«ՉԵՄ ԿԱՐԾՈՒՄ ԼԱՎ ՏԱՐԲԵՐԱԿ Է ՀԱՅԱՍՏԱՆԻ ԵԽԽՎ-ԻՑ ՀՐԱԺԱՐՎԵԼԸ». ՀԵՐՄԻՆԵ ՆԱՂԴԱԼՅԱՆ

«ՉԵՄ ԿԱՐԾՈՒՄ ԼԱՎ ՏԱՐԲԵՐԱԿ Է ՀԱՅԱՍՏԱՆԻ ԵԽԽՎ-ԻՑ ՀՐԱԺԱՐՎԵԼԸ». ՀԵՐՄԻՆԵ ՆԱՂԴԱԼՅԱՆ

Երեկ Փարիզում ԵԽԽՎ սոցիալական հանձնաժողովի նիստում քննարկվել է Սարսանգի ջրամբարի մասին զեկույցը` ԵԽԽՎ ձմեռային նստաշրջանի օրակարգ ընդունել-չընդունելու հարցը: Հայկական կողմը հանդես է եկել առաջարկով այս զեկույցը կասեցնել ու չընդունել օրակարգ, սակայն 9 «դեմ» և 16 «կողմ» ձայների հարաբերակցությամբ հայկական պատվիրակների առաջարկը մերժվել է: Սա այս ամսվա, մեր պատվիրակության կողմից թվով երկրորդ ձախողումն է, որի հիմնական պատճառը ադրբեջանական խավիարով ու նաֆթադոլարներով ԵԽԽՎ-ին սնելն է: ԵԽԽՎ հայաստանյան պատվիրակության ղեկավար, ԱԺ փոխնախագահ ՀԵՐՄԻՆԵ ՆԱՂԴԱԼՅԱՆԻՑ հետաքրքրվեցինք, արդյոք պետք չէ, որ Հայաստանը գոնե ժամանակավորապես հրաժարվի ԵԽԽՎ-ի հետ համագործակցությունից, կամ նիստերի մասնակցությունից, եթե հաշվի առնենք, որ ՌԴ պետդումայի նախագահ Սերգեյ Նառիշկինը  արդեն իսկ կասկածի տակ է դնում իրենց երկրի մասնակցությունը, որի հետ կապված ասել է պետք չէ շտապել Եվրոպայի խորհրդին վճարելիք անդամավճարը ամբողջությամբ վճարելու գործում, քանի որ իրենց կողմից վճարվող անդամավճարի մի մասը գնում է ԵԽԽՎ-ի աշխատանքները ֆինանսավորելու վրա:

- Չեմ կարծում, որ դա լավ տարբերակ է ու նաեւ բացատրեմ ինչու. Ես գիտեմ, որ ԵԽԽՎ-ն այն մարմին չէ, որի օրակարգը, նպատակները ու մանդատը այս հարցադրումները քննարկելն է: ԵԽԽՎ խնդիրները ժողովրդավարությունն է, մարդու իրավունքներն է, օրենքի գերակայությունն է եւ այդ իմաստով մենք  եվրոպայի խորհրդի հետ ունենք գործուն, ակտիվ համագործակցություն, որի հետ ունենք նորմալ հարաբերություններ, դիրքեր եւ մեր ստանձնած պարտավորություններն ու հանձնառած զարգացումները, որպես  ԵԽԽՎ անդամ, երկիր նորմալ կատարում ենք, ունենք այդ փոխըմբռնումը եւ գիտակցումը: Սա ածանցյալ, կամ ստվերային երեւույթ է, այդ գործընթացների մեջ եւ դրանց պատճառով գնալ ԵԽԽՎ-ի հետ հարաբերությունների նման զարգացման ես ճիշտ չեմ համարում, թեեւ ուզում եմ հիշեցնել, որ քաղաքականության մեջ երբեք մի ասա երբեք եւ ամեն բան հնարավոր է:

- Եթե գերտերությունն արդեն կասկածի տակ է դնում իր մասնակցությունը այդ հանձաժողովում, ապա ինչո՞ւ Հայաստանը չի կարող ժամանակավորապես դադարեցնել:

- Դրանք տարբեր են:

ԱՐՄԵՆՈՒՀԻ ՀԱԿՈԲՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝