Զարմացած

Սահմանադրությանը «ոչ» ասողների ճամբարում զարմանալի, ապշեցուցիչ զավեշտ է տիրում: Բանը հասել է նրան, որ ՊԱՐՈՒՅՐ ՀԱՅՐԻԿՅԱՆԸ վերջնագիր-ուղերձ է ուղարկել Սերժ Սարգսյանին` պահանջելով հանրաքվեի չդնել ԱԺ-ի կողմից հաստատված նախագիծը. «Նախագահը պիտի հասկանա, որ ինքը պատմական պատասխանատվություն է կրում, եւ իրեն ուղի եմ ցույց տալիս, թե ինչպես կարող է ինքը խուսափել իր իսկ սկսած սխալ գործընթացից: Ինքը դեռ կարող է կասեցնել հակասահմանադրական ապօրինի գործընթացը»,- հայտարարել է նա: Իր պահանջը չկատարելու դեպքում Հայրիկյանն իրավապահներին է դիմելու` Սերժ Սարգսյանի դեմ քրեական գործ հարուցելու պահանջով:

Նույն Սահմանադրության թեմայով էլ խորհրդարանում հաջողացրել են գաստրոլներ տալ եւ խորհրդարանական ընդդիմադիրները: Ի վերջո, ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆԸ հարկադրված եղավ անդրադառնալ ե՛ւ Զարուհի Փոստանջյանի կրակոտ ելույթին, ե՛ւ Լյովիկ Զուրաբյանի պնդմանը, թե Հանրային հեռուստատեսությունը հանրությանն իդիոտացնելու առաքելություն ունի. «Իդիոտ բառի հայերեն հոմանիշը հայերեն «ապուշն» է, որը բաղկացած է «ապ» ժխտական նախածանցից եւ «ուշ» արմատից, նշանակում է «անուշադիր»: Ցավում եմ, որ մեր ընդդիմադիր գործընկերները Հանրային հեռուստատեսությունը լավ չեն ունկնդրում, որովհետեւ հանրապետական գործիչները հաճախ բողոքում են, որ Հանրայինով ավելի շատ լուսաբանում են ընդդիմադիրներին, իսկ իրենց` վատ: Ես իրենց ասում եմ` դուք պիտի դրանից լավ զգաք, որովհետեւ մեր գործն իրենք են անում»: Իսկ Զարուհի Փոստանջյանն արդեն նաեւ նոր պատվավոր տիտղոս ստացավ. «Քիչ առաջ ելույթ էր ունենում մենաստանի տիրուհին, եւ այդ ելույթն ամբողջությամբ նվիրված էր բարեփոխումներին: Մենք բոլորս ցանկանում ենք, որ այդ ելույթը ցուցադրվի Հանրայինով: Որ հանրությունը տեսնի, թե ում է ուղարկում Ազգային ժողով»:
Իսկ «Լուսավոր Հայաստան» անունով կուսակցություն ստեղծած ԷԴՄՈՆ ՄԱՐՈՒՔՅԱՆՆ էլ ամբողջովին տարվել է լուսավորչական տենդով, սակայն զարմանալիորեն որոշել է պայքարել մի պետության դեմ, որն արդեն 24 տարի է չկա` ընդդեմ ԽՍՀՄ-ի. «Լուսավորականության հիմնարար գաղափարները` ազատությունը, հավասարությունը, մարդու իրավունքներն ու արժանապատվությունը, քաղաքացիական արժեքները, քննադատական միտքը, մասնավոր սեփականության իրավունքը, ներկայացուցչական ժողովրդավարությունը եւ այլն, չտարածվեցին Հայաստանում եւ չարմատացան հայ քաղաքական մտքի մեջ, քանի որ մենք չունեինք անկախ պետություն եւ քաղաքական միտք: Ավելի ուշ` Խորհրդային Հայաստանում եւս, այս գաղափարները մնացին անտեսված, որովհետեւ Խորհրդային Միության մեջ, որը ավտորիտար-բռնապետական պետություն էր, չէին կարող տարածվել լուսավորության ազատական գաղափարները: 1991թ. անկախացումից հետո, ՀՀ քաղաքական ղեկավարությունը արտաքուստ ընդունեց եվրոպական առաջադեմ արժեքներն ու գաղափարները, դրանք ամրագրեց սահմանադրության եւ օրենքների մեջ: Բայց քանի որ նրանք խորհրդային ավտորիտար մտածողության եւ դաստիարակության կրողներն էին, այդ գաղափարները չկարողացան կիրառել պրակտիկ քաղաքականության մեջ եւ Հայաստանը դարձրին եվրոպական օրենքներով կիսաավտորիտար պետություն»: Դե ինչ, զարմանքով պետք է արձանագրենք, որ քաղաքական այրերի մի մասը գնալով ավելի ու ավելի է հակվում հողմաղացների դեմ կռիվների:
Իսկ դրսերում զարմանալի դրսեւորում է ստանում Ռուսաստանի եւ Արեւմուտքի միջեւ ՏԵՂԵԿԱՏՎԱԿԱՆ ՊԱՏԵՐԱԶՄԸ:  Միաժամանակ հայտնվել են երկու կեղծ լուր, մեկը` իբր սենատոր Ջոն Մակքեյնին եւ հարյուր ամերիկացի զինվորներին տեղափոխող օդանավը Թուրքիայի տարածքում գտնվող Ինջիրլիկ ռազմահենակետից ոչ հեռու խփվել է «Իսլամական պետության» տեռորիստների կողմից, իսկ մյուսը` իբր Կասպից ծովից արձակած ռուսական հրթիռների մի մասը ընկել են Իրանի տարածքում: Բայց եթե ռուսները Մակքեյնի մասին կեղծ լուրը դրել են անլուրջ կայքում, որը մասնագիտանում է լուրջ տեսքով կատակներ անելու գործում, ապա ռուսական հրթիռների մասին սուտը ամերիկացիները զարմանալիորեն տարածել են լուրջ լրատվամիջոցով` CNN-ով: Դե ինչ, ճիշտ է ասված, որ ամենամեծ ապուշությունները մշտապես տարածվում են դեմքի ամենալուրջ արտահայտությամբ:

Զարմացած է  
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝