«ԺԱՌԱՆԳՈՒԹՅԱՆ» ՓՈԽՆԱԽԱԳԱՀ. «ՈՉ ԹԵ «ՄԱՅԴԱՆ» ԵՆՔ ԱՆԵԼՈՒ, ԱՅԼ ԱԶԱՏՈՒԹՅԱՆ ՀՐԱՊԱՐԱԿ»

«ԺԱՌԱՆԳՈՒԹՅԱՆ» ՓՈԽՆԱԽԱԳԱՀ. «ՈՉ ԹԵ

«ՄԱՅԴԱՆ» ԵՆՔ ԱՆԵԼՈՒ, ԱՅԼ ԱԶԱՏՈՒԹՅԱՆ

ՀՐԱՊԱՐԱԿ»

Հոկտեմբերի երկուսին Ազատության հրապարակում տեղի ունեցավ «Չեք անցկացնի» քաղաքացիական նախաձեռնության հանրահավաքն ընդդեմ սահմանադրական բարեփոխումների:  Հանրահավաքին մասնակցող «Ժառանգության» փոխնախագահ Արմեն Մարտիրոսյանն իր ելույթում արձանագրեց հանրահավաքի բազմամարդ չլինելը:

«Իրավունքն» այսօր պրն Մարտիրոսյանից պարզեց` չի կարծում նա, որ հանրությանը կարծես չեն հետաքրքրում սահմանադրական բարեփոխումները, թե' «այո»-ի, թե' «ոչ»-ի տարատեսակ ճակատները: Հետեւաբար, ինչի վրա է «Նոր Հայաստան» հանրային փրկության ճակատի հույսը, որ  նա կհասնի հաջողության ընդդեմ սահմանադրական բարեփոխումների: «Շատ ճիշտ եք: Հասարակությանը շատ քիչ են հետաքրքրում սահմանադրական բարեփոխումները, որովհետեւ գիտեն` սահմանադրական բարեփոխումների պատճառով չեն հայտնվել այս վիճակում»,- ասաց   կուսակցության փոխնախագահը:

- Հասարակությունն անգամ «Չեք անցկացնի» քաղաքացիական նախաձեռնությամբ էլ չի հետաքրքրվում...

- Չէ, համաձայն չեմ, քանի որ երիտասարդները բավական ակտիվ աշխատում են: Հասարակությանը չհետաքրքրելով սահմանադրական բարեփոխումները, ցանկանում են արմատական փոփոխություններ, որոնք պետք է սկսվեն իշխանափոխությունից:

-Եթե «Ոչ»-ի ճակատն այդքան հզոր լիներ, չե՞ք կարծում, որ հանրությունը  կհամախմբվեր դրա շուրջ:

-Երեւի նկատի ունեք «Չեք անցկացնի» նախաձեռնությունը…

- Նկատի ունեմ բոլոր ճակատներն ընդդեմ սահմանադրական բարեփոխումների:

- Ձեր ասածի մեջ մի փոքր տրամաբանական ճշմարտություն կա, բայց ոչ ամբողջական: Քաղաքացին դուրս է գալիս պայքարի, երբ տեսնում է միասնություն ու հստակ  ուղերձ, որն իրեն պետք է բավարարի:

- Այս տարվա փետրվարին «Եռյակի» պառակտումը  ցույց տվեց, որ ցանկացած քաղաքական ուժ հաջողության  հասնելու համար պետք է ունենա  ֆինանսական հզոր աջակցություն: «Ով է հովանավորելու «Նոր Հայաստան» հանրային փրկության ճակատին «Ոչ»-ի հանրահավաքներն անցկացնելու համար:

- Ես կարծում եմ, որ քաղաքացիական անհնազանդությունը, ի տարբերություն ընտրակաշառքների բաժանման, ֆինանսական մեծ ներդրումների կարիք չունի:

- Բայց գնալ մարզեր,  շտաբեր հիմնել` այս ամենն անելու համար գումարներ են պետք:

- Դա այնքան քիչ գումար է, որ մեկ ընտրակաշառքով կարող ես գնալ-գալ:

- Այսինքն`  սահմանադրական բարեփոխումների դեմ ձեւավորված ճակատի անդամներն իրենց գրպանից են  հոգալու այդ ծախսերը:

- Ես մինչեւ հիմա կուսակցական գործունեությամբ զբաղվում եմ իմ միջոցներով:

- Իսկ մյուսները:

- Մյուսներն էլ:

- Քաղաքացիական անհնազանդության մասին խոսեցիք թե՛ Դուք, թե՛ Ժիրայր Սեֆիլյանը: Հայաստանում «Մայդա՞ն» եք ցանկանում անել:

- Ոչ, Ազատության հրապարակ: Մենք բացառապես խաղաղ միջոցներից ենք օգտվելու եւ -գործելու ենք օրինականության սահմաններում:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝