ՀԿԵ ՓԲԸ-Ն ՄԱՍՆԱԿՑԵՑ ՀԱՅ-ՌՈՒՍԱԿԱՆ ՄԻՋՏԱՐԱԾԱՇՐՋԱՆԱՅԻՆ ՀԱՄԱԺՈՂՈՎԻ ԱՇԽԱՏԱՆՔՆԵՐԻՆ

ՀԿԵ ՓԲԸ-Ն ՄԱՍՆԱԿՑԵՑ ՀԱՅ-ՌՈՒՍԱԿԱՆ ՄԻՋՏԱՐԱԾԱՇՐՋԱՆԱՅԻՆ ՀԱՄԱԺՈՂՈՎԻ ԱՇԽԱՏԱՆՔՆԵՐԻՆ

«Հարավկովկասյան երկաթուղի» ՓԲԸ գլխավոր ինժեներ Արամ Եդիգարյանը, Գործերի կառավարման ծառայության պետ Կարեն Անտոնյանը եւ Միջազգային կապերի բաժնի պետի տեղակալ Լիանա Մովսիսյանը մասնակցել են «Ռուսաստան. Հայաստան. Եվրասիական տնտեսական միություն. Միջտարածաշրջանային համագործակցության հեռանկարները» IV հայ-ռուսական միջտարածաշրջանային համաժողովի աշխատանքներին:

Համաժողովի շրջանակներում ելույթ էր ունեցել «Ռուսական երկաթուղիներ» ԲԲԸ փոխնախագահ ԱԼԵՔՍԱՆԴՐ ՍԱԼՏԱՆՈՎԸ, ով ներկայացրեց երկաթուղային տրանսպորտի ոլորտում ՌԵ ԲԲԸ-ի եւ Հայաստանի Հանրապետության համագործակցության հեռանկարները:
Խոսելով հայ-ռուսական համագործակցության մասին` Ա. Սալտանովը նշեց, որ երկու երկրների միջեւ ջերմ եւ վստահելի հարաբերությունները ձեւավորվել են տնտեսության բոլոր ոլորտներում, հատկապես երկաթուղային տրանսպորտի բնագավառում:
- Հայաստանի եւ Ռուսաստանի երկաթուղիների համագործակցությունն ընդլայնվում է ինչպես երկկողմանի ձեւաչափով, այնպես էլ ԱՊՀ երկրների Երկաթուղային տրանսպորտի հարցերով խորհրդի եւ «1520 ռազմավարական համագործակցություն» հարթակներում,- ասաց Սալտանովը:
ՌԵ փոխնախագահը հիշեցրեց, որ 2015 թվականից Հայաստանը հանդիսանում է Եվրասիական տնտեսական միության լիիրավ անդամ` հույս հայտնելով, որ այս կառույցը կնպաստի Հայաստանի եւ Ռուսաստանի առեւտրատնտեսական կապերի խորացմանն ու դիվերսիֆիկացմանը, բոլոր առանցքային ոլորտներում եւ առաջին հերթին երկաթուղային տրանսպորտի ոլորտում համագործացության զարգացմանը:
- Հաշվի առնելով մեր երկրների համագործակցության զարգացման հեռանկարները եւ Հայաստանի` եվրասիական տրանսպորտային ցանցում ինտեգրումը` առաջնահերթ են դառնում հանրապետության տրանսպորտային ենթակառուցվածքի ռազմավարական զարգացման հարցերը: Այս հարցի լուծմանը նպաստում է ՌԵ ԲԲԸ-ի մասնակցությունը Հայաստանի տարածքում իրականացվող ենթակառուցվածքային նախագծերում,- ասաց Ա. Սալտանովը:
ՌԵ ներկայացուցիչը հիշեցրեց, որ Հայաստանի երկաթուղային ցանցի արդիականացման, ներհանրապետական եւ միջազգային ուղեւորա-եւ բեռնափոխադրումների զարգացման նպատակով 2008 թվականից գործում է ՌԵ ԲԲԸ-ի դուստր ձեռնարկություն` «Հարավկովկասյան երկաթուղի» ՓԲԸ-ն: Ընկերությունը, նրա խոսքերով, արդյունավետ կառավարում է Հայաստանի երկաթուղային ենթակառուցվածքի ակտիվները` 2008 թվականի փետրվարի 13-ին կնքված կոնցեսիոն պայմանագրի համաձայն:
Պայմանագրի շրջանակներում, ինչպես նշեց ՌԵ փոխնախագահը, վերանորոգվել է 450 կմ գիծ, կառուցվել են 3 հիմնական երկաթուղային կամուրջներ, ձեռք են բերվել մոտորավագոնային շարժակազմի 60 միավոր, 10 ջերմաքարշ, 8 էլեկտրաքարշ, 700 բեռնատար եւ 27 ուղեւորատար վագոն, կապիտալ վերանորոգվել են Երեւանի, Գյումրու եւ Վանաձորի կայարանները, ավարտվել է լոկոմոտիվային եւ վագոնային դեպոների արդիականացումը:
- 2008 թվականից ներդրվել էր 250 մլն դոլար: Ներդրումային պարտավորությունները 2008-2014 թթ. կատարվել են 100,3%-ով: Զարգանում է ընկերության կադրային ներուժը, պատրաստվում են մասնագետներ, ձեւավորվում է կադրային ռեզերվը,- նշեց Սալտանովը:
Միեւնույն ժամանակ նա ընդգծեց, որ ՀԿԵ-ն էական հումանիտար աջակցություն է ցուցաբերում Հայաստանի Հանրապետությանը եւ վերջին երկու տարիներին ֆինանսական աջակցություն է ցուցաբերել հանրապետությունում աշխատող հասարակական կազմակերպություններին, տարբեր միջոցառումների, գիտատուրիստական արշավների եւ ռուսաց լեզվի ամառային դպրոցների անցկացման հարցերում:
- Իրականացված միջոցառումների համալիրը երկրի երկաթուղային տրանսպորտի արդյունավետ աշխատանքի եւ Հայաստանի տնտեսական զարգացման համար ամուր հիմք է հանդիսանում: Իսկ դա երկաթուղու անձնակազմի վաստակն է: «Ռուսական երկաթուղիներ» ԲԲԸ-ն շահագրգռված է ընդլայնել Հայաստանի Հանրապետության հետ համագործակցությունը երկաթուղային տրանսպորտի ոլորտում: Մենք պատրաստ ենք ջանքեր գործադրել Հայաստանի երկաթուղային համակարգի մրցակցությունը բարձրացնելու եւ եվրասիական տրանսպորտային համակարգում, այդ թվում, Եվրասիական տնտեսական միության շրջանակներում, ինտեգրելու համար,- հայտարարեց Ա. Սալտանովը:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝