ՀՐԱՏԱՐԱԿՎԵԼ Է «7 ԳՈՒՅՆ» ՊԱՏՄՎԱԾՔՆԵՐԻ ԺՈՂՈՎԱԾՈՒՆ

ՀՐԱՏԱՐԱԿՎԵԼ Է «7 ԳՈՒՅՆ» ՊԱՏՄՎԱԾՔՆԵՐԻ ԺՈՂՈՎԱԾՈՒՆ

Այս տարի Մանկապատանեկան գրքի միջազգային կոմիտեի հայաստանյան ներկայացուցչությունը (IBBY Armenia) Խնկո Ապոր անվան ազգային մանկական գրադարանի, «Հրանտ Մաթեւոսյան» հիմնադրամի, «Էդիթ Պրինտ» հրատարակչության եւ «Ակտուալ արվեստ» ՀԿ-ի հետ «Ընթերցող դառնալու երեխայի իրավունքը» կարգախոսով դրամաշնորհային ծրագրի շրջանակում իրականացրել է «Պատանին եւ շրջակա միջավայրը» ստեղծագործական մրցույթ-նախագիծ, որի նպատակն է խթանել մանկապատանեկան գրականության զարգացումը Հայաստանում: Ծրագրի ստեղծագործական փուլին մասնակցել են 7 գրողներ, որոնք մանուկների եւ պատանիների համար գրել են 7 հետաքրքիր պատմվածքներ: Այս համատեղ աշխատանքի արդյունքում էլ ծնվել է «7 գույն» խորագրով պատմվածքների ժողովածուն, որը նկարազարդել են 8 նկարազարդողներ: Խնկո Ապոր անվան ազգային մանկական գրադարանի տնօրեն ՌՈՒԶԱՆՆԱ ՏՈՆՈՅԱՆԻ խոսքով` ծրագրին մասնակցել են արդեն որոշակի փորձ ունեցող գրողներ.«Սա հատուկ ծրագիր էր եւ ուղղված է մեր պատանիներին, բացի այդ, գրողների շրջանում ի վերջո պետք է տեղի ունենար սերնդափոխություն: Ծրագիրը նաեւ փորձ էր դաշտ բերել երիտասարդներին, որոնք կստեղծագործեն պատանիների ու մանուկների համար: Ծրագիրի շրջանակներում գիրքը կթարգմանվի անգլերենով եւ կներկայացվի Բոլոնիայի մանկապատանեկան գրքի տոնավաճառում»,-«Իրավունքի» հետ զրույցում նշեց Ռ. Տոնոյանը:
«7 գույն» ժողովածուում տեղ գտած պատմվածքների թեմատիկան տարբեր է, սակայն դրանք բոլորն էլ արդիական են:

Պատմվածքներից մեկի հեղինակը ԱԼԼԱ ՍԵՐՈԲՅԱՆՆ է, ով պատանիների համար ներկայացրել է հուզիչ մի պատմություն` Վասիլիկ անունով կատվի մասին: Պատմվածքի հիմքում ընկած է իրական պատմություն: Հեղինակի խոսքով`ստեղծագործությունը հատուկ լսարան չունի, այն ուղղված է բոլոր նրանց , ովքեր ցանկանում են գեղեցիկ ու հուզիչ պատմություն կարդալ. «Սա իմ երկրորդ պատմվածքն է, որով ցանկացել եմ ընթերցողներին ցույց տալ, որ բնության մեջ, կենդանական աշխարհում սերը, գթասրտությունը եւ նվիրումը մեծ նշանակություն ունեն: Պատմվածքի հերոսը թփուտներում գտնելով փոքրիկ շնիկի նրան չի վնասում, այլ պարուրում սիրով ու հոգատարությամբ: Նա կյանքի գնով շնիկին պաշտպանում է նաեւ շնագայլերից եւ զոհում իր տեսակը»,-մանրամասնեց Ա. Սերոբյանը, շնորհակալություն հայտնելով Մանկապատանեկան գրքի միջազգային կոմիտեի հայաստանյան ներկայացուցչությանը, Խնկո Ապոր գրադարանին եւ ՀՀ մշակույթի նախարարությանը:

ԷԼՖԻՔ ԶՈՀՐԱԲՅԱՆՆ էլ իր ընթերցողներին է ներկայացրել  «Ամոթի գույնը» հեքիաթը, որը նրա բնորոշմամբ արդիական գործ է, համամարդկային ու համաժամանակյան. «Սեւ ժայռի վրա հավաքվում են վհուկները որոշելու 21-րդ դարի ամենամեծ աղետը: Տարբեր առաջարկներ են լինում, բայց վհուկներից մեկը գուշակում է, որ մարդը կորցնելու է իր ամոթի գույնը: Ամոթի գույնը կորցնելու դեպքում մարդը կորցնում է ամեն ինչ»,-նշեց Է. Զոհրաբյանը եւ ավելացրեց, որ ասելիքի առումով պատմվածքը բազմաշերտ է, այն  արդեն դարձրել է հեքիթ-պիես, սակայն դեռեւս որեւէ թատրոնի չի տրամադրել: Հեղինակն իր ստեղծագործությունը նվիրում է աշխարհի բոլոր մեծ ու փոքր մանուկներին` լավ հեքիաթները բոլորի համար են:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝