«ՄԵԶԱՆԻՑ ԼԱՎ ՎԻՃԱԿՈՒՄ ՄԻԱՅՆ ԲԵԼԱՌՈՒՍՆ ԷՐ»

«ՄԵԶԱՆԻՑ ԼԱՎ ՎԻՃԱԿՈՒՄ ՄԻԱՅՆ ԲԵԼԱՌՈՒՍՆ ԷՐ»

«Բաթումի գնացքը հոկտեմբերի 2-ից դադարեցրել է իր այս տարվա գործունեության ամառային սեզոնը»,- այս մասին երեկ հայտարարեց «Հարավկովկասյան երկաթուղի» ՓԲԸ  ուղեւորափոխադրումների տնօրինության պետ ԳԱԳԻԿ ՀՈՎՀԱՆՆԻՍՅԱՆԸ` հավելելով. «Հոկտեմբերի 2-ից արդեն աշխատում է միջազգային Երեւան-Թբիլիսի-Երեւան գնացքը»: Սրա հետ մեկտեղ` պարոն Հովհաննիսյանը ամփոփեց Երեւան-Բաթումի երթուղու այս տարվա արդյունքները` արձանագրելով.

–Արդյունքները մեզ չեն բավարարում, որովհետեւ ուղեւորահոսքերը` անցած տարվա համեմատ, նվազել են 25 տոկոսի չափով: Եթե 2014 թվականի նույն ժամանակահատվածում ունեինք մոտ 45 հազար ուղեւոր, ապա այս տարի ուղեւորների թիվը մոտ 34 հազար է:
– Ինչո՞վ եք պայմանավորում ուղեւորահոսքերի նվազումը:
– Իմ կարծիքով` ուղեւորահոսքերի նվազումը պայմանավորված է առաջին հերթին ժողովրդի գնողունակությամբ, տնտեսական վիճակով, դրամի արժեզրկմամբ, այսինքն` շվեյցարական ֆրանկի փոխարժեքի բարձրացմամբ ¥այդ արժույթով են իրականացվում երկաթուղային փոխադրումների սակագնային հաշվարկները- հեղ.¤, որի հետեւանքով 12 տոկոսով թանկացել էր գնացքի տոմսի արժեքը: Եթե անցած տարի միջին հաշվով տոմսի արժեքը 13 հազար դրամ էր, այս տարի այն 14,5 հազար էր: Չնայած պետք է նշեմ, որ խնդիրն այդքան գնի թանկացումը չի, որքան որ ժողովրդի գնողունակության անկումը: Եթե անցյալ տարի միջինը ութ վագոնով էր գնացքը աշխատում, այս տարի միջինը յոթ վագոն էր: Անցյալ տարի միջինը քսանյոթ ուղեւոր ունեինք, այս տարի` քսաներեք:
Բայց նաեւ ասեմ, որ մեր այս վիճակը, հարաբերականորեն, շատ վատ չէ. սեպտեմբերին Վիլնյուսում մասնակցեցի նախկին ԽՍՀՄ բոլոր երկրների ուղեւորափոխադրումների տնօրենների խորհրդակցությանը: Մեզանից լավ վիճակում միայն Բելառուսն էր, որտեղ ուղեւորահոսքերը պակասել էր 15 տոկոսով: Իսկ օրինակ ՌԴ-ում այս տարի ուղեւորահոսքերը պակասել են 36 տոկոսով, նույնիսկ Էստոնիայում, որ Եվրամիության անդամ է` պակասել էր 70 տոկոսով:
– Իսկ իրենք ինչո՞վ էին նման անկումները պայմանավորում:
– Նույնը` ժողովուրդը փող չունի եւ քիչ է տեղաշարժվում, ահավոր պակասել են հոսքերը Ուկրաինայում, Ադրբեջանում նվազել է 45 տոկոսով: Բոլորը հիմնական պատճառ էին ներկայացնում գնողունակության անկումը` ժողովրդի փող չունենալով:  
– Ունե՞ք տվյալներ` ավտոտրանսպորտով նույն` Բաթումիի ուղղությամբ գնացող ուղեւորների հոսքը եւս պակասե՞լ է:
– Ավտոտրանսպորտով` կոնկրետ Բաթումիի ուղղությամբ, վիճակագրություն չի վարվում, քանի որ հաշվարկներն արվում են սահմանային անցակետերում, որը չի կարող բնութագրել, թե սահմանը հատող անձը գնում է Բաթումի՞, թե մեկ այլ ուղղությամբ:
Ամեն դեպքում` մենք կաշխատենք եւ, կարծում եմ, կհասնենք նրան, որ գնացքի տոմսերի գները մյուս տարի ավելի ցածր լինեն: Մենք երբ սկսեցինք նորմալ վագոններով սպասարկումը, այսինքն` 2011 թվականին, շվեյցարական ֆրանկն արժեր 410 դրամ, հիմա 510 է: Իսկ մենք հաշվարկը կատարում ենք ֆրանկով, եւ ստացվում է, որ տոմսի արժեքը միջինը 36-46 ֆրանկ է: Այլ կերպ ասած` միակ խնդիրը գների կարգավորումն է, թե չէ` տեխնիկական վիճակի, անվտանգության առումով որեւէ խնդիր չունենք:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝