«ՉԵՐԻԻ» ՎԱՀԱՆԸ ԵՎՍ ԴԵ՞Մ Է ՆՈՐ ՍԱՀՄԱՆԱԴՐՈՒԹՅԱՆԸ

«ՉԵՐԻԻ» ՎԱՀԱՆԸ ԵՎՍ ԴԵ՞Մ Է

ՆՈՐ ՍԱՀՄԱՆԱԴՐՈՒԹՅԱՆԸ

«Իրավունքը» երեկ գրել էր, որ ԲՀԿ պատգամավոր Ստեփան Մարգարյանի տեղեկացմամբ   ԲՀԿ-ում տարբեր կարծիքներ կան սահմանադրության վերաբերյալ: ԲՀԿ գործարար պատգամավոր Վահան Կարապետյանից «Իրավունքը» հետաքրքրվեց` ճիշտ են այն լուրերը, որ ԲՀԿ խմբակցությունում  տարաձայնություններ կան սահմանադրության նոր նախագծի վերաբերյալ: «Դե մարդ կա դեմ է, մարդ կա` կողմ»,- ասաց պատգամավորը:

- Դուք ինչ դիրքորոշում ունեք նոր սահմանադրության վերաբերյալ:

- Ճիշտն ասած` ես երեք  բան եմ կարեւորում`աշխատատեղերի հիմնում ու տնտեսության ստեղծում, սահմանների ամրացում, արտագաղթի խնդիրը: Տվյալ սահմանադրության մեջ այս երեք խնդիրներից ոչ մեկն էլ չի լուծվում, հետեւաբար այդքան էլ չեմ կարեւորում նոր սահմանադրությունը:

- Փաստորեն, Դուք դիտավորյալ խորհրդարան չէի՞ք եկել  սահմանադրության նոր տեքստի քվեարկության օրը:

- Չէ, հիվանդ էի, դրա համար չեմ եկել:

- Իսկ եթե գայիք, ինչպե՞ս քվեարկեիք:

- Դե որ գայի, կերեւար:

Հիշեցնենք, որ Վահան Կարապետյանը քվեարկության օրը խորհրդարանում չի եղել, սակայն նրա փոխարեն մեկ այլ պատգամավոր  գրանցվել է: «Իրավունք»-ին տված  հարցազրույցում պատգամավորն ասել է, որ իր համար վիրավորական է այդ քայլը: Իսկ թե ով է վիրավորել ԲՀԿ-ականին, դեռ հայտնի չէ:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝