«ԲՐԵՆԴԱՅԻՆ» ՍՈՒՊԵՐՄԱՐԿԵՏՆԵՐՈՒՄ ՇԱՐՈՒՆԱԿՈՒՄ ԵՆ ԽԱԽՏԵԼ ՍՊԱՌՈՂՆԵՐԻ ԻՐԱՎՈՒՆՔՆԵՐԸ

«ԲՐԵՆԴԱՅԻՆ» ՍՈՒՊԵՐՄԱՐԿԵՏՆԵՐՈՒՄ ՇԱՐՈՒՆԱԿՈՒՄ ԵՆ ԽԱԽՏԵԼ ՍՊԱՌՈՂՆԵՐԻ ԻՐԱՎՈՒՆՔՆԵՐԸ

Սպառողները շարունակում են դժգոհել «Երեւան սիթի» սուպերմարկետների ցանցից: Բացի այն, որ սուպերմարկետում սպառողներից ավելի գումար են գանձում, վաճառում են նաեւ առանց մակնշման ապրանքներ: Տվյալ դեպքում խոսքը վերաբերում է թթվասերին, որի վրա խոշոր տառերով գրված է պիտանելիության ժամկետը, սակայն ոչ մի տեղ նշված չէ, թե երբ է արտադրվել` գուցե 1, 5, 7 ամիս առաջ, կամ գուցե 2 տարի առաջ... Դե սպառող, արի ու գուշակիր, թե գնած թթվասերը, երբ է արտադրվել:

Օրերս հերթական անգամ համացանցում հայտնվեցին լուսանկարներ, որտեղ թթվասերի տարայի վրա նշված էր միայն պիտանելիության ժամկետը: Չնայած այն հանգամանքին, որ ապրանքի վրա թերի մակնշման կամ դրա բացակայության համար վարչական տուգանքի չափը հասնում է 100-300 հազար դրամի, միեւնույնն է` տնտեսվարողները շարունակում են իրենց սեւ գործը:
Սա առաջին դեպքը չէ, երբ խախտվում են սպառողի իրավունքները, սակայն վերջինս, համապատասխան մարմիններին դիմելու փոխարեն, դրա մասին հայտնում է միայն համացանցի տիրույթում: Այս դեպքում կամ համապատասխան մարմինները լավ չեն աշխատում, եւ սպառողները հիասթափված են, կամ համացանցում արտահայտվելը դարձել է նորաձեւ:
Սպառողները պակաս դժգոհ չեն նաեւ Երեւանի մեկ այլ «բրենդային» սուպերմարկետից` «ՍԱՍ»-ից, որտեղ ապրանքները վաճառվում  են աստղաբաշխային գներով եւ մեծ խախտումներով. վերջին ամենթարմ դեպքը կապված էր սատկած խավարասերի հետ, որը հայտնաբերվել էր տորթի մեջ: Վերը նշված երկու դեպքերի առնչությամբ «Իրավունքը» դիմեց Սննդի անվտանգության պետական ծառայությանը, որպեսզի պարզի, այդյո՞ք տեղյակ են դեպքերին, որեւէ դիմում-բողոք ստացել են եւ ինչ քայլեր են ձեռնարկել: Ծառայության մամուլի պատասխանատու ՆՎԱՐԴ ԱՌԱՔԵԼՅԱՆԻ խոսքով` դեպքերի հետ կապված սպառողներից որեւէ դիմում-բողոք չեն ստացել. «Հորդորում եմ բոլոր սպառողներին, եթե հայտնաբերում են խախտումներ, ապա անմիջապես զանգահարեն մեր Թեժ գծին, որպեսզի մեր տեսուչները գնան եւ տեղում հայտնաբերեն խախտումը»,- նշեց Ն. Առաքելյանը: Ըստ նրա, եթե խախտման մասին տեղեկանան համացանցից, ապա դրա հայտնաբերումը դժվարանում է, քանի որ սպառողները խուսափում են նշել, թե կոնկրետ որ խանութում է եղել դեպքը: Այդուամենայնիվ, կան նաեւ գիտակից սպառողներ, որոնք խախտումներ հայտնաբերելիս` անմիջապես   զանգահարում են Թեժ գիծ. «Մեր Թեժ գծին զանգերի թիվն աճել է 48 տոկոսով: Կոնկրետ այս երկու դեպքերի հետ կապված` մենք կանցակցնենք ուսումնասիրություն եւ արդյունքերի մասին կտեղեկացնենք»,- ավելացրեց Նվարդ Առաքելյանը:
Դեպքերի հետ կապված` «Իրավունքը» փորձեց մեկնաբանություններ ստանալ «Երեւան սիթիից» եւ «ՍԱՍ»-ից, սակայն մեր բոլոր զանգերը մնացին անպատասխան:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝