ԳՅՈՒՂԱՊԵՏ. «ԳԵՏԱՓԸ ԴՐԱԽՏ ՉԷ, ԲԱՅՑ ՇՈՒՏՈՎ ԵՎՐՈՊԱ Է ԼԻՆԵԼՈՒ»

ԳՅՈՒՂԱՊԵՏ. «ԳԵՏԱՓԸ ԴՐԱԽՏ ՉԷ, ԲԱՅՑ  ՇՈՒՏՈՎ

ԵՎՐՈՊԱ Է ԼԻՆԵԼՈՒ»

Վայոց ձորի մարզի Գետափ համայնքի ղեկավար Գագիկ Ալոյանը, ով այսօր այլ համայնքների ղեկավարների հետ  հանդիպել էր Եվրոպայի խորհրդի գրասենյակի ղեկավարի ու ԵԽ-ի տեղական եւ տարածքային իշխանությունների Կոնգրեսի փոխնախագահի հետ «Իրավունքի» հետ զրույցում ասաց, որ իր գյուղը շուտով Եվրոպա է դառնալու: «Գյուղը լուսավորված է, ունի մշակույթի տուն, մշտական խմելու ջուր, դպրոց: Մեկ ամսից կբացվի նորոգված մանկապարտեզը: Ոռոգման ջրի հետ կապված խնդիր եւս կա, բայց 100 մլն դրամի արժողությամբ ծրագիր է   կյանքի կոչվում: Մնում է  երկու կմ  կենտրոնական փողոցն ասֆալտապատվի, որն արդեն սկսվել է»,- ասաց գյուղապետը:

Կես կատակ, կես լուրջ հակադարձեցինք` ինչ է, Գետափը դրա՞խտ է, ոչ մի խնդիր չկա՞, Գագիկ Ալոյանն ասաց. «Դրախտ չէ, բայց համայնքը լինելու է   ասֆալտապատումից հետո Եվրոպա է դառնալու»:

Գետափցիները հիմնականում զբաղվում են գյուղատնտեսությամբ, բայց արտագնա աշխատանքի մեկնողներ էլ քիչ չեն: Համայնքի ղեկավարի խոսքով` գյուղացիներն իրենց բերքը հանձնում են Վայոց Ձորում վերջերս բացված պահածոների  արտադրամասին ու շուկաներ:

Ինչ կարծիք ունի համայնքի ղեկավարը համայնքների խոշորացման ծրագրի  մասին: «Բացասական, քանի որ դեռ ԽՍՀՄ-ի ժամանակ մեր սովխոզը միացրին Եղեգնաձորին, բայց որոշ ժամանակ անց հասկացան` դա սխալ է: Գուցե փոքր գյուղերի համար դա արդյունավետ է, բայց կոնկրետ իմ գյուղում բոլոր հարցերը կարգավորված է, ինչո՞ւ միանամ»,- եզրափակեց  գյուղապետը:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝