ՀԱԼԵՊԱՀԱՅՈՒԹՅՈՒՆԸ ԾԱՅՐԱՀԵՂ ԾԱՆՐ ՎԻՃԱԿՈՒՄ Է

ՀԱԼԵՊԱՀԱՅՈՒԹՅՈՒՆԸ ԾԱՅՐԱՀԵՂ ԾԱՆՐ ՎԻՃԱԿՈՒՄ Է

Այն, որ վերջին շաբաթներին Սիրիայում կտրուկ սրվել է ռազմական իրավիճակը, հայտնի բան է: Փորձագետները դա կապում են այն ռազմական օժանդակության հետ, որը սիրիական իշխանություններին ցուցաբերում է Ռուսաստանը: Արդյունքում՝ այդ օժանդակության հաշվին Սիրիայի պետական բանակը հնարավորություն է ստացել կտրուկ ակտիվացնել իր գործողությունները, որին արդեն դժվարությամբ դիմացող ահաբեկչական խմբավորումները փորձում են ողջ կատաղությունը թափել իրենց վերահսկողության տակ գտնվող բնակավայրերի խաղաղ բնակչության գլխին: Դա լավ բան չի խոստանում արդեն հազիվ շնչող սիրիահայ համայնքին: Մասնավորապես, թե այս օրերին ինչ է տիրում Հալեպում, մեզ պատմեց երբեմնի այդ հայաշատ քաղաքի դեռ պահպանվող հայ համայնքի ղեկավար ՀԱՐՈՒԹՅՈՒՆ ՍԵԼԻՄՅԱՆԸ:

Հալեպում իրավիճակը շարունակում է լարված մնալ, գնալով օղակը սեղմվում է, արվարձաններն ամբողջությամբ վնասված են: Այս լարվածությունը կապված է ՌԴ-ի` Սիրիային օգնելու որոշման հետ. ահաբեկիչները դա չեն կարողանում մարսել, որ Ռուսաստանը` Սիրիային օգնելու համար վերջին շրջանում ջանք չի խնայում, որ այդ երկիրը լծվել է սիրիացիների խնդիրը կարգավորելու գործընթացին:
Վերջին երկու օրերի ընթացքում մեծ թվով` մի քանի հարյուր զոհեր եղան արաբ, իսլամ այլ ազգերի կողմից, նույնքան էլ` վիրավորներ: Ահաբեկիչների զոհ են դարձել նաեւ հինգ հայեր, կան վիրավորներ, իրավիճակն այստեղ շատ լարված է:
Իսկ այն, որ ահաբեկիչների այս ակտիվությունը անմիջական կապ ունի ՌԴ-ի` Սիրիային օգնելու հետ, դա փաստ է, եւ դրա վառ ապացույցն այն է, որ օրերս ռմբակոծվեց ՌԴ դեսպանատունը: Անկասկած, այդ հարձակման հետեւում կանգնած են արտաքին ուժերի կողմից սատարվող ահաբեկչական խմբավորումներ, քանի որ բացառվում է, որ սիրիական պետությունը կապ ունենա այս հրթիռակոծման հետ:
- Իսկ այս խառը օրերին փրկության ի՞նչ ուղիներ է տեսնում հայությունը:

Շատերը դեռ մնում են իրենց բնակավայրերում եւ տներում: Շատերը փորձում են հեռանալ, սակայն դա եւս շատ դժվար է: Օրինակ՝ օրերս զինյալները երկու հայ են առեւանգել. նրանք հարկադրաբար կանգնեցրել են Հալեպից Լիբանան ուղեւորվող ավտոբուսը եւ առեւանգել երկու հայի: Անցած հանգստյան օրերին իսլամիստ զինյալներն ականանետերից կրակ են արձակել Հալեպի հայկական ու քրիստոնեական թաղամասերի ուղղությամբ:
- Օրինակ` քեսաբահայության դեմ հարձակումների օրերին հայտնի դարձավ, որ ահաբեկիչներն այդ տարածք էին թափանցել Թուրքիայից եւ ոչ առանց այդ երկրի ուղղորդման: Իսկ Հալեպում, երբ հատուկ թիրախի դերում է հայտնվում հայությունը, թուրքական գործոնը չի՞ նկատվում:
- Այն խմբավորումները, որոնք այսօր ավելի մոտ են հայկական թաղամասերին, թուրքական ակունքների, կուսակցությունների հսկողության տակ են: Բնականաբար՝ ոչ միայն հայերը, այլ ընդհանրապես հալեպաբնակ ժողովուրդն է հարվածի տակ: Սակայն իսլամիստների վայրագ, անմարդկային, բարբարոս, արյունարբու ձեռքով թուրքերն են հայերին պատճառում այդ հարվածները:

ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝