ԱԴՐԲԵՋԱՆԱԿԱՆ ԲԱՆԱԿԻ ՈՉՆՉԱՑՎԱԾ ՊԱՅՄԱՆԱԳՐԱՅԻՆ ԶԻՆԾԱՌԱՅՈՂԻ ՎՐԱՑԱԿԱՆ ՈԴԻՍԱԿԱՆԸ
Արխիվ 12-16
ԱԴՐԲԵՋԱՆԱԿԱՆ ԲԱՆԱԿԻ ՈՉՆՉԱՑՎԱԾ ՊԱՅՄԱՆԱԳՐԱՅԻՆ ԶԻՆԾԱՌԱՅՈՂԻ ՎՐԱՑԱԿԱՆ ՈԴԻՍԱԿԱՆԸ
Ինչպես արդեն նշել է «Իրավունքը», ադրբեջանական լրատվամիջոցները պնդում են, որ Վրաստանի Բոլնիսի շրջանի Զոլ-Գյուվեջ գյուղում հողին է հանձնվել սեպտեմբերի 25-ին հայ-ադրբեջանական սահմանին ոչնչացված ադրբեջանական բանակի պայմանագրային զինծառայող 23-ամյա Էլշան Վագիֆօղլի Մամեդովը: Ավելին` թաղման արարողությանը մասնակցել եւ Ադրբեջանի պաշտպանության նախարարության անունից զոհվածի հարազատներին ցավակցել է Վրաստանում Ադրբեջանի դեսպանատան ռազմական կցորդ Խազար Աբբասովը: Թե որքանո՞վ է իրական այս տեղեկությունը, նախ փորձեց պարզել Վրաստանի հարցերով փորձագետ ՋՈՆԻ ՄԵԼԻՔՅԱՆԻՑ, ում փոխանցմամբ` վրացական որեւէ լրատվամիջոցում այս մասին հրապարակում չի տեսել. «Շատերը, օրինակ, Մառնեուլի շրջանից (Վրաստանի հարավում գտնվող քաղաք է - հեղինակ) մեկնում են Ադրբեջան` ուսում ստանալու: Ուղղակի, խնդիրն այս դեպքում այն է, որ եթե սա ապատեղեկատվություն չէ, եւ այդ անձն իրոք զոհվել է Լեռնային Ղարաբաղի սահմանին, նշանակում է, որ կա՛մ ինքն Ադրբեջանի քաղաքացիություն է ձեռք բերել, կա՛մ էլ` լինելով Վրաստանի քաղաքացի` ծառայել է ադրբեջանական բանակում, ինչը օրենքով, իմ կարծիքով, Վրաստանում շատ բացասական պետք է ընկալվի, այսինքն` ստորագրված չէ: Բայց Ադրբեջանում չգիտեմ, թե ինչքանով կարող էր կիրառվել այդ հնարավորությունը, որպեսզի այդ անձը հեշտացված կարգով ստանար քաղաքացիություն: Ամեն դեպքում, եթե նա եղել է Ադրբեջանի քաղաքացի է, բայց մեռնողն արմատներով այդ շրջանից է, խնդիր չէր լինի նրան տեղափոխելն ու Վրաստանում թաղման արարողությունը կազմակերպելը»: Ի դեպ, հարցը գտնվում է նաեւ ՀՀ արտաքին գործերի նախարարության ուշադրության կենտրոնում: Մեզ հետ զրույցում ՀՀ ԱԳ փոխնախարար ՇԱՎԱՐՇ ՔՈՉԱՐՅԱՆԸ ընդգծեց. «Այո՛, այդ քաղաքացին հուղարկավորվել է Վրաստանի ադրբեջանական բնակավայրում: Մենք այդ հարցը պետք է մինչեւ վերջ ճշտենք: Այնպես որ, ուսումնասիրում ենք խնդիրը»:
ՀՐԱՆՏ ՍԱՐԱՖՅԱՆ
Բաժանորդագրվե՛ք https://t.me/iravunk
1
18878 դիտում
2
11180 դիտում
3
9721 դիտում
4
1611 դիտում
5
1573 դիտում
2
17658 դիտում
5
8049 դիտում
5
8276 դիտում
