ԿԱԹՆԱՄԹԵՐՔԻ ՇՈՒԿԱՆ ՄՆՈՒՄ Է ԽԱՅՏԱՌԱԿ ՎԻՃԱԿՈՒՄ

ԿԱԹՆԱՄԹԵՐՔԻ ՇՈՒԿԱՆ ՄՆՈՒՄ Է ԽԱՅՏԱՌԱԿ ՎԻՃԱԿՈՒՄ

Այն, որ Հայաստանում պաշտոնական տվյալներով ամեն տարի ավելանում է անասնագլխաքանակը, մեծանում են կաթի արտադրության ծավալները, չի խանգարում, որպեսզի շուկայում կաթնամթերքը վաճառվի անհեթեթ գներով: Այսինքն՝ ձմեռային ամիսներին կաթն ու կաթնամթերքը թանկացնում են ու բացատրում՝ գիտեք ինչ, այս սեզոնին կաթը քիչ է, գյուղացին թանկ է վաճառում եւ խանութում էլ գները պետք է բարձրանան: Բայց գալիս է գարունը, կաթը շատանում է, գյուղացին սկսում է էժան հանձնել, իսկ խանութներում գինը նույնն է, մինչեւ առաջիկա ձմեռային թանկացումը:

Իսկ այս տարի վիճակը հասավ աբսուրդի. գյուղացուց կաթի մթերումների գինը ռեկորդային անկումներ ունեցավ, որը պատկան ատյանները բացատրեցին՝ կաթը ողջ աշխարհում էժանացել է, ներկրվող կաթի փոշին՝ նույնպես: Ուրեմն մթերումների գներն էլ պետք է իջնեն: Բայց որ նույն ամառային սեզոնին խանութներում կաթնամթերքը ¥աննշան բացառություններով¤ մի բան էլ թանկացել է, անգամ պաշտոնական վիճակագրությունն է փաստում ¥օգոստոսի տվյալներով՝ անցած տարվա համեմատ 2,5 տոկոսով¤: Դե արի եւ սրանից հետո լսի պաշտոնական պատճառաբանություններ:
Ինչեւէ՝ այս իրավիճակը բացատրելով՝ ՀՀ գյուղատնտեսության նախարարի տեղակալ ԳՐԻՇԱ ԲԱՂՅԱՆԸ նույնպես սկսեց այն «սիրված» պատմությունից, թե՝ կաթն ունի իր սեզոնային գինը, սովորաբար գարնանը եւ ամռանը նվազում է, իսկ աշնանը` բարձրանում: Իսկ ահա այս տարի՝ ավելացել են կաթի թե՛ արտադրության, թե՛ մթերման ծավալները. «Գարնանն ունեցել ենք կաթի մթերման խնդիր, ինչը կապված էր գնագոյացման հետ, քանի որ կաթի առաջարկը շատ էր, պահանջարկը` քիչ: Այդ պատճառով էլ կաթի գները նվազել էին: Իսկ այժմ շուկայում նկատվում է կաթի գների բարձրացում, կաթ մթերող ընկերությունների մի մասը  մթերումը կատարում է 140 դրամով: Կարծում եմ` հոկտեմբերի 1-ից մթերման գներն ավելի կբարձրանան»,- նշեց Գ. Բաղյանը:
Մենք էլ նույնն ենք ասում. գարուն-ամառային ամիսներին մթերումների գները կտրուկ ընկել էին, եւ չնայած դրան՝ խանութներում գնաճ էր...
Ասվածի հետ համաձայն էր նաեւ «Սպառողների խորհրդատվության կենտրոն» հասարակական կազմակերպության նախագահ ԿԱՐԵՆ ՉԻԼԻՆԳԱՐՅԱՆԸ, որ այն, ինչ այսօր տեղի է ունենում կաթնամթերքի շուկայում, օրինաչափ չէ. տնտեսվարողները գյուղացուց կաթը գնում են էժան, իսկ շուկայում վաճառում կրկնակի գնով: Դրանով հանդերձ` տնտեսվարողները բողոքում են, որ գյուղացին կաթը թանկ է վաճառում, այդ պատճառով էլ իրենք ստիպված բարձրացնում են կաթի գները. «Եթե գյուղացին 10 դրամ է կաթի գինը բարձրացնում, ապա  տնտեսվարողները բարձրացնում են 20-30 դրամով: Էլ չասեմ, որ կաթնամթերք արտադրողները հիմնականում օգտագործում են կաթի փոշի եւ շատ ժամանակ կաթի անվան տակ վաճառում ջրով բացած  կաթի փոշի»: Ըստ մեր զրուցակցի` կաթնամթերքն ավելի բարձր գներով վաճառվում է հատկապես «բրենդային»  համարվող սուպերմարկետներում: «Մեզանում սովորաբար ապրանքի գները սահմանում են տնտեսվարողները, ինչից միշտ տուժում են սպառողները: Նրանք այնպիսի գներ են սահմանում, որ ասենք` կաթ արտադրող գյուղացին չի հանդգնում մրցակցության մեջ մտնել կամ գնի առումով նրան հակաճառել: Կան նաեւ որոշ տնտեսվարողներ, ովքեր կաթի եւ մյուս ապրանքների համար նորմալ գներ են սահմանում, սակայն հանդիպում են մյուսների հանդիմանությանը եւ կտրուկ փոխում գները: Ես չեմ հիշում տարի, երբ կաթնամթերքի գները նվազեն: Ընդհակառակը` անընդհատ բարձրանում են: Ինչքան էլ էժան գներով կաթը մթերեն, միեւնույն է, այդ հանգամանքը  չի ազդում կաթի գների նվազման վրա»,- շեշտեց Կ. Չիլինգարյանը եւ զայրույթով ավելացրեց, որ երկար ժամանակ է` կաթնամթերքի շուկայում այս իրավիճակն է, սակայն պատկան մարմիններն այն չեն նկատում եւ քայլեր չեն ձեռնարկում կարգավորումներ կատարելու համար:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝