ԻՆՉՈՒ ԷԴՄՈՆ ՄԱՐՈՒՔՅԱՆԸ ՉՄԱՍՆԱԿՑԵՑ ՔՎԵԱՐԿՈՒԹՅԱՆԸ

ԻՆՉՈՒ ԷԴՄՈՆ ՄԱՐՈՒՔՅԱՆԸ ՉՄԱՍՆԱԿՑԵՑ

ՔՎԵԱՐԿՈՒԹՅԱՆԸ

ԱԺ Պաշտպանության մշտական հարցերի հանձնաժողովում քննարկվում էր պատգամավորներ Հայկ Բաբուխանյանի, Հովհաննես Մարգարյանի եւ Հեղինե Բիշարյանի` Ճանապարհային երթեւեկության անվտանգության ապահովման մասին» Հայաստանի Հանրապետության օրենքում փոփոխություն կատարելու մասին   նախագիծը:

Արդեն տեղեկացրել ենք, որ օրենքի համահեղինակն ու հարակից զեկուցող Էդմոն Մարուքյանն  առաջարկում են նախագծին տալ դրական եզրակացություն եւ այն ներառել մեծ օրակարգ:

Հիշեցնենք` նախագծով առաջարկվում է  տեխզննում իրականացնել միայն հանրային տրանսպորտի համար եւ երեք տարին մեկ:

Փոխոստիկանապետ Սամվել Հովհաննիսյանը, սակայն առաջարկեց օրենքի համահեղինակներին համագործակցել  ՀՀ տրանսպորտի եւ կապի նախարարության եւ ՀՀ ոստիկանության հետ: Ավելին` նա հիշեցրեց, որ Վրաստանում տեխզննությունը դուրս է եկել Սահակաշվիլու իշխանության օրոք, սակայն այս տարի մարտին տեխզննումը Վրաստանում դարձել է պարտադիր: Բայց  տեխզննման աշխատանքները պատշաճ կատարելու համար տեխզննումը հետաձգվել է 2017 թ-ի դեկտեմբերի 31-ը:

Ի դեպ, ինչպես տեղեկացրեց Տրանսպորտի եւ Կապի փոխնախարարը, ԵՏՄ-ին անդամակցած երկրների համար տեխզննման գործընթացը պարտադիր է եւ խիստ:

Հանձնաժողովի նախագահ Կորյուն Նահապետյանն առաջարկեց  խորհրդարանական լսումներ անցկացնել վերոնշյալ հարցի մասին եւ աշխատանքային խումբ ձեւավորել:  «Առաջարկում եմ` մինչեւ դեկտեմբերի կեսերը հետաձգել, որպեսզի ունենանք ամբողջական  մոտեցումներ վերոնշյալ  խնդրի վերաբերյալ»,- ասաց պրն Նահապետյանը:

Որպես եզրափակում` նախագծի համահեղինակ Հովհաննես Մագարյանն ասաց, որ աշխարհը փուլ չի գա, եթե նախագիծը մտցվի մեծ օրակարգ: Սակայն նախագիծը չընդգրկվեց մեծ օրակարգ երեք կողմ եւ երեք դեմ ձայների հարաբերակցությամբ:

Ի դեպ, Էդմոն Մարուքյանը, ով կողմ էր այս նախագծին, բացակայում էր քվեարկությունից, եւ նրա բացակայությունը վճռորոշ եղավ նախագծի  օրակարգ մտնելու համար, քանի որ ընդամենը մեկ ձայն էր պակասում: Հովհաննես Մարգարյանը հիշեցրեց, որ Մարուքյանը կողմ էր նախագծին, սակայն Կորյուն Նահապետյանն ասաց, որ իրենք հեռակա քվեարկություն չեն կազմակերպում: Սակայն ինչպես հետո մեզ տեղեկացրեց Է. Մարուքյանը. <Ես այս նիստի մասին տեղեկացել եմ այն սկսվելուց 20 րոպե առաջ: Ինչեւէ մասնակցեցի քննարկումներին որպես հարակից զեկուցող, սակայն դուրս եկա հանձնաժողովի նիստի քննարկման կեսից, քանի որ շտապում էի նկարահանման>,- եզրափակեց օրենսդիրը:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝