենանք, հաստատ իմացեք:
Ամեն դեպքում սպասենք` ժամանակը ցույց կտա: Հիմա շտապել պետք չէ, քանի որ չենք իմանում Ռուսաստանի դիրքորոշումը: Բայց, որ ռուսը մտավ պատերազմի մեջ, մենք ինքնըստինքյան կլինենք պատերազմի դաշտում. դա հաստատ:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝