Արշակ Զաքարյան. «ՄԵՆՔ ՊԵՏՔ Է 99 ՏԱՐԻ ԱՌԱՋ ՍԿՍԵԻՆՔ ԲՈՅԿՈՏԵԼ» (Տեսանյութ)

Արշակ Զաքարյան. «ՄԵՆՔ ՊԵՏՔ Է 99 ՏԱՐԻ ԱՌԱՋ

ՍԿՍԵԻՆՔ ԲՈՅԿՈՏԵԼ» (Տեսանյութ)

Ռուսաստանը շարունակում է պատժամիջոցներ կիրառել ընդդեմ Թուրքիայի ու չի պատրաստվում ներել: Հիշեցնենք, որ Թուրքիան խոցել էր ռուսական Սու-24-ը, իսկ այժմ փորձում է չոր դուրս գալ դրա հետեւանքներից, բայց ապարդյուն: ՌԴ-ն արդեն որոշում է կայացրել 2016 թվականի հունվարի 1-ից դադարեցնել Թուրքիայի հետ առանց վիզայի ռեժիմը, ինչպես նաեւ ՌԴ քաղաքացիները բոյկոտում են թուրքական զբոսաշրջությանն ու ապրանքներին, եւ սա կատարվում է պետական ամենաբարձր մակարդակով: Ուշագրավ է այն, որ հայաստանյան լայն շրջանակներում այսպիսի գործողությունների հաջորդականությունը լայն արձագանք է գտել: Սակայն հիշեցնենք, որ թուրքական ապրանքներն ու անթալիաներում հանգստանալը բոյկոտելու մասին Ռուսաստանից շատուշատ առաջ ասել է կինոռեժիսոր ԱՐՇԱԿ ԶԱՔԱՐՅԱՆՆ իր «Բոյկոտ» կարճամետրաժ ֆիլմերի շարքով, ինչի մասին էլ զրուցեցինք նրա հետ.

– Մենք պետք է 99 տարի առաջ սկսեինք բոյկոտել, սակայն ուշացել ենք մոտավորապես 100 տարի: Բայց այն ժամանակ, երբ ես ասացի բոյկոտենք, դրանից հետո շատ բան է փոխվել. շենքեր են կառուցվել, որոնք չեն օգտագործել թուրքական շինանյութ, այսօր թուրքական ապրանք վաճառողները բողոքում են, որ մարդիկ երբ իմանում են ապրանքը թուրքական է, չեն առնում: Անթալիայում հանգստանալու հարցը բարձրացվեց նաեւ «Բոյկոտից» հետո, որովհետեւ մինչեւ այդ, ոչ ոք երբեւէ չէր խոսում այն մասին, թե Անթալիա մի՛ գնացեք, բոյկոտե՛ք: Բայց, իհարկե, «Բոյկոտը» ոչ թե ժողովրդին էր ուղղված, այլ իշխանություններին, որոնք շատ վաղուց` դեռեւս 1994 թվին, երբ Թուրքիան փակեց սահմանը, պետք է արգելեին, որ ցանկացած թուրքական ապրանք մուտք գործի Հայաստան, քանզի այդ պետությունը մեզ հատուկ պահում է տնտեսական շրջափակման մեջ, որպեսզի վատ ապրենք: Իսկ երբ նա անում է այդպիսի քայլ, նրանից ապրանք բերելը, հարստացնելը, հանցագործություն է:

– Ամեն դեպքում, այսօր ռուսները, ում ինքնաթիռը խոցվել է Թուրքիայի կողմից, այս հարցում շատ կտրուկ քայլերի են գնում, մինչդեռ նույն Թուրքիայի կողմից Ցեղասպանություն տեսած հայերը չեն շտապում վերջնականապես բոյկոտել թուրքական ապրանքները: Արդյո՞ք գոնե հիմա ժամանակը չէ:

– Իհարկե, խամաճիկի նման, եթե Ռուսաստանն արեց, կարող է մերոնք էլ անեն, բայց կրկնում եմ` այստեղ մեր արժանապատվության հարցն է, մենք վաղուց պիտի արած լինեինք դա:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝