«ՎԵՐՋԻՆ ՏԱՐԻՆԵՐԻՆ «ԲԵՆԶԻՆԻՍՏՆԵՐԻ» ԱՃ Է ՆԿԱՏՎԵԼ»

«ՎԵՐՋԻՆ ՏԱՐԻՆԵՐԻՆ «ԲԵՆԶԻՆԻՍՏՆԵՐԻ» ԱՃ Է ՆԿԱՏՎԵԼ»

Այն, որ թմրամոլությունը մեր երկրում ունի մտահոգիչ ծավալներ, եւ այդ պատկերը թուլանալու նշաններ չի ցուցաբերում, հայտնի բան է: Դա դեռ քիչ էր՝ վերջին ժամանակներս էլ «մոդայի» մեջ մտավ այսպես ասած՝ սփայսը՝ սկսելով արագորեն դիրքեր զբաղեցնել մեզ մոտ եւս: Մինչդեռ այդ վտանգավոր թմրամիջոցի հետ կապված մեզ մոտ էլ կա այն խնդիրը, որ սփայսը պաշտոնապես թմրամիջոցներ շարքում դասելու հարցում կան բավականին լուրջ խնդիրներ: Թե Հայաստանում որտե՞ղ եւ ո՞ր թմրամիջոցներն են առավել տարածված, թմրամոլների տարիքային ի՞նչ միտում է նկատվում, ի՞նչ թիվ են կազմում Հայաստանում կին թմրամոլները, փորձեցինք պարզել  ՀՀ Ոստիկանության կազմակերպված հանցավորության դեմ պայքարի գլխավոր վարչության թմրանյութերի անօրինական շրջանառության դեմ պայքարի վարչության օպերատիվ տեղեկատվության բաժանմունքի պետ, Ոստիկանության փոխգնդապետ ՎԱՉԵ ՀՈՎՍԵՓՅԱՆԻՑ:

Հայաստանում շարունակվում է հիմնական տարածված թմրամիջոցը համարվել կանեփից ստացվող թմրամիջոցները, մասնավորապես՝ մարիխուանան: Վերջին տարիների ընթացքում Հայաստան են ներթափանցել նաեւ, այսպես ասած, համաշխարհային թմրաբիզնեսի նոր սերնդի «դիզայներական» թմրամիջոցները` սփայսը, որը վերջին շրջանում տարածվել է ողջ աշխարհում: Սփայս անվանումը թարգմանաբար նշանակում է  ծխախառնուրդի համեմունք, որի շրջանառությունը ի սկզբանե եղել է օրինական եւ նախատեսված է եղել որպես բուրումնահոտ ծխեցնելու համար: Սակայն իրականում այն հանդիսանում է սինթետիկ թմրամիջոց` այդտեղից բխող բոլոր հետեւանքներով (կարող է մինչեւ իսկ մահացու հետեւանք առաջացնել): Սրա վտանգավորությունը նաեւ այն է, որ էժան է ու մատչելի: Բարեբախտաբար՝ սփայսը այդքան էլ տարածում չունի մեզ մոտ, քանի որ ակտիվ պայքար է տարվում այդ թմրամիջոցի դեմ: Նաեւ աշխատանքներ են տարվում տվյալ թմրամիջոցը արգելված թմրամիջոցների ցուցակում ներառելու համար: Սփայսի առանձնահատկությունը նրանում է, որ քիմիական բաղադրությունը հեշտությամբ փոխվում է, եւ ամբողջ աշխարհը կանգնած այդ խնդրի առաջ, քանի որ չի հաջողվում դեռեւս տվյալ թմրամիջոցը ներառել արգելված թմրամիջոցների ցուցակում:
- Ի՞նչ կասեք դեզոմորֆինի՝ բենզինային հիմքով թմրամիջոցի տարածման մասին: Ի՞նչ միտում ունի տարածվածության առումով այդ թմրամիջոցը:
- Վերջին մի քանի տարիներին Հայաստանում լայն տարածում է ստացել է դեզոմորֆին տեսակի թմրամիջոցը, քանի որ այն համեմատաբար մատչելի է: Այո, վերջին մի քանի տարիներին դեզոմորֆին օգտագործողների կամ, այսպես ասած, «բենզինիստների» որոշակի աճ է նկատվել: Նկատվում է նաեւ սուբուտեքստ տեսակի թմրանյութի օգտագործման աճ, որը հիմնականում Հայաստան է ներթափանցում է Ֆրանսիայից` փոստային առաքումների միջոցով: Հայաստան` Իրանի Իսլամական Հանրապետությունից ներմուծվում են նաեւ ափիոն եւ մետամֆետամին տեսակի թմրամիջոցները, որոնցից մետամֆետամինի շատ քիչ քանակություն է այստեղ օգտագործվում. այս թմրամիջոցները հիմնականում նախատեսված է տրանզիտ ճանապարհով այլ երկրներ տեղափոխելու համար:
Այո, այդ ժամանակակից թմրամիջոցները մեր երկրում թեեւ կան, սակայն մեկ անգամ եւս կրկնեմ՝ Հայաստանում թմրամոլները հիմնականում օգտագործում են տեղական թմրամիջոցը՝ կանեփը:
- Աշխարհագրական առումով, հատկապես Հայաստանի ո՞ր մասերում եւ ո՞ր թմրամիջոցն է առավել տարածված:
- Բնականաբար՝ թմրամիջոցների տարածվածության առումով առաջինը Երեւանն է: Դեզոմորֆինը օգտագործողների առումով թիրախային է Շիրակը, Լոռին եւ Սյունիքը, իսկ մարիխուանա տեսակի թմրամիջոցի տարածվածություն կա հատկապես Արարատի եւ Արմավիրի մարզերում:
Հայաստանում հիմնականում թմրանյութ օգտագործում են 35-ից բարձր տարիք ունեցող անձինք: Երիտասարդների շրջանում թմրանյութ օգտագործողների թիվը քիչ է, առավել եւս՝ անչափահասների մոտ: 2015 թվականի վեց ամսվա դրությամբ ընդամենը 6 անչափահասի օրգանիզմում է հայտնաբերվել թմրանյութի` մարիխուանայի առկայություն: Կին թմարամոլների շրջանում նույնպես չէի ասի, որ աճ կա, բայց կանանց օրգանիզմում եւս երբեմն հայտնաբերվում է մարիխուանա տեսակի թմրամիջոցի առկայություն:
- Պարոն Հովսեփյան, այս տարվա ընթացքում որքա՞ն անձինք են հասցրել թմրանյութի հետ կապված հանցագործությունների համար քրեական պատասխանատվության ենթարկվել:
- 2015 թվականի վեց ամիսների ընթացքում թմրամիջոցների ապօրինի շրջանառության հետ կապված տարբեր քրեական պատասխանատվության են ենթարկվել 240 անձինք, որոնցից 9-ը կանայք են, 1-ը՝ անչափահաս, եւ 17-ը՝ օտարերկրացի:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝