Մարդկային երկու թերություն` «Հավես չկա» եւ «Թափթփված թագուհին» մանկապատանեկան ֆիլմերում (տեսանյութ)

Մարդկային երկու թերություն` «Հավես չկա» եւ «Թափթփված թագուհին» մանկապատանեկան ֆիլմերում (տեսանյութ)

Հոկտեմբերի 4-ից «Մոսկվա» կինոթատրոնի էկրանին կլինի «Հավես չկա» եւ «Թափթփված Թագուհին» մանկապատանեկան 2 նոր կինոկատակերգությունները, որոնք հանդիսատեսը հնարավորություն կունենա դիտելու մեկ տոմսով:

Ֆիլմերի բեմադրող ռեժիսոր ՆԱՐԻՆԵ ՄՆԱՑԱԿԱՆՅԱՆՆ «Իրավունքին» տեղեկացրեց, որ Ֆիլմերի սյուժեներն ունեն հիմնական նպատակ, սկզբունքներ, որոնք «Հեքիաթֆիլմի» հիմքն են. «Մեր նպատակն է հանդիսատեսին ի ցույց դնել իրական կյանքում մարդկանց գործած սխալները եւ մատնանշելով դրանց բացասական հետեւանքները` փորձել հեռու պահել բոլորին վարքագծի նմանօրինակ դրսեւորումներից: Եթե մեզնից յուրաքանչյուրը նման մի քայլ անի, աշխարհում խաղաղություն կտիրի: Դա է «Հեքիաթֆիլմի» երազանքը: Այդ իսկ պատճառով, որոշել ենք այսուհետ մեր ֆիլմերը մատուցել անգլերեն թարգմանությամբ, որպեսզի մեր բարի նպատակը հնարավորինս հեռու հորիզոններ լուսավորի»,- ասաց ռեժիսորն ու մանրամասնեց. ««Հեքիաթֆիլմի» ֆիլմերն անվանում ենք մանկապատանեկան, քանզի մեր մոլորակի ապագան հենց երեխաներն են, եւ աշխարհում որեւէ դրական փոփոխություն կատարելու համար պետք է ամեն ինչ սկսել հենց նրանցից: «Հեքիաթֆիլմի» ֆիլմերը նախատեսված են  0-ից մինչեւ 99 տարեկանների, այսինքն` ամբողջ ընտանիքով դիտելու համար»:

Ըստ Ն. Մնացականյանի «Հեքիաթֆիլմ» կինոնախագիծը ներկայացնում է Ֆիլմեր ստեղծված հատուկ երեխաների ճիշտ դաստիարակության եւ մեր մոլորակի բարի ապագայի համար. «Սա Ճիշտ եւ օգտակար ժամանց է բոլոր տարիքի երեխաների համար: Այս անգամ «Հեքիաթֆիլմ»-ը ֆիլմերի միջոցով ներկայացնում է մարդկային երկու թերություն: Ալարկոտ կամ թափթփված լինելու բնավորությունն ուղղելը այնքան էլ հեշտ բան չէ, բայց մեր հերոսներին հաջողվում է փոխվել: Իսկ թե ինչպե՞ս՝ հանդիսատեսը կիմանա, դիտելով «Հեքիաթֆիլմ»-ի ստեղծած «Հավես չկա» եւ «Թափթփված Թագուհին» մանկապատանեկան կինոկատակերգությունները` հոկտեմբերի 4-ից, «Մոսկվա» կինոթատրոնի էկրանին»:

Ֆիլմերի բեմադրող ռեժիսորն է Նարինե Մնացականյանը, բեմադրող օպերատորներն են՝ Վանիկ Մարիկյանը եւ Հովհաննես Հակոբյանը, սցենարի հեղինակներն են՝ Նարինե Մնացականյանը եւ Գայանե Մնացականյանը:

ֆիլմերում նկարահանվել են՝ Արմեն Թադեւոսյանը, Հենրիկ Վարդանյանը, Արամ Հակոբյանը, Նարեկ Վարդանյանը, Էլեն Սահակյանը, Մանե Գաբրիելյանը, Մարիաննա Հակոբյանը, Էլեն Թադեւոսյանը, Մարի Սարգսյանը, Մարիաննա Ղազարյանը, Լաուրա Ավագյանը եւ այլոք:

ԼԻԼԻԹ ԵՂԻԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝