«ՈՉ ՇԵՆՔ ԵՄ ՏԵՍՆՈՒՄ, ՈՉ ԷԼ՝ ԲՆԱԿԱՐԱՆ»

«ՈՉ ՇԵՆՔ ԵՄ ՏԵՍՆՈՒՄ, ՈՉ ԷԼ՝ ԲՆԱԿԱՐԱՆ»

«Իրավունք» թերթի խմբագրություն էր դիմել թերթի մշտական ընթերցող, Կապան քաղաքի բնակչուհի, զինվորի մայր ՍՈՒՍԱՆՆԱ ԽԱՉԱՏՐՅԱՆԸ: Տիկին Սուսաննան վրդովված եւ միաժամանակ՝ անհույս վիճակում է, քանի որ ինչպես ինքն է ասում. «Գլենդել Հիլզի» ղեկավարության անպատասխանատու գործողությունների պատճառով ես զրկվել եմ սեփական բնակարան ստանալուց (որի արժեքի կեսից ավելին արդեն մուծված է) եւ արդեն երեք տարի է` ապրում եմ վարձով: Իսկ «Գլենդել Հիլզի» սեփականատերերն իմ ու իմ նմանների վճարած գումարների հաշվին օր օրի հարստանում են, իսկ մեզ` քաղաքացիներիս, վարպետորեն յոթ տարի էսօր-էգուց անելով` խաբում են»: Ապա՝ տիկին Սուսաննան պատմեց, թե ինչից է դժգոհ.

2008-թ. մայիսից կառուցապատող ընկերության` «Գլենդել Հիլզի» հետ պայմանագիր եմ կապել՝ բնակարան գնելու նպատակով: Պայմանն այսպես էր՝ մինչեւ 2011թ. նոյեմբերի 30-ը վճարումներն ամեն ամիս պետք է կատարեի, որից հետո պետք է համարվեի բնակարանի սեփականատեր: Հերթականությամբ, առանց ուշացման, 42 ամիս վճարել եմ: Բայց այդ վճարումներից հետո ինձ բնակարան չտրամադրեցին: Այնուհանդերձ՝ ես իմ վճարումները շարունակել եմ: Ավելին, եթե նախորդ 42 ամիսներին վճարում էի ֆիքսված չափով` ամսական 184 հազար դրամ, ապա դրանից հետո վճարում էի 200-300 հազար: Այլ խոսքով՝ վճարել եմ բնակարանիս արժեքի մոտ 63 տոկոսը, բայց բնակարանի երես մինչ օրս չեմ տեսել:
Սահմանված 42 ամիսների գումարը վճարելուց հետո ինձ զանգեցին «Գլենդել Հիլզի» գրասենյակից՝ հրավիրելով իրենց մոտ, թե` ուրախալի լուր ունեն մեզ համար: Հաջորդ օրը գնացի, ասին, որ ինձ հրավիրել են բնակարանի կոսմետիկ վերանորոգման համար համաձայնագիր կնքելու: Համաձայնագրում մասնավորապես առաջարկվում էր ընտրել, թե ինչ գույն պետք է լինի իմ ննջասենյակը, խոհանոցը, լողասենյակում ինչ սալիկներ լինեն, ինչպիսի մանրահատակ եմ նախընտրում, դռները եւ այլն: Մի խոսքով՝ բավական գայթակղող համաձայնագիր էր...
- Իրե՞նք էին ասել, որ շարունակեք վճարումներ կատարել:
- Պայմանագրում նշված էր, որ 42 ամսվա վճարումները կատարելուց հետո, այսինքն բնակարան ստանալուց հետո, իրենց միջնորդությամբ կարող եմ վարկ վերցնել՝ մնացած գումարը մարելու համար: Մտածեցի՝ քանի հնարավորություն ունեմ վճարելու` վճարեմ, որ հետագայում քիչ վարկ վերցնեմ:

ՅՈԹ ՏԱՐԻ ՇԱՐՈՒՆԱԿ` ՆՈՒՅՆ ՊԱՏԱՍԽԱՆԸ. «ԿԼԻՆԻ` ԿՍՏԱՆԱՔ»

- Ե՞րբ է եղել Ձեր վերջին վճարումը:
- Պայմանագրում նշված ժամկետից հետո ես հավելյալ` մինչեւ 2012թ. մայիսը վճարել եմ: Ընդհանուր առմամբ, կրկնեմ, իմ վճարումները կազմել են բնակարանի արժեքի 63 տոկոսի կարգի: Ասեմ, որ բնակարանի ամբողջ արժեքը կազմում էր 18 միլիոն 400 հազար դրամ, որից վճարել եմ 11 միլիոն դրամը: Այսինքն՝ մնացել է մի փոքր մասը, եւ դա էլ կարող եմ հիմա վճարել, բայց նպատակը չեմ տեսնում: Այսպիսով՝ 2012-ից հետո վճարում չեմ կատարել, քանի որ արդեն անիրատեսական էի համարում բնակարան ունենալը: Անընդհատ զանգել եմ, բայց միշտ էլ նույն պատասխանն եմ ստացել` այս ամիս, այն ամիս, եւ այդպես էլ ամիսը դարձավ տարի, տարին` տարիներ: Տղաս ընդունվեց ինստիտուտ, եւ ես տեղափոխվեցի Երեւան, բայց բնակարանի մասին խոսելիս նորից անընդհատ պատասխանում էին. «Կլինի` կստանաք»: Ու այսպես` գրեթե յոթ տարի շարունակ իմ գլխի տակ փափուկ բարձ դնելով՝ ամիս են մեռցնում, բայց ես ոչ շենք եմ տեսնում, ոչ էլ, առավել եւս, բնակարան:
Վերջին անգամ սեպտեմբերի 12-ին հանդիպեցի «Գլենդել Հիլզի» ֆինանսական բաժնի պետ Սասուն Մուրադյանին, ով, ի դեպ, չգիտես ինչու, անընդհատ խուսափում է ինձանից: Ինքն ինձ ասաց, որ հաջորդ ամիս կսկսի աշխատանքները, բայց մինչ օրս ոչ գումար եմ տեսնում, ոչ բնակարան: Որքա՞ն պետք է հանդուրժեմ, այլեւս անհնար է: Ներկա պահին ես չեմ աշխատում, որդիս էլ ծառայում է Հայոց բանակում, չգիտեմ` ոչ մի հուսադրող բան չեմ տեսնում: Ես արդեն դիմել եմ փաստաբանական ընկերության օգնությանը, որը անշահախնդրորեն աջակցում է զինծառայողների ընտանիքներին:
- Ո՞ր փաստաբանական ընկերությանն եք դիմել:
- Օրերս եմ դիմել «Լեւ գրուպ» փաստաբանական գրասենյակի ղեկավարին, ով, ի դեպ, չեմ կարող չնշել, շատ լավ վերաբերմունքով ու սրտացավ անձնավորություն է: Եթե բոլոր ատյաններում նման բարեկիրթ մարդիկ լինեին, վստահ եմ, մենք այս վիճակում չէինք լինի:
Այս պատմության իրավական կողմի հետ կապված` դիմեցինք նաեւ «Լեւ գրուպ» փաստաբանական գրասենյակի ղեկավար ԼԵՎՈՆ ԲԱՂԴԱՍԱՐՅԱՆԻՆ, ով մեզ հետ զրույցում մասնավորապես  նշեց.
- Այո, մեզ դիմել է զինվորի մայր, քաղաքացի Սուսաննա Խաչատրյանը՝ իր իրավունքների խախտման հետ կապված: Քաղաքացու փաստաթղթերի ուսումնասիրությունից պարզ է դառնում հետեյալը. 2008թ. մայիսի 21-ին Ս. Խաչատրյանը կնքել է նախնական պայմանագիր` տվյալ կառուցապատող կազմակերպության հետ եւ ամեն ամիս վճարել է: Արդյունքում՝ վճարել է 10 միլիոն 800 հազար դրամ: Ըստ պայմանագրի՝ դեռեւս 2011-ին պետք է հանձնեին բնակարանը, սակայն չեն հանձնում, եւ մինչեւ 2013թ. նորից համաձայնագիր են կնքել: Մինչդեռ այսօրվա դրությամբ, ըստ դիմումատուի, շենքը կիսակառույց է: Մեր փաստաբանական գրասենյակն արդեն իսկ զբաղվում է վերոհիշյալ խնդրով, եւ օրենքով սահմանված կարգով ընթացք կտանք այս գործին:
Պետք է նշեմ նաեւ, որ կառուցապատողների հետ կապված իրավունքի խախտումները համատարած են:
Դիմեցինք նաեւ «Գլենդել Հիլզի» լրատվության բաժին, որտեղից մեզ խնդրեցին` մեր հարցը գրավոր ուղարկել: Այդպես էլ արեցինք՝ հույսով, որ թեկուզ գրավոր, կստանանք սպառիչ պատասխան:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝