ՕԵԿ ՊԱՏԳԱՄԱՎՈՐԸ ՈՍՏԻԿԱՆՈՒԹՅՈՒՆ ՉԻ ԳՆԱԼՈՒ

ՕԵԿ ՊԱՏԳԱՄԱՎՈՐԸ ՈՍՏԻԿԱՆՈՒԹՅՈՒՆ ՉԻ ԳՆԱԼՈՒ

Երեկ` ՀՀ ոստիկանությունը հայտարարություն էր տարածել ընտրացուցակների անճշտության մասին: Հայտարարության մեջ, մասնավորապես, ասվում է. «ՀՀ Սահմանադրության բարեփոխումների հանրաքվեի նախնական ընտրական ցուցակների հրապարակումից հետո տարբեր հասարակական կազմակերպություններ, իրավապաշտպաններ ու քաղաքական գործիչներ հանդես են գալիս հայտարարություններով ու դիտողություններուններով՝ ցուցակների թերությունների և անճշտությունների վերաբերյալ:
Ոստիկանությունը, նպատակ ունենալով նվազագույնի հասցնել ընտրացուցակների հնարավոր անճշտությունները, անհրաժեշտ պազաբանումներով ու բացատրություններով հրատապ արձագանքում է այդ հայտարարություններին:
Չնայած այդ ծավալուն աշխատանքին՝ արդյունքները բավարար չհամարելով և շարունակելով այս բնագավառում հանրության հետ լայն համագործակցության քաղաքականությունը՝ ոստիկանությունն առաջարկում է քննարկումը ԶԼՄ-ների հարթությունից տեղափոխել առավել գործնական դաշտ և կազմակերպությունների ու կառույցների ներկայացուցիչներին (մասնավորապես՝ ԱԺ պատգամավորներ Արամ Մանուկյանին, Հովհաննես Մարգարյանին և Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցին, որոնք առավել հաճախ են հանդես գալիս ընտրացուցակների հիմնախնդիրների շուրջ), նաև բոլոր այն քաղաքացիներին, որ մտահոգ են ընտրացուցակների կատարելագործմամբ, հրավիրում է ոստիկանության համապատասխան ստորաբաժանումների պատասխանատուների հետ առարկայական քննարկման, որը տեղի կունենա 2015 թ. նոյեմբերի 6-ին, ժամը 14.00-ին»:

ՀԱԿ խմբակցության քարտուղար Արամ Մանուկյանը եւ Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը, սակայն, լրատվամիջոցներից մեկի հետ զրույցում ասել էին, որ չեն գնալու ոստիկանություն: ՕԵ խմբակցության  պատգամավոր Հովհաննես Մարգարյանից  «Իրավունք»-ը պարզեց` Հովհաննես Մարգարյանը կգնա՞ ոստիկանություն: «Եթե մեզ հրավիրեն, օգտակար կլինենք»,- ասաց պատգամավորը:

Հիշեցրինք` ոստիկանությունն արդեն տարածել է հայտարարություն, հետեւաբար քայլ արդեն արվել է: Հովհաննես Մարգարյանը, սակայն, ակնկալում է պաշտոնական գրություն պատկան մարմիններից` համագործակցելու ընտրացուցակների անճշտությունները վերացնելու. լուծումներ գտնել նույնականացման քարտերի  համար:  «Ես էլ հայտարարում եմ` հրավիրում եմ պատկան մարմիններին քննարկում կազմակերպել ԱԺ պետա-իրավական  հանձնաժողովում»,- եզրափակեց ՕԵ պատգամավորը:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝