ՀՀ ԱՆԿԱԽՈՒԹՅԱՆ ՕՐԸ ՆՇՎԵԼ Է ՆԱԵՎ ՀՆԴԿԱՍՏԱՆՈՒՄ

ՀՀ ԱՆԿԱԽՈՒԹՅԱՆ ՕՐԸ ՆՇՎԵԼ Է ՆԱԵՎ ՀՆԴԿԱՍՏԱՆՈՒՄ

Սեպտեմբերի 21-ին Հնդկաստանի մայրաքաղաք Դելիի «India International Centre»-ում կայացած «Հայկական Մշակույթի Կենտրոնի» բացման արարողությունը համընկավ Հայաստանի Անկախության 24-րդ տարեդարձի հետ: Կազմակերպիչները հյուրերին ընդունեցին շատ ջերմ, հայկական ավանդական տարբերակով` աղ ու հացով:

Պատվավոր հյուրերի շարքերում էին Հնդկաստանում Հայաստանի դեսպան Արմեն Մարտիրոսյանը եւ Հնդկաստանի նախագահի անձնական բժիշկ, պրոֆեսոր Մոհսին Վալին:

Պրոֆեսոր Վալին  իր շնորհավորական խոսքում ասաց. «Հայաստանի մասին լսել եմ այս կազմակերպության նախագահ, սրտաբան Գայանե Մովսիսյանից, ում շնորհիվ էլ դարձա Հայաստանի ընկերը»: Շնորհավորելով անկախության օրվա, ինչպես նաեւ կենտրոնի բացման առթիվ՝ դեսպան Արմեն Մարտիրոսյանն իր խոսքում նշեց, որ Հնդկաստանում տեսնում է ինտելիգենտ սփյուռք եւ միջոցառման մասնակիցներին ու Հնդկաստանում ապրող հայերին հրավիրեց հոկտեմբերի կեսերին դեսպանատան առաջ կայանալիք ծառատունկին:

«Հայկական Մշակույթի Կենտրոնի» փոխնախագահ պրոֆեսոր Սուման Կեշարին իր տեսաուղերձում շնորհավորելով բոլոր մասնակիցներին, ասաց`  հպարտ է, որ մասնակցելու է հայոց հինավուրց մշակույթը հնդիկ հասարակությանը ներկայացնելու գործին: Նորաստեղծ կենտրոնի նախագահ Գայանե Մովսիսյանն իր ելույթում բացի կազմակերպության նպատակներից, խոսել է նաեւ հայ-հնդկական կապերի ամրապնդման, Հայոց Ցեղասպանության եւ Հնդկաստանում հայ ուսանողներին աջակցելու մասին:

Ի դեպ, երեկոն վարում էր հնդկական «Aaj Tak» (Առ այսօր) հեռուստաալիքի հաղորդավարուհի Սանա Խանը: Միջոցառումն ավարտվեց Երեւանի մասին նկարահանված տեսանյութով եւ  Համո Սահյանի «Հայաստան ասելիս» բանաստեղծությամբ, որն արտասանեց չորսամյա ամաչկոտ Շահանը՝ միջոցառման ցուցապաստառի հետեւում թաքնված:

ԼԻԼԻԹ ԿՈՍՏԱՆԴՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝