«ԹԱՐԳՄԱՆՉԱՑ ՏՈՆԸ ԲՈԼՈՐԻՍ ԻՆՔՆՈՒԹՅԱՆ ՏՈՆՆ Է»
Արխիվ 12-16
«ԹԱՐԳՄԱՆՉԱՑ ՏՈՆԸ ԲՈԼՈՐԻՍ ԻՆՔՆՈՒԹՅԱՆ ՏՈՆՆ Է»
Հոկտեմբերի 10-ին Օշականի Սուրբ Մեսրոպ Մաշտոց եկեղեցում կատարվեց Սուրբ եւ Անմահ Պատարագ`նվիրված Սրբոց Թարգմանչաց տոնին: Պատարագի ընթացքում Մեսրոպ Մաշտոցի անվան Մատենադարանից Օշականի եկեղեցի բերվեց երկու հարյուր տարուց ավելի Աշտարակի սրբություն հանդիսացող, Ս. Ամենափրկիչ եւ Ս. Կարմրավոր եկեղեցիներում երկար ժամանակ հանգրվանած Շուխոնց հրաշագործ Ավետարանը: Ի դեպ, Ս. Պատարագին հարյուրավոր հավատացյալների հետ միասին ներկա էին մարզային եւ Օշական համայնքի պաշտոնյաները, ինչպես նաեւ ՀՀ Գրողների միության ականավոր գործիչներ` ԳՄ նախագահ ԷԴՈՒԱՐԴ ՄԻԼԻՏՈՆՅԱՆԻ գլխավորությամբ, որոնք նախ ծաղիկներ դրեցին Ս. Մ. Մաշտոցի շիրիմին, ապա անցկացրեցին «Կանթեղ» մրցանակաբաշխությունը:
«ՍՈՒՐԲ ԳՐՔԻ ԹԱՐԳՄԱՆՈՒԹՅԱՄԲ ԿԱՐՈՂԱՑԵԼ ԵՆ ՄԵԶ ԿՅԱՆՔԻ ԱՄԵՆԱԿԱՐԵՎՈՐ ԳԻՐՔԸ ՓՈԽԱՆՑԵԼ»
Այս մասին «Իրավունքի» հետ զրույցում Արագածոտնի թեմի դիվանապետ Արժանապատիվ Տ. ԳԱՐԵԳԻՆ քահանա ԱՐՍԵՆՅԱՆԸ նշեց. «Ամեն տարի Թարգմանչաց տոնին` Սուրբ Մեսրոպ Մաշտոց դպրատանը` Մայր Աթոռ Սուրբ Էջմիածնի օրհնությամբ` իրականացվում է «Կանթեղ» մրցանակաբաշխությունը: Գրողների միության անդամներին ընդունում ենք այստեղ, ովքեր մինչ միջոցառման սկիզբը ծաղիկներ են դնում Սուրբ Մեսրոպ Մաշտոցի շիրիմին, մասնակցում են Սուրբ Պատարագին, ապա տեղի է ունենում գրական միջոցառումը»:
Վերադառնալով օրվա խորհրդին` Տեր հայրը շեշտեց. «Թարգմանչաց տոնը բոլորիս ինքնության տոնն է: Թարգմանիչներն են, որ Սուրբ գրքի թարգմանությամբ կարողացել են մեզ կյանքի ամենակարեւոր գիրքը փոխանցել, որը կարդալով ապրում ենք եւ ամեն անգամ նորովի կարողանում մեր հավատքի մեջ խորանալ եւ միանալ մեր Տիրոջը: Թարգմանչաց տոնը կարեւոր է բոլորիս համար, այն գրքի, մտքի օր է: Ամեն մեկն էլ այդ օրը պետք է իր աղոթքն անի, որպեսզի Աստված նրա միտքն արթուն պահի եւ իմաստությունը` հաստատուն»:
ԱՄԲՈՂՋ ՕՇԱԿԱՆ ԳՅՈՒՂԸ ՇՆՉՈՒՄ ԷՐ ՄԱՇՏՈՑՅԱՆ ՈԳՈՎ
Իսկ ՀՀ Գրողների միության նախագահ ԷԴՈՒԱՐԴ ՄԻԼԻՏՈՆՅԱՆԸ խոսելով Թարգմանչաց տոնի մասին` ասաց. «Դարեր ի վեր մեր հայրենիքում Թարգմանչաց տոնը եղել է Առաքելական Սուրբ եկեղեցու ամենափառավոր տոներից մեկը: Այսօր մենք տեսանք, թե ինչքան մարդ է եկել եկեղեցի` մասնակցելու Սուրբ Պատարագին: Ամբողջ Օշական գյուղը շնչում էր հենց այդ ոգով: Մեր Սուրբ գրքի թարգմանիչները դարերի մեջ պանծացվել են, սրբացվել եւ, իհարկե, գրքի թարգմանությունը չի դիտվել զուտ թարգմանական արվեստի ոգի, այլ սրբալույս լույսը մեր ժողովրդի մեջ տարածելու գրի միջոցով, մեր ժողովրդի ոգին ավելի ամրացնելու եւ ժամանակների մեջ դիմանալու ամեն մի արհավիրքի, ինչպես նաեւ ծառայելու բարությանը, Աստծո լույսի տարածմանը»:
Հավելենք, որ այս տարի թարգմանական արվեստում զգալի ներդրում ունենալու համար «Կանթեղ» մրցանակի արժանացան եւ փոքրիկ դրամական պարգեւներով գնահատվեցին թիֆլիսաբնակ բանաստեղծուհի, թարգմանիչ, հրապարակախոս, Վրաստանի գրողների միության «Կամուրջ» հայալեզու տարեգրքի խմբագիր ԱՆԱՀԻՏ ԲՈՍՏԱՆՋՅԱՆԸ, բանաստեղծ-թարգմանիչներ ԿԱՐԻՆԵ ԽԱԼԱԹՅԱՆԸ, ՀՐԱՉՅԱ ՍԱՐՈՒԽԱՆԸ, ԳԵՈՐԳԻ ԿՈՒԲԱՏՅԱՆԸ:
ՀՐԱՆՏ ՍԱՐԱՖՅԱՆ
Բաժանորդագրվե՛ք https://t.me/iravunk
1
18507 դիտում
2
11159 դիտում
3
1581 դիտում
4
1542 դիտում
5
1486 դիտում
2
17649 դիտում
4
8043 դիտում
5
4100 դիտում
4
8276 դիտում
