«ՏՐԱՄԱԲԱՆԱԿԱՆ ԷՐ ԱԲՈՎՅԱՆԻ ԹԱՏՐՈՆԻՆ ԿԱՐԳԱՎԻՃԱԿ ՏԱԼԸ»

«ՏՐԱՄԱԲԱՆԱԿԱՆ ԷՐ ԱԲՈՎՅԱՆԻ ԹԱՏՐՈՆԻՆ ԿԱՐԳԱՎԻՃԱԿ ՏԱԼԸ»

1963 թվականին հիմնադրված Աբովյան քաղաքի տոնը, որը 2000 թվականից նշվում է հոկտեմբերի կեսերին, այս տարի մեկնարկեց թատերական փառատոնով, որի շրջանակներում կցուցադրվեն տասը ներկայացում` Երեւանի եւ Աբովյանի թատրոնների մասնակցությամբ:

Փառատոնի հանդիսավոր բացումն ազդարարվեց Աբովյանի թատրոնին կից հրապարակում` Երեւանի մնջախաղի պետական թատրոնի դերասանների էտյուդներով, որից հետո, արդեն դահլիճում, փառատոնի հանդիսականը հնարավորություն ունեցավ դիտելու Գ. Սունդուկյանի անվան ազգային ակադեմիական թատրոնի` Գուրգեն Խանջյանի «Որբերը» ներկայացումը:
Բացման խոսքում ՀԹԳՄ նախագահ ՀԱԿՈԲ ՂԱԶԱՆՉՅԱՆՆ ասաց, որ Աբովյանի փառատոնն առանձնահատուկ է եւ տարբերվում է մինչ այժմ եղած թատերական փառատոներից, քանի որ նախաձեռնողը ոչ թե մնացած բոլոր դեպքերի նման, Միությունն է եղել, այլ Աբովյանի քաղաքապետարանը: ՀԹԳՄ նախագահն իր խոսքում ասաց, որ Աբովյանի թատրոնն արդեն մեկ տարի է, ինչ պետական կարգավիճակ ունի. «Ուրախ եմ, որ Աբովյան քաղաքի թատրոնում աշխատում են Արմեն Կարապետյանի եւ Աշոտ Չտչյանի ու նրանց համախոհների պես թատրոնին անմնացորդ նվիրված մարդիկ, եւ միանգամայն տրամաբանական էր Աբովյանի թատրոնին կարգավիճակ տալը»:
Հ. Ղազանչյանն ընդգծեց, որ թատրոնն այն ոլորտներից է, որտեղ երբեք ոչինչ հեշտ չի լինում. «Միշտ էլ կան ֆինանսական խնդիրներ... Դերասանները, բեմադրիչները դժվար են ապրում, յուրովի տառապանքով են անում իրենց գործը, բայց նրանք ունեն մի մեծ առավելություն` սիրում են իրենց գործը, իսկ սերը թատրոնի հանդեպ շատ ավելի մեծ է, քան մնացած բոլոր պայմանները»:
Խոսելով հանդիսականի մասին` Հ. Ղազանչյանը համոզված նշեց, որ փառատոնի օրերին լեփ-լեցուն դահլիճներ կլինեն. «Ինչն էլ խթան կհանդիսանա, որպեսզի աբովյանցիները, մեզ հետ միասին, կապվեն իրենց թատրոնին ու ներկայացումներին: Լավ հանդիսականն անդավաճան հանդիսականն է… Միշտ գալիս է թատրոն, լավին լավ է ասում, վատին` վատ ու դրանով իսկ պահպանում թատրոնի ապագան»,- ընդգծեց Հ. Ղազանչյանը:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝