Սերժ Սարգսյան. Հայաստանում Չեխիայի դեսպանության բացումը կնպաստի հայ-չեխական բարեկամությանը

Սերժ Սարգսյան. Հայաստանում Չեխիայի դեսպանության բացումը կնպաստի հայ-չեխական բարեկամությանը

Հայաստանում Չեխիայի դեսպանության բացումը կնպաստի հայ-չեխական բարեկամությանը: Այս մասին, այսօր նոյեմբերի 5-ին, Չեխիայի Կաթոլիկ եկեղեցու առաջնորդ, Պրահայի արքեպիսկոպոս Կարդինալ Դոմինիկ Դուկայի հետ հանդիպման ժամանակ նշել է ՀՀ նախագահ Սերժ Սարգսյանը:

Նախագահի մամուլի գրասենյակից NEWS.am-ին հայտնում են, որ նախագահը ողջունել է հյուրին, ով, նրա խոսքով, հայ ժողովրդի լավագույն բարեկամներից է եւ մշտապես սպասված հյուր Հայաստանում: Սերժ Սարգսյանը ջերմությամբ է հիշել Կարդինալ Դուկայի հետ իր նախորդ հանդիպումն ու գոհունակությամբ փաստել, որ հայ-չեխական տարբեր մակարդակի հանդիպումներից հետո երկկողմ հարաբերությունների ամրապնդմանը նոր լիցք է հաղորդվում, եւ դրանք շարունակում են դինամիկ զարգանալ:

Նախագահ Զեմանի հետ իր հանդիպման ժամանակ ձեռքբերված պայմանավորվածության համաձայն Հայաստանում Չեխիայի դեսպանության բացումը եւս, նախագահ Սերժ Սարգսյանի համոզմամբ, զգալիորեն կնպաստի հայ եւ չեխ ժողովուրդների բարեկամության, երկու պետությունների միջեւ հարաբերությունների ամրապնդման գործին:

«Լինելով քրիստոնեությունը որպես պետական կրոն աշխարհում առաջինն ընդունելած պետություն՝ մենք մեծապես արժեւորում ենք աշխարհընկալմամբ մեզ մոտ կանգնած ժողովուրդների հետ հոգեւոր կապի եւ փոխհարաբերությունների ընդլայնումը։ Անկասկած, չեխ ժողովուրդը նրանց թվին է պատկանում: Այդ տեսանկյունից մեծապես կարեւորում եւ բարձր եմ գնահատում Ձեր այցը Հայաստան»,-ասել է նախագահ Սերժ Սարգսյանը:

Հանդիպմանը երկուստեք կարեւորվել է Հայ Առաքելական եկեղեցու եւ Չեխ Կաթոլիկ եկեղեցու հարաբերություններում առկա համագործակցային մթնոլորտը, որում, ըստ Նախագահի, անգնահատելի է Կարդինալ Դուկայի դերը: Հանրապետության նախագահն իր գոհունակությունն է հայտնել Պրահայի Սուրբ Հոգի եկեղեցին Հայ Առաքելական եկեղեցու Սուրբ Գրիգոր Լուսավորիչ ծխական համայնքին տրամադրելու կապակցությամբ՝ այդ քայլը մեծ իրադարձություն համարելով Չեխիայի հայ համայնքի կյանքում՝ նրանց հավատի եւ ինքնության պահպանման տեսանկյունից:

«Շատ ուրախ եմ, որ ինձ առիթ է ընձեռվել այցելել Հայաստան՝ մի երկիր, որ ոչ միայն առաջինն է ընդունել քրիստոնեությունը որպես պետական կրոն, այլեւ ունի հարուստ հնագույն պատմություն ու մշակույթ եւ մի ժողովուրդ, որն այդ ամենի կրողն է եւ մեծագույն հարգանք է ներշնչում»,-ասել է Չեխիայի Կաթոլիկ եկեղեցու առաջնորդ, Պրահայի արքեպիսկոպոսը:

Նշելով, որ չեխ ժողովուրդը քաջատեղյակ է, թե ինչ ոճրագործություն է կատարվել անցյալ դարասկզբին հայ ժողովրդի նկատմամբ, Կարդինալ Դոմինիկ Դուկան ընդգծել է, թե վստահ է՝ երկու բարեկամ ժողովուրդների, պետությունների եւ եկեղեցիների միջեւ ձեւավորված ջերմ հարաբերություններն ու փոխգործակցությունը պետք է ուղղված լինի նաեւ աշխարհում խաղաղության հաստատմանն ու անհանդուրժողականության վերացմանը:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝