«Ի ՎԵՐՈՒՍՏ ՀԱՂԹԱՆԱԿ ՀԱՍԿԱՑՈՂՈՒԹՅՈՒՆՆ ԱԴՐԲԵՋԱՆԻՆ ՇՆՈՐՀՎԱԾ ՉԷ»

«Ի ՎԵՐՈՒՍՏ ՀԱՂԹԱՆԱԿ ՀԱՍԿԱՑՈՂՈՒԹՅՈՒՆՆ ԱԴՐԲԵՋԱՆԻՆ ՇՆՈՐՀՎԱԾ ՉԷ»

Ադրբեջանի կողմից հրահրված հայ-ադրբեջանական սահմանի վերջին օրերի լարվածությունը խայտառակ շարունակություն ունեցավ հենց իրենց համար: Թշնամուն սանձելու գործողությունների արդյունքում` հայ զինվորին հաջողվեց ոչնչացնել տասնյակից ավելի զինված ազերու ու ազատագրել եւս մի քանի հենակետ: Սա, իհարկե, հպարտանալու ու կրկին հայ զինվորին փառք ու պատիվ ասելու առիթ է տալիս, բայց ոչ երբեք զգոնությունը թուլացնելու: Հենց այս մասին էլ «Իրավունքը» զրուցեց ԼՂՀ Ազգային ժողովի պատգամավոր, ԱԺ արտաքին հարաբերությունների հանձնաժողովի անդամ, պատերազմի թոհուբոհի միջով անցած ՌՈՒԴԻԿ ՀՅՈՒՍՆՈՒՆՑԻ հետ:

«ԱՅՍ ԱՄԵՆԻՆ ՊԵՏՔ Է ՎԵՐՋ ԴՐՎԻ»

–Պարոն Հյուսնունց, ինչպե՞ս կգնահատեք վերջին օրերին հայ զինվորների տված դասը ագրեսոր Ադրբեջանին:
– Անկեղծ ասած, ուրախանալու առիթ չունեմ: Գործողությունները հիմնականում իրականացվել են հրետանային ռմբակոծության տեսքով, եւ սա այն պարագան է, որ հաղթողներ եւ պարտվողներ չեն լինում: Ուղղակի, լինում են պարտվողներ, եւ մեր երիտասարդներն են զոհվում սահմանին: Եվ հրճվել, ուրախանալ, որ մենք թշնամու հենակետեր ենք ոչնչացրել կամ զինվորներ ենք սպանել, ճիշտ չէ, որովհետեւ այս ամենին պետք է վերջ դրվի: Սա տարածության վրա իրականացվող մի գործողություն է, որը երկուստեք վնասակար է բոլորիս համար: Ինձ թվում է` իրոք, մեր հակառակորդը պետք է այս ամենից դասեր քաղի եւ հասկանա, որ այս պատժիչ գործողություններն ընդամենը մի բան են հետապնդում` թշնամուն ուղղակի հասկացնել, որ այդ ավերածությունները ոչ մի` թե՛ ռազմական, թե՛ քաղաքական արդյունքի չեն բերելու:
– Այնուամենայնիվ, ժամանակը չէ՞ ընդլայնելու մարտական գործողությունները, որպեսզի Ձեր նշած լուծումը չուշանա:
– Ընդհանրապես, այսօրվա ռազմական վերլուծաբանների հաշվարկներով, եթե մասշտաբային ռազմական գործողություններ ծավալվեն, կորուստները լինելու են 25 անգամ ավելի: Տրամաբանության հետեւությունները թողնում եմ ձեզ: Առաջվա պատերազմի նման չի լինելու, այլ երկուստեք ողբերգական իրավիճակ է լինելու` մեծ զոհերով ու կորուստներով: Անկեղծ պիտի ամբողջ ազգով աղոթենք, որ այս պատերազմը չլինի: Ո՛չ թե մենք վախ ունենք, ո՛չ թե մենք քաջության պակաս ունենք, ուղղակի, ասում եմ, որ այս պատերազմը ռազմական ժամանակակից տեխնիկայի կիրառմամբ` սարսափելի մեծ կորուստների առաջ է կանգնեցնելու:

ՀՀ ՆԱԽԱԳԱՀԻ ՀԱՅՏԱՐԱՐՈՒԹՅՈՒՆԸ ՄԵՐ ԱՐՏԱՔԻՆ ՔԱՂԱՔԱԿԱՆՈՒԹՅԱՆ ՏՐԱՄԱՆԱԲԱՆԱԿԱՆ ՇԱՐՈՒՆԱԿՈՒԹՅՈՒՆՆ Է

–Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի 6-րդ նիստի ժամանակ ՀՀ նախագահն անդրադառնալով սահմանային լարվածությանը` նշեց, որ երբ ասում է` Հայաստան` Լեռնային Ղարաբաղը նրա անբաժան մասն է: Արդյո՞ք կարելի է այս հայտարարությունը համարել քաղաքական շրջադարձ:
– Սա մեր արտաքին քաղաքականության տրամաբանական շարունակությունն է, ՀՀ նախագահը նորություն չի ասել եւ, ընդհանրապես, հաստատել է, որ սա Հայաստան է եւ վերջ: Իսկ ինչ վերաբերում է Լեռնային Ղարաբաղի Հանրապետության անկախությանը, սա այլ խնդիր է: Եթե կան 20 արաբական անկախ երկրներ, թող լինի նաեւ երկու անկախ հայկական պետություն: Սա ընդհանրապես աղերս չունի որեւէ այլ տրամաբանության հետ:
– Նյու Յորքում սեպտեմբերի 24-25-ը հանդիպում տեղի ունեցավ ՀՀ եւ Ադրբեջանի ԱԳ նախարարների միջեւ, ի՞նչ կարելի է ակնկալել նման ձեւաչափով բանակցություններից:
– Մեր բոլոր բարեկամները, այն բոլոր պետությունները, որոնք բարիդրացիական հարաբերություններ ունեն Հայաստանի Հանրապետության հետ, պետք է ամեն ինչ անեն, որպեսզի Ադրբեջանին հասկացնեն, որ մենք դատապարտված ենք կռվելու եւ հաղթելու, մեր իրավունքները պաշտպանելու: Պարզապես, մենք ուզում ենք ապրել մեր երկրի վրա եւ որեւէ ուրիշ «ամբիցաներ» չունենք: Ուղղակի, ուզում ենք անկախ ապրել, ուզում ենք մեր հայկականությունը պաշտպանել, մեր կրոնը, մեր պատմությունը եւ մեր մշակույթը կրել: Եվ ի վերուստ հաղթանակ հասկացողությունը Ադրբեջանին շնորհված չէ, որովհետեւ կրկնում եմ` մենք դատապարտված ենք մեզ պաշտպանելու, մահու-կենաց կռիվ տալու: Ու ամբողջ աշխարհը սա պետք է հասկանա ու բացատրի մեր հակառակորդներին, մեր թշնամիներին, մեր չուզողներին` ադրբեջանցիներին ու թուրքերին: Այս թեզը մենք պետք է առաջ տանենք, որ 1894 թվականի, 1915-ի թվականի ցեղասպանության շարունակությունն են այսօրվա թուրք-ադրբեջանական գործողությունները:

«ՍԱ ԵՐԿՈՒՍՏԵՔ ՈՒՐԱԽԱԼԻ ՉԷ»

–Ի դեպ, սահմանային լարվածությանը զուգահեռ` տարբեր վերլուծաբանների կողմից մեղադրանքներ էին հնչում ԵԱՀԿ Մինսկի խմբի համանախագահների հասցեին, քանի որ նրանք բավարարվեցին` հերթական հայտարարություններն անելով: Ի՞նչ կասեք այս մասին:
– ԵԱՀԿ Մինսկի խումբը հրամայական մանդատով օժտված չէ: Այդ կառույցը ստեղծվել է, որպեսզի բանակցային գործընթացները հունի մեջ պահի, եւ կարծում եմ` իրենք անում են լավագույնը, եւ ստատուս քվոն մի քայլ առաջ է: Եվ, կարծես թե, սահմանին մասսայական գործողություններ չեն կատարվում, այլ լոկալ կետերում միայն բռնկումներ են լինում: Կարծում եմ` ԵԱՀԿ Մինսկի խումբը իր առաքելությունը նորմալ է կատարել մինչեւ հիմա եւ իրենցից ավելին սպասելու ակնկալիքներ պետք է չունենանք:
– Ինչպիսի՞ն է իրավիճակն այս պահին ԼՂՀ սահմանում:
– Անցած գիշեր մարտական գործողություններ են կատարվել Ակնայի ուղղությամբ, եւ թշնամին տասնյակ զոհեր ունի: Ադրբեջանն արդեն արձագանքում է այդ մասին` նշելով 3-4 զոհի անուն, բայց ավելի շատ են իրականում: Բայց էլի եմ ասում` սա երկուստեք ուրախալի չէ, այլ ողբերգական գործողություններ են: Եվ ինձ թվում է, որ Ադրբեջանը պետք է ուշքի գա եւ հասկանա, եթե այսպես շարունակի, ապա իրենց այլ փորձություններ են  սպասվում:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝