ԱՌԱՋԱՐԿ` ՔԱՂԱՔԱՊԵՏԱՐԱՆԻՆ. «ՄԱՅՐԱՔԱՂԱՔԸ ՆԱԵՎ ՍԱՀՄԱՆԱՄԵՐՁ ԲՆԱԿԱՎԱՅՐԵՐՈՒՄ ԱՊՐՈՂՆԵՐԻՆՆ Է»

ԱՌԱՋԱՐԿ` ՔԱՂԱՔԱՊԵՏԱՐԱՆԻՆ. «ՄԱՅՐԱՔԱՂԱՔԸ

ՆԱԵՎ ՍԱՀՄԱՆԱՄԵՐՁ ԲՆԱԿԱՎԱՅՐԵՐՈՒՄ

ԱՊՐՈՂՆԵՐԻՆՆ Է»

Աջակցենք սահմանամերձ բնակավայրերին նախաձեռնության անդամներ Լեւոն Զաքարյանը, Սոֆյա Հովսեփյանն ու Սուրեն Էյրամջյանը ստորագրահավաք են սկսել`հանուն սահմանամերձ բնակավայրերի աջակցության համար: Նախաձեռնության անդամներն առաջարկում են քաղաքապետարանին  այս տարի Երեւանի տոնակատարության համար ծախսվող գումարը կամ գոնե դրա մի մասը հատկացնել  սահմանամերձ բնակավայրերից մեկին: «Մայրաքաղաքը  նաեւ սահմանամերձ բնակավայրերում ապրողներինն է: Եթե  քաղաքապետարանն ուզում է տոնել, նրանց համար էլ պետք է տոն լինի դա»,- ասաց Սոֆյա Հովսեփյանը:

Անդրադառնալով  ֆեյսբուքյան օգտատերերի այն դժգոհությանը, թե  այս նախաձեռնությունը կարծես թե դեմ է Հայաստանում անցկացվող տոնակատարություններին, Լեւոն Զաքարյանը հերքեց դա: «Մենք սիրում ենք մեր քաղաքը: Ես ինքս երեւանցի եմ: Մենք չենք առաջարկում հրաժարվել Երեւանի տոնը նշելուց, այլ առաջարկում ենք  քիչ գումարով դա անել: Ես կողջունեմ, եթե միայն հրավառության գումարը փոխանցեն Պառավաքար գյուղին: Ոչ ոք չի նեղվի, եթե այս անգամ հրավառություն Երեւանում չլինի»,- ասաց Լեւոն Զաքարյանը:

Նախաձեռնությունը  հաշվարկներ ունի՞, թե ինչի կարիք ունեն սահմանամերձ բնակավայրերի բնակիչները:  «Մենք ընդամենը խնդիրներ ենք բարձրացնում եւ դրանց լուծման համար դիմում տարբեր գերատեսչությունների: Բայց շուտով մենք հաշվետվություն կներկայացնենք մեր հանրությանը, թե այս մեկ տարվա ընթացքում ինչ է արել նախաձեռնությունը»,- մանրամասնեց Հովսեփյանը:

Ի դեպ, նախաձեռնության  ֆեյսբուքյան էջում հաշվեհամար կա, որին ամեն ամիս որոշակի գումարներ են փոխանցում՝ սկսած 500 դրամից:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝