«ԵԹԵ ՋԻՆՍՈՎ ԵՆ ԽԱՂՈՒՄ, ՉԻ ՆՇԱՆԱԿՈՒՄ, ՈՐ ՆԵՐԿԱՅԱՑՈՒՄԸ ՆՈՐ Է»

«ԵԹԵ ՋԻՆՍՈՎ ԵՆ ԽԱՂՈՒՄ,

ՉԻ ՆՇԱՆԱԿՈՒՄ, ՈՐ ՆԵՐԿԱՅԱՑՈՒՄԸ ՆՈՐ Է»

Երեւանի թատրոնի եւ կինոյի պետական ինստիտուտի Ուսանողական թատրոնը նոր  խաղաշրջանը բացեց Հ. Պարոնյանի «Ատամնաբույժն արեւելյան» կատակերգության նոր բեմադրությամբ` դերասան Արման Նավասարդյանի ռեժիսուրայով: Նախկինում բեմադրված կատակերգությունն այս անգամ շնորհիվ բեմադրիչի մոտեցումների եւ երիտասարդ դերասանական անձնակազմի, բոլորովին նոր շունչ էր ստացել. «Հատուկ միտում չեմ ունեցել նորացնելու այս ներկայացումը, պարզապես ցանկացած գործ, եթե բեմադրվում է այսօր, պետք է լինի ժամանակին համապատասխան: Հատուկ որեւէ բան չեմ արել, պարզապես խոսել եմ այն ամենի մասին, ինչն ինձ հուզում է եւ ինչի մասին ուզել եմ խոսել: Եթե ջինսով են խաղում, չի նշանակում, որ ներկայացումը նոր է, այստեղ մտածելակերպն է կարեւոր: Ես այսօրվա օրով եմ ապրում, բեմադրությունը զարմացնելու համար չի արվել: Դերը` դերասանի, ներկայացումը` ռեժիսորի կարծիքն ու տեսակետն է, սա էլ` իմ տեսակետն է»,- «Իրավունքի» հետ զրույցում նշեց ԱՐՄԱՆ ՆԱՎԱՍԱՐԴՅԱՆԸ:

«ՆՈՒՅՆԻՍԿ ԱՎԵԼԻ ԽԵԼԱՌ ԲԱՆԵՐ ԷԻ ՄՏԱԾԵԼ, ԲԱՅՑ...»

Նրա խոսքով` «Ատամնաբույժն արեւելյան» ներկայացումը որպես դիպլոմային աշխատանք բեմադրելու իր առաջարկությունն ուսանողների կողմից միանշանակ չի ընդունվել. «Եղան տարբեր կարծիքներ, ուսանողների մի մասն առաջարկեց Շեքսպիրի որեւէ գործ բեմադրել, մյուս մասն էլ` այլ հեղինակի կողմնակից էր: Հնչեցին նույնիսկ կարծիքներ, թե այս ներկայացումը հին է: Ես էլ ասացի, որ նրանք իրենցն են խաղացել, մենք էլ` մերը կխաղանք: Եվ ահա նման «ծուռ» բան ստացվեց, նույնիսկ ավելի խելառ բաներ էի մտածել, բայց բեմի տեխնիկական հնարավորությունները թույլ չտվեցին իրագործել, հետագայում կանեմ»,- ընդգծեց Ա. Նավասարդյանը:

Ուսանողական թատրոնի տնօրինությունը բանակցություններ է վարում մարզային մի շարք թատրոների հետ` ներկայացումը մարզերում բեմադրելու համար: Չնայած Ա. Նավասարդյանը չցանկացավ բացել փակագծերը, թե որ մարզերում այն կներկայացվի, բայց շեշտեց. «Հարազատ Բերդում շատ կցանկանայի ցուցադրել ներկայացումը: Բերդ ասում եմ, աչքերս լցվում են, բայց Բերդի թատրոնը տեխնիկական որոշ հնարավորություններ դեռ չունի»,- հավելեց զրուցակիցը:

ԴԵՐԱՍԱՆԸ ՍՏԻՊՎԱԾ ԷՐ ԲԱՐՁՐԱԿՐՈՒՆԿ ԿՈՇԻԿՆԵՐ ՀԱԳՆԵԼ

Կատակերգությունում գլխավոր հերոսին մարմնավորած ԳՐԻԳՈՐ ԳՐԻԳՈՐՅԱՆԸ ներկայացման վերջում ստիպված էր բարձրակրունկ կոշիկներ հագնել, ինչը նրա համար մեծ փորձություն է եղել. «Սկզբում կերպարս այդքան էլ չէի հավանում, մտավախություն ունեի, կկարողանա՞մ արդյոք մարմնավորել կնոջ կերպար: Բայց, ինչպես նկատեցի հանդիսատեսի վերաբերմունքից, ներկայացումը հաջողված է, նշանակում է` կերպարս էլ է հաջողված»,- նկատեց երիտասարդ դերասանը:

Նշենք, որ Ուսանողական թատրոնն այս թատերաշրջանում հանդես կգա յոթ ներկայացումով: Նարինե Գրիգորյանի` «Ես միայն զանգահարելու էի եկել» (Գ. Մարկեսի համանուն պիեսի հիման վրա), Լալա Մնացականյանի` «Մայրը» եւ «Մեծ աղմուկ ոչնչից» ներկայացումներից զատ, նոյեմբերի 17-ին թատերասեր հանրության համար նախատեսված է նաեւ Սամսոն Ստեփանյանի «Առաջարկություն» ներկայացման պրեմիերան:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝