ՀԵՂԻՆԵ ԲԻՇԱՐՅԱՆ. «ԵՍ «ՈՉ»- Ի ՃԱԿԱՏ ՉԵՄ ՏԵՍՆՈՒՄ»

ՀԵՂԻՆԵ ԲԻՇԱՐՅԱՆ. «ԵՍ «ՈՉ»- Ի ՃԱԿԱՏ ՉԵՄ ՏԵՍՆՈՒՄ»

Լրագրողներն այսօր  ՕԵԿ խմբակցության ղեկավար Հեղինե Բիշարյանից հետաքրքրվեցին` ինչու նա եւ Իշխան Խաչատրյանը դեմ քվեարկեցին Սահմանադրության նոր նախագծին, իսկ Հովհաննես Մարգարյանը, Մհեր Շահգելդյանն ու Լեւոն Դոլոխյանը` ձեռնպահ: «Քսան րոպե ընդմիջում վերցնելուց առաջ մենք բազմաթիվ առաջարկություններ ենք  արել, որոնցից մի մասն ընդունվել է մի քանիսը` ոչ: Քանի որ ամբողջությամբ մեր առաջարկները չեն ընդունվել, մենք չենք կարող կողմ լինել փոփոխությանը: Բայց բարոյական չի լինի նաեւ, որ մեր առաջարկների մի մասի ընդունման պատճառով դեմ քվեարկենք:  Խմբակցությունով   քննարկեցինք ու որոշեցինք` ազատ թողնել քվեարկությունը»,- արդարացավ խմբակցության ղեկավարը:

Հնարավո՞ր է ՕԵԿ-ը միանա «Ոչ»-ի  ճակատին: Հեղինե Բիշարյանի խոսքով` ինքը  «Ոչ»-ի ճակատ չի տեսնում: «Ես ընդհանրապես ոչ մի ճակատ էլ չեմ տեսնում: Ոչ «այո»-ի, ոչ «ոչ»-ի  լրջագույն ճակատներ չեմ տեսնում: «Հիմա կտեսնենք` ինչ գործընթաց  կլինի, դրանից կախված էլ պարզ կլինի մեր հետագա մարտավարությունը: Երկրորդ` մեր շուրջ են հավաքվել  մոտ 130 հասարակական-քաղաքական ուժ,  որն արդեն լրջագույն ճակատ է»

«Իրավունք»-ի հարցին` ՕԵԿ ղեկավար Արթուր Բաղդասարյանը նախապես տեղյակ՞ էր, թե ինչպես է քվեարկելու խմբակցությունը, տիկին Բիշարյանի խոսքով` խմբակցությունն ներկայացրել է Արթուր Բաղդասարյանին իր առաջարկը, որին նա դեմ չի եղել:

Տիկին Բիշարյան, «Հայկական վերածնունդ» կազմակերպությունում ընդգրկված «Հայոց Հայրենիք» կուսակցության ղեկավար Անահիտ Եղոյանը հայտարարել էր, որ ՀՀ-ն չունի ընտրված իշխանություն, չընտրված երկրի ղեկավար: ՕԵԿ-ն ընդունո՞ւմ է այդ հայտարարությունը:

- «Հայոց Հայրենիք» կուսակցության նախագահն իր տեսակետի մասին է խոսել: Մենք ոչ մի քաղաքական ուժի կամ քաղաքական ուժի ղեկավարի չենք արգելել ու արգելում, որ նա  իր կարծիքը հայտնի: Դա «Հայկական վերածնունդ» կազմակերպության ընդհանուր կարծիքը չէ:

- Բայց այդ կարծիքը արդյոք շատ չի տարբերվում «Հայկական Վերածնունդ» կազմակերպության  կարծիքից:

- Ինչի մասին խոսել է «Հայոց Հայրենիք» կուսակցության ղեկավար Անահիտ Եղոյանը,  քննարկում չի եղել «Հայկական Վերածնունդ» կազմակերպությունում: Մենք չենք քննարկել այնպիսի հարցեր, որոնք տարբերվում են «Հայկական  Վերածնունդ» կազմակերպության կարծիքից: Եթե մենք միասնական ենք տարբերի հարցերի դեպքում, դա չի նշանակում` նա չի կարող ունենալ այնպիսի կարծիք, որը կարող է չհամընկնել իմ կարծիքին:   Բացի այդ`  նախորդ ընտրություններում Անահիտ Եղոյանը  մեզ հետ չի համագործակցել,   «Հայկական Վերածնունդ»-ի անդամ չի եղել , հետեւաբար ես կարող եմ միայն  հարգել կարծիքը:

- Փաստորեն, եթե որեւէ հասարակական կամ քաղաքական ուժ ցանկանում է լինել «Հայկական Վերածնունդ»-ի անդամ, Դուք չե՞ք նայում նրա անցած ճանապարհը, նրա դիրքորոշումները:

- Անցած ճանապարհն ի՞նչ կապ ունի: Ի՞նչ է, պետք է նայել, թե որ հարցի շուրջ որ քաղաքական ուժը ինչ է հայտարարել տարիներ առա՞ջ…

-Դե «Հայոց Հայրենիքը» պնդում է իր տեսակետը…

- Քաղաքականության մեջ հավերժ թշնամիներ  ու բարեկամներ չկան: Հարցեր կան, որոնց շուրջ կարողանում ենք համախմբվել այնպիսի ուժերի հետ, որոնց հետ հակառակորդ ես:

- Դուք գիտե՞ք, որ «Հայոց հայրենիքը» ՀԱԿ դաշինքի անդամ է մինչ այժմ:

- Ես տեղյակ չեմ, կճշտեմ, բայց ասեմ`Անահիտ Եղոյանը բավական ակտիվ աշխատում  է «Հայկական Վերածնունդ»-ում:

- Կես կատակ, կես լուրջ`մի ոտքով ՀԱԿ-ում,  մի ոտքով`«Հայկական վերածնունդ»-ում...

- Ես էդպես չէի ասի, քանի որ նա հստակ աշխատում է «Հայկական վերածնունդ»-ում: Դե հիմա  ՀԱԿ-ից դուրս գալու-չգալու հարցեր քննարկել է, թե ոչ, դա տեխնիկական խնդիր է, կարծում եմ` կանի:

Հ.Գ. Այստեղ տեղին է հիշել ՀՀ 1-ին նախագահի հետեւյալ խոսքերը. «Պոլի փեդ լինի, թող ՀՀՇ լինի»:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝