ՀԱԿԱՀԵՐՈՍԻ ՄՈԳԱԿԱՆ ՈՒԺԸ

ՀԱԿԱՀԵՐՈՍԻ ՄՈԳԱԿԱՆ ՈՒԺԸ

Արդեն 25 տարի է Հայաստանում հերոսն ու հակահերոսը փոխել են տեղերը: Ու այս պայմաններում դժվար է պահանջել, որ ընտանիքը՝ ընտանիքի նմանվի, իսկ երկիրը՝ երկիր դռնա: Այս տարիների ընթացքում ստեղծվել է մի իրավիճակ, որ ծնողն այլև չի կարողանում իր զավակին ասել՝ սովորի, որ մարդ դառնաս, պարկեշտ եղիր, որ քո երկրի հարգված քաղաքացի լինես:

Այս և նման արտահայտությունները վաղուց կորցրել են իրենց իմասը ու ծնողը հաճախ չի էլ իմանում, թե իր երեխայի համար ինչ այլընտրանքային հեքիաթ հորինի, որ կարողանա իր «սուտն» ադարացնել:  Սա գուցե այն եզակի դեպքն է, երբ սուտն արդարացված է, քանի որ ծնողն էլ իր հերթին ջանք չի խնայում հոգեպես առողջ ու հպարտ քաղաքացի դաստիարակելու համար: Բայց, ինչպես ասում են ցանկանալը մի բան է, այն իրականություն դարձնելը մեկ այլ բան:

Ու այս պայմաններում երկիր ենք կառուցում և հետն էլ ուզում ենք, որ տգիտությունը չխեղդի ներկան, իսկ զորբայությունը չդառնա  կենսակերպ: Բայց ինչքա՞ն «խաբենք» ինքներս մեզ ու ստով «սնենք» մեր երեխաներին:

Իշխանությունները բազմից  հայտարարել են, որ իրենց հանդեպ հասարակության վստահության աստիճանը շատ ցածր է, բայց չգիտես ինչու չեն «հասկանում» թե դա ինչի՞ց կարող է լինել: Գուցե այն պարզ պատճառով, որ պետական կառույցները վերածվել են ուղղիչ աշխատանքային գաղութի՞:

Հակասությունների  այս ժամանակաշրջանում, երր կարծես թե բոլորը բոլորի մասին ամեն ինչ գիտեն, հանկարծ ստացվում է այնպես, որ մեր կողքին մեծացած ու սեփական անունն առանց տառասխալի գրել չկարողացող մարդը իշխանական այս կամ այն օղակում դառնում է լավ ու պահանջված մասնագետ, իսկ արտասահմաններում կրթություն ստացածին բաժին է հասնում ընդամենը սրա-նրա ձեռքի տակ բանվորություն անելն ու  օրվա ապրուստը մի կերպ վաստակելը:

Այս պայմաններում իշխանություններն ինչքան էլ համոզեն, որ իրենք մտահոգված են երկրի ապագայով չի կարող ընկալվել հասարակության կողմից, քանի որ մկրատի ազնվության և անազնվության  ծայրերը շատ են հեռացել: Ու թվում է, թե ինչ հեքիաթ էլ որ հորինվի, միևնույն է քանի դեռ հակահերոսն իր ներկայությամբ շարունակում է հասարակության Ես-ը տրորել ու նսեմացնել, հնարավոր չի լինի ոչ ապագա սերունդների մեջ Մարդ դառնալու ցանկությունն  արթնացնել, ոչ էլ երկիր կառուցել, քանի որ հակահերոսի մոգական ուժն ավելի զորեղ է, քան իրական հերոսինը:

ԱՐՄԻՆԵ ԳՐԻԳՈՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝