«Ստեփանակերտը ԵԽԽՎ քարտեզից դուրս չէ, Եվրոպայի մի մասն է, գնացեք ու անձամբ տեսեք»

Հ. Նաղդալյանի հորդորը ԵԽԽՎ-ին. «ՍՏԵՓԱՆԱԿԵՐՏԸ ԵԽԽՎ ՔԱՐՏԵԶԻՑ ԴՈՒՐՍ ՉԷ, ԳՆԱՑԵՔ ՈՒ ԱՆՁԱՄԲ ՏԵՍԵՔ»

Ժամեր առաջ ԵԽԽՎ ազատ բանավեճի հարթակում ԵԽԽՎ հայկական պատվիրակության ղեկավար, ԱԺ փոխնախագահ Հերմինե Նաղդալյանը ելույթ ունենալով` ընդգծել է, որ դարասկզբից ԵԽԽՎ անդամ դարձան հետխորհրդային տարածքի պետությունները, ապա մանրամասնել ասվածը. «Ակնկալվում էր, որ անդամակցելով եվրոպական մեծ ընտանիքին՝ մենք մաս կդառնանք համաեվրոպական արժեհամակարգի` փոխանակելով մեր փորձն ու հարստացնելով միմյանց մեր քաղաքակրթական ու պատմամշակութային ձեռքբերումներով: Բայց կյանքը միշտ բերում է իր սրբագրումները եւ, վստահ եմ, որ շատերդ կհամաձայնեք`  մենք դեռ չենք հասել մեր նպատակներին: Հայաստանի ու Ադրբեջանի պատվիրակությունների հակասությունների պատճառները բոլորիդ հայտնի են, վստահ եմ` բոլորդ ուզում եք հակամարտության լուծումը եւ տարածաշրջանին խաղաղություն ու տնտեսական զարգացման հնարավորություններ տալը: Իբրեւ Հայաստանի Հանրապետության պատվիրակության ղեկավար` վկայում եմ, որ մենք ամենից շատ ենք այդ ուզում եւ կարծում  եմ՝ նույնը կասի Ադրբեջանի պատվիրակության ղեկավարը: Ուրեմն ՝ ինչո՞ւ այս հարթակը դարձնել առճակատման դաշտ ,այս հարթակում բանավիճել հարցերի մասին, որոնց լուծման մանդատ ԵԽԽՎ-ն չունի: Բայց ԵԽԽՎ-ն ունի վստահության ու փոխըմբռնումի մթնոլորտ ձեւավորելու պարտավորություն, իր հեղինակությունն ու ազդեցությունը ի շահ խաղաղության գործադրելու հնարավորություն, որը չի օգտագործվում»: Տիկին Նաղդալյանի պնդմամբ. «Յուրաքանչյուր նստաշրջանում շարունակվող քաղաքական պատերազմով բոլորս լրացուցիչ բարդացնում ենք ԵԽԽՎ Մինսկի խմբի աշխատանքը, մինչդեռ հակառակը պիտի լինի: Մենք չենք հրաժարվում մեր սկզբունքներից, ունենք մեր փաստարկներն ու հիմնավորումները: Բայց մենք գնահատում ենք այս բարձր քաղաքական հարթակի նշանակությունն ու համաեվրոպական կարեւորությունը, միջազգային հարցերում ազդեցությունը եւ կարեւորում ենք ԵԽԽՎ որոշումների ու բանաձեւերի հեղինակությունը, որոնք չպետք է տարբեր խմբերի ու խմբավորումների հատվածական շահերը պաշտպանեն, այլ պիտի համապատասխանեն մեր ժողովուրդների ընդհանրական շահերին»: Այնուհետեւ ԵԽԽՎ հայաստանյան պատվիրակության ղեկավարը շեշտել է, որ մեր պատվիրակությունն ակնկալում է, որ Վեհաժողովի բոլոր պատվիրակները պատրաստ կլինեն ժողովուրդների երկխոսության, փոխադարձ վստահության հաստատման. «Որպես 5 երեխաների մայր, կցանկանայի հիշեցնել՝ բոլորս պատասխանատու ենք մեր զավակների եւ ապագա սերնդի առաջ, եկեք մտածենք այս խնդրի շուրջ: Ուզում եմ բոլորիդ հիշեցնել, որ ընդունում եք, թե` ոչ, ճանաչում եք, թե` ոչ, աշխարհում կա Լեռնային Ղարաբաղի Հանրապետություն, որի քաղաքացիներն ամենից շատ խաղաղություն են ուզում, բայց ապրում են շարունակվող պատերազմի պայմաններում: Արտ են հերկում, տուն կառուցում, երեխաներ են ունենում, միջազգային դիտորդների գնահատականով՝ միջազգային չափանիշներին համապատասխան ընտրություններ են անում: Եթե մենք իսկապես շահագրգիռ ենք Լեռնային Ղարաբաղի հակամարտության խաղաղ կարգավորմամբ, մենք պետք է հարգենք նրանց կյանքի եւ զարգացման իրավունքը: Ստեփանակերտը ԵԽԽՎ քարտեզից դուրս չէ, Եվրոպայի մի մասն է, գնացեք ու անձամբ տեսեք՝ ինչ է այնտեղ կատարվում», - եզրափակելով ելույթն` ասել է Հ. Նաղդալյանը:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝