ՎԱՇԽԱՌՈՒԻ ԶՈՀ. «ՄԵՐ ՓԱՌԱՊԱՆԾ ՈՍՏԻԿԱՆՆԵՐԸ ՉՈՐՍ ԱՆԳԱՄ ՈՉԻՆՉ ՉԵՆ ԳՏԵԼ»

ՎԱՇԽԱՌՈՒԻ ԶՈՀ. «ՄԵՐ ՓԱՌԱՊԱՆԾ

ՈՍՏԻԿԱՆՆԵՐԸ ՉՈՐՍ ԱՆԳԱՄ ՈՉԻՆՉ ՉԵՆ ԳՏԵԼ»

«Իրավունքը» նախորդ տարի անդրադարձել էր Երեւանի Բաբաջանյան փողոցի 103 շենքի 22 բնակարանի բնակիչ Սողոմոնյանների ընտանիքի խնդրին: Հիշեցնենք` Սողոմոնյանների ընտանիքը, ինչպես պնդում է Հովհաննես Սողոմոնյանը, դարձել է խաբեության զոհ, որում իր  ուրույն դերակատարությունն է ունեցել,  ինչպես մեզ հետ զրույցում նշում է Սողոմոնյանը, վաշխառու Նորիկ Տեր-Գրիգորյանը: Նա ամեն կերպ ցանկանում է վերականգնել Սողոմոնյանների բնակարանի կեղծ առք ու վաճառքի պայմանագիրը, որը  դատական երեք ատյանները  չեղյալ են համարել: Իսկ նման վաշխառուներ մեր երկրում քիչ չեն:

Բնակարանի կեղծ առքուվաճառքի պայմանագիրը անօրինական համարելու համար վաշխառու Նորիկ Տեր-Գրիգորյանը դատի է տվել կադաստրի պետական կոմիտեին: Որպես երրորդ կողմ՝ դատական սույն գործում ներգրավված են նաեւ Սողոմոնյանների ընտանիքը: Սույն գործով դատական վճիռը  կայացվեց 2014 թվականի հոկտեմբերի 22-ին. վարչական դատարանը մերժեց Նորիկ Տեր-Գրիգորյանի հայցն ընդդեմ կադաստրի պետական կոմիտեի:

Դատական սույն գործը նոր փուլ է թեւակոխել: Վաշխառու Նորիկ Տեր-Գրիգորյանը, ինչպես «Իրավունք»-ին հայտնեց Հովհաննես Սողոմոնյանը,  դիմել է վերաքննիչ դատարան` բողոքարկելու  վարչական դատարանի դատավճիռը: Վերաքննիչն էլ ետ է ուղարկել գործը` վերանայման  նպատակով:

Ինչ վերաբերում է սույն դատական գործով առաջին վաշխառուին` Արթուր Միրզոյանին քրեական պատասխանատվության ենթարկելուն, Հովհաննես Սողոմոնյանի խոսքով` չորս անգամ դիմել է իրավապահներին. «Մեր փառապանծ ոստիկանությունը, սակայն, ոչինչ էլ չի գտել, փաստեր չկան, անզոր են»:

Դատական հաջորդ նիստը նշանակվել է   նոյեմբերի վեցին` ժամը 11:00-ին:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝