ԼԱՎԱԳՈՒՅՆՆԵՐԸ ԿԱՐԺԱՆԱՆԱՆ «ՍՈՍԵ» ԱՐՁԱՆԻԿԻ

ԼԱՎԱԳՈՒՅՆՆԵՐԸ ԿԱՐԺԱՆԱՆԱՆ «ՍՈՍԵ»  ԱՐՁԱՆԻԿԻ

Հոկտեմբերի 17-24-ը «Մոսկվա» կինոթատրոնում կմեկնարել է «Սոսե» ամենամյա միջազգային կինոփառատոնը, որին այս տարի մասնակցության հայտեր են ուղարկել 74 երկրից, իսկ փառատոնի օրերին կցուցադրվեն 40 երկրից 98 ֆիլմ: Ըստ կազմակերպիչների ընտրվել են քիչ թե շատ որակյալ ֆիլմեր, որոնք համապատասխանում են կինոփառատոնի բովանդակությանն ու կանոնակարգին: Բացի իր հիմնական մրցութային ծրագրից փառատոնն ունի եւս 2 ծրագիր, որոնք կարող են նաեւ շրջանցել կնոջ թեման` «Հատուկ թեմա» մրցութային ծրագիրը` «Պահպանի՛ր մարդուն» խորագրով, նվիրված  Հայոց Ցեղասպանության 100-րդ տարելիցին: Իսկ «Ուսանողական» մրցութային ծրագրում մասնակցում են հայ եւ արտասահմանում ապրող ու ստեղծագործող ուսանողները:

«Սոսե» կինոփառատոնը կրում է Հայոց պատմության վառ  անհատականություններից մեկի` Սոսե Մայրիկի անունը: Հայուհի, ով հերոսաբար ապրեց իր կյանքը, թե՛ որպես մայր, թե՛ որպես կին, եւ թե՛ որպես իր ազգի նվիրյալ: Հատկանշական է, որ կինոփառատոնի մեկնարկը տրվեց Արամ Շահբազյանի «Փրկության քարտեզ» վավերագրական ֆիլմով, որը պատմում է 5 միսիոներների մասին, որոնք հայերի հետ 100 տարի առաջ ապրել են Հայոց ցեղասպանության դառնությունը. «Հայուհի ում պարզապես չես կարող համեմատել այսօրվա կնոջ տեսակի հետ, թե որքան ոգի ու կամքի ուժ կար նրա մեջ: Պարզապես ուզում ենք հայուհուն աշխարհը ճանաչի այդ կոնտեքստում, որ հայուհիները եղել են Սոսե մայրիկներ եւ ոչ միայն»,- «Իրավունքի» հետ զրույցում ասաց փառատոնի հիմնադիր նախագահ ՌԻՏԱ ԽԱԼԱԹՅԱՆԸ եւ հավելեց. «Կինոփառատոնի նպատակն է ներկայացնել կնոջը` խոսելով նրա արժանիքների, խնդիրների, նվաճումների, կարողությունների եւ առհասարակ` նրա դերակատարման մասին: Թերեւս սա մի թեմա է, որն անսպառ է բոլոր ժամանակներում»:

Չնայած կինոփառատոնն այդպես էլ չի կարողացել հոգալ արտերկրից  ցուցադրվող ֆիլմերի հեղինակների Հայաստան ժամանելու ծախսերը, բայց ֆիլմերը կցուցադրվեն, իսկ փառատոնի ավարտին լավագույնները կարժանանան «Սոսե» արձանիկի. «Արտերկրից բոլորը ցանկություն հայտնեցին գալու, շատերը նույնիսկ Հայաստանի մասին առաջին անգամ էին լսում, չնայած` փառատոնը չի հոգալու իրենց ծախսերը, բայց որոշ ֆիլմերի հեղինակներ այնուամենայնիվ կգան Հայաստան»:

Ի դեպ, Հայաստանից հաղթող ուսանողի մեկ տարվա ուսման վարձը կհոգա «Սոսե» միջազգային կինոփառատոնը, որի նպատակը տեղի կինոն զարգացնելն է:

ԼԻԼԻԹ ԵՂԻԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝