ՌԱԴԻԿ ՄԱՐՏԻՐՈՍՅԱՆ. «Ա. ԱԲՐԱՀԱՄՅԱՆԻ ԿՈՂՄԻՑ ՍՏԵՂԾՎԵԼԻՔ ԿՈՒՍԱԿՑՈՒԹՅԱՆ ՀԵՏ ՈՉ ՄԻ ԱՌՆՉՈՒԹՅՈՒՆ ՉՈՒՆԵՄ»
Արխիվ 12-16
ՌԱԴԻԿ ՄԱՐՏԻՐՈՍՅԱՆ. «Ա. ԱԲՐԱՀԱՄՅԱՆԻ ԿՈՂՄԻՑ ՍՏԵՂԾՎԵԼԻՔ ԿՈՒՍԱԿՑՈՒԹՅԱՆ ՀԵՏ ՈՉ ՄԻ ԱՌՆՉՈՒԹՅՈՒՆ ՉՈՒՆԵՄ»
Խոսակցություններ են պտտվում այն մասին, որ ՀՀ գիտությունների ազգային ակադեմիայի նախագահ ՌԱԴԻԿ ՄԱՐՏԻՐՈՍՅԱՆԸ քաղաքականություն մտնելու հայտ է ներկայացնում: Համենայնդեպս՝ նման տպավորություն էր առաջացել օրերս, երբ տեղի ունեցած Արա Աբրահամյանի հայտնի ասուլիսի ժամանակ նրա կողքին էր նաեւ պարոն Մարտիրոսյանը: Բայց մինչ պարզելը, թե դա ինչ նպատակ էր հետապնդում, Ռ. Մարտիրոսյանի հետ նախ զրուցեցինք հայաստանյան գիտության ներկայիս վիճակի շուրջ:
«ԳԻՏՈՒԹՅԱՆ ՆԿԱՏՄԱՄԲ ՀԵՏԱՔՐՔՐՈՒԹՅՈՒՆԸ ՇԱՏ Է ՆՎԱԶԵԼ»
-Գիտությունը վերջին տարիներին զարգանում է, օր օրի առաջընթաց է ապրում, բայց, ցավոք, գիտության նկատմամբ հետաքրքրություն չկա: Գիտական շատ կարեւոր արդյունքներ կան, բայց դրանք կիրառական, շոշափելի դարձնելու համար հետաքրքրվող կողմ չունենք: Իսկ հետաքրքրվողները, իհարկե, գործարարները պետք է լինեն, տնտեսության տարբեր ոլորտների աշխատողները եւ, ի վերջո, պետությունը պետք է պատվեր ձեւակերպի գիտության համար: Եթե վերոհիշյալ ոլորտների ներկայացուցիչների կողմից հետաքրքրություն լիներ, հանրությունը կզգար, թե մեր գիտությունը ինչ արդյունքներ է տալիս:
- Իսկ ինչո՞վ եք բացատրում, որ գիտության նկատմամբ հետաքրքրություն չկա:
- Տեսեք՝ սովետական շրջանում հանրությունն ավելի շատ բան գիտեր գիտության մասին, գիտության արդյունքները շատ ավելի կիրառական էին, քան հիմա: Պատճառն այն է, որ այսօր գիտության նկատմամբ հետաքրքրությունը շատ է նվազել: Իսկ ինչո՞ւ. որովհետեւ մարդիկ չեն տեսնում գիտության մեջ իրենց հեռանկարը: Երիտասարդը, ով պիտի գա գիտություն, չի գալիս: Իր ընդունակություններն այլ ոլորտներում է կիրառում, քանի որ գիտության ոլորտում ակնհայտ տեսնում է, որ լուծված չէ նրա ամենատարրական սոցիալական խնդիրները:
- Դա հին եւ հայտնի խնդիր է: Ուրեմն՝ որտե՞ղ եք տեսնում լուծումը:
- Այստեղ գոյություն ունի երկու կողմ` մեկը պետությունն է, մյուսը` Գիտությունների ազգային ակադեմիան: Պետությունը պետք է երիտասարդ մարդուն, ով ցանկանում է գնալ դեպի գիտություն, ընդառաջի եւ գոնե մինիմալ սոցիալական հարցերը լուծի: Իսկ մենք` գիտությամբ զբաղվողներս, պետք է գիտությունը դարձնենք գրավիչ, հետաքրքիր, որ երիտասարդը հետաքրքրվի եւ ձգտի դեպի գիտություն: Եթե չստեղծենք այս պայմանները, ապա շատ շուտով այն անձինք, գիտնականները, ովքեր աշխատում են, աստիճանաբար կծերանանան եւ...
- Փաստորեն, Ձեր խոսքերից ենթադրելով, այսօր գիտությունն առհասարակ գրավիչ չէ:
- Ինչու չէ, գրավիչ է, բայց գրավիչ է մասամբ: Այսինքն՝ դեռ տեղ ունի ավելի զարգանալու: Դրա համար էլ մենք բազմաթիվ միջազգային դրամաշնորհներ ենք շահում, իսկ այդ ամենը հո դատարկ տեղը չե՞ն տալիս:
- Ասիք` ունեք բավականին ձեռքբերումներ: Կխնդրեինք անդրադառնալ, ասենք, երեք հիմնական ձեռքբերումներին:
- Գիտության բոլոր ուղղություններում ունենք շատ կարեւոր առաջընթաց: Նախեւառաջ՝ ֆիզիկայի, աստղաֆիզիկայի, մաթեմատիկայի, հասարակագիտության ասպարեզներում, քիմիայի տարբեր բնագավառներում, ինֆորմացիոն համակարգերում: Այնպես որ, բոլոր ուղղություններում էլ նշանակալի արդյունքներ ունենք:
«ՆԱ ԽՆԴՐԵՑ, ՈՐ ԵՍ ՆԵՐԿԱ ԼԻՆԵՄ...»
-Պարոն Մարտիրոսյան, գիտության փոխարեն` օրերս Դուք նկատվեցիք նաեւ քաղաքական հարթակում: Համենայնդեպս՝ նաեւ այդպես մեկնաբանվեց Ձեր ներկայությունը Արա Աբրահամյանի ասուլիսին: Ինչո՞վ էր դա պայմանավորված, հնարավո՞ր է, որ Դուք եւս ցանկանում եք մտենել նրա ստեղծելիք կուսակցություն:
- Արա Աբրահամյանը Գիտությունների ակադեմիայի հետ վաղուց ունի լուրջ համագործակցություն. բազմաթիվ անգամներ մենք հայտարարել ենք գիտական մրցույթներ, որոնց մրցանակները տվել է հենց նա: Բացի դրանից՝ Արա Աբրահամյանը հանդիսանում է մեր «Գիտության զարգացման» հիմնադրամի հիմնադիրներից մեկը: Դրա համար էլ նա իրեն վերաբերող շատ միջոցառումներ խնդրում է, որ անցկացնենք ակադեմիայի դահլիճներում: Իսկ ինչ վերաբերում է վերջին ասուլիսի ընթացքում նրա կողքին նստելուն, դա ընդամենը հարգանք էր, ուրիշ ոչինչ: Ես կուսակցական ոչ մի հավակնություն ունեմ, ո՛չ Աբրահամյանի կողմից ստեղծվող կուսակցության նկատմամբ, ո՛չ էլ գոյություն ունեցող կուսակցությունների: Ժամանակին ես եղել եմ մի կուսակցության անդամ, եւ դրանով վերջանում են իմ քաղաքական կողմնորոշումները: Այնպես որ, այդ տարածված կասկածները, թե ես առնչություն ունեմ նոր ստեղծվելիք կուսակցության հետ, ասեմ` ոչ մի առնչություն չունեմ: Եթե ուշադիր են եղել, ապա տեսած կլինեն, որ ասուլիսի ընթացքում անգամ մի բառ ես չեմ արտահայտել: Ընդամենը նա խնդրեց, որ ես ներկա լինեմ, իսկ մենք էլ` ինչ-որ տեղ պարտավորված ենք դրան, եւ արդեն ասացի, թե ինչու:
- Իսկ Դուք քանի որ բավական ժամանակ համագործակցում եք Արա Աբրահամյանի հետ, նրան տեսնո՞ւմ եք որպես քաղաքական գործիչ, կուսակցության առաջնորդ:
- Դժվարանում եմ ասել, որովհետեւ տարբեր բնույթի են քաղաքական գործիչները: Ամեն դեպքում՝ Արա Աբրահամյանի կողմից հայտնի են բավականաչափ քայլեր, խնդիրներ, որոնք ունեն նաեւ քաղաքական երանգ: Բայց եւ այնպես չեմ կարող գնահատել, պետք է ավելի շատ նրա քաղաքական մտորումներին, նկրտումներին ծանոթ լինեմ, որպեսզի գնահատական տամ: Իսկ ես դրանով չեմ հետաքրքրվում:
Հարցազրույցը` ԻԼՈՆԱ ԱԶԱՐՅԱՆԻ
Բաժանորդագրվե՛ք https://t.me/iravunk
1
18346 դիտում
2
11135 դիտում
3
1560 դիտում
4
1522 դիտում
5
1476 դիտում
2
17643 դիտում
4
8026 դիտում
5
4094 դիտում
4
8267 դիտում
