ՌՈՒՍԱՍՏԱՆՈՒՄ ՎԵՐԱՆԱՅՈՒՄ ԵՆ ՀԱՐԱԲԵՐՈՒԹՅՈՒՆՆԵՐԸ ԵՎՐՈՊԱՅԻ ԽՈՐՀՐԴԻ ՀԵՏ

ՌՈՒՍԱՍՏԱՆՈՒՄ ՎԵՐԱՆԱՅՈՒՄ ԵՆ

ՀԱՐԱԲԵՐՈՒԹՅՈՒՆՆԵՐԸ ԵՎՐՈՊԱՅԻ ԽՈՐՀՐԴԻ ՀԵՏ

Ռուսաստանի պետդումայի նախագահ Սերգեյ Նառիշկինը հայտարարեց, որ պետք չէ շտապել Եվրոպայի խորհրդին վճարելիք անդամավճարը ամբողջությամբ վճարելու գործում: Նա նշեց, որ իրենց կողմից վճարվող անդամավճարի մի մասը գնում է ԵԽԽՎ-ի աշխատանքները ֆինանսավորելու վրա: Այս առումով նա նշեց. <Եթե ոչ ամբողջ անդամավճարի առումով, ապա բոլոր դեպքերում դրա մի մասի առումով այս տարի շտապել հաստատ պետք չէ>:

Բանն այն է, որ նախորդ տարվա ապրիլին ԵԽԽՎ-ն պատժամիջոցներ սահմանեց ԵԽԽՎ-ում ՌԴ պատվիրակության դեմ: Միարժամանակ ՌԴ-ի անդամավճարը կազմում է եվրոպայի խորհրդի բյուջեի 10 տոկոսը: Կազմակերպության բյուջեից սնվում են ԵԽԽՎ-ն, ՄԻԵԴ-ը, Վենետիկյան հանձնաժողովը եւ այլ ստորաբաժանումներ:

Նույն տրամադրություններն են տիրում նաեւ Ռուսաստանի դաշնային խորհրդում: Ըստ դաշնային խորհրդի միջազգային կոմիտեի փոխնախագահ Անդրեյ Կլիմովի ԵԽԽՎ-ն վերջին տասնամյակներում <մարգինալացվել է>: Նա համոզված է, որ ԵԽԽՎ-ին անհրաժեշտ են բարեփոխումներ հակառակ դեպքում այն կանցնի պատմության գիրկը: Կլիմովը նաեւ նշել է, որ Ռուսաստանը չի վերադառնա ԵԽԽՎ մինչեւ չհանվեն բոլոր պատժամիջոցները: Իսկ ապագայում չի բացառվում Ռուսաստանի դուրս գալը այդ կառույցից: <ԵԽԽՎ-ն մահամերձ է, դա եվրոպական պառլամենտարիզմի ետնամասն է, ծխելու սենյակը ի տարբերություն եվրախորհրդարանի: ԵԽԽՎ-ում չափազանց շատ է ուռճացված բյուրոկրատիան, որը իրական որոշումներ չի ընդունում քանի որ բուն եվրախորհրդի գոյության իմաստը այժմ գտնվում է ծայրահեղ ցածր աստիճանի վրա>,- կարծում է ռուս սենատորը: <Ռուսաստանը պետք է լրջորեն մտածի այնտեղ իր ներկայության մասին>,- ասել է Կլիմովը միարժամանակ ավելացնելով, որ ԵԽԽՎ-ից դուրս գալու որոշումը պետք է ընդունվի ոչ թե հապճեպ այլ <լուրջ եւ հավասարակշիռ>:

ԱՐՄԵՆՈՒՀԻ ՀԱԿՈԲՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝