ԵԱՀԿ Մինսկի խմբի համանախագահները՝ Իգոր Պոպովը, Ջեյմս Ուորլիքը և Պիեռ Անդրիոն, ԵԱՀԿ գործող նախագահի անձնական ներկայացուցիչ Անջեյ Կասպրչիկի հետ համատեղ իրենց լուրջ մտահոգությունն են հայտնել հայկական և ադրբեջանական ուժերի կողմից քաղաքացիական բնակավայրերի շուրջ ականանետերի և ծանր սպառազինության կիրառության առնչությամբ։ 

Հայտարարությունը տեղադրված է ԵԱՀԿ պաշտոնական էջում:

«Նման զինատեսակի կիրառումը հակամարտության անընդունելի լարում է ազդարարում։ Մենք մեր խորին ցավակցությունն ենք հայտնում զոհվածների ընտանիքներին և ընդունում միջազգային սահմանին և շփման գծում յուրաքանչյուր կողմի զոհերի փաստը։ Խստագույն կոչ ենք անում կողմերին խուսափել քաղաքացիական զոհերից։ Ըստ Ժնևյան կոնվենցիայի՝ կողմերը պարտավորվածություն ունեն պաշտպանել քաղաքացիական բնակչության անվտանգությունը և ապահովությունը։ 

Ցավում ենք, որ այս միջադեպերը տեղի են ունեցել Նյու Յորքում Հայաստանի և Ադրբեջանի արտաքին գործերի նախարարների միջև համաձայնեցված հանդիպման նախօրեին։ Մենք ակնկալում ենք, որ նախարարները լուրջ քննարկում կանցկացնեն իրադրության լարման և բանակցային հանգուցալուծման հարցերի շուրջ։ Թեև մենք չենք կարող հստակորեն նշել, թե ինչպես է բռնությունը ծագել, քանի որ կողմերից յուրաքանչյուրը մյուսին է մեղադրում, կողմերը պետք է աշխատեն ԵԱՀԿ հետաքննության մեխանիզմի ստեղծման ուղղությամբ՝ համաձայն նախագահների միջև կայացած քննարկման։ 

Մենք շարունակելու ենք աշխատանքները կողմերի հետ ամենաբարձր մակարդակով լարվածությունը նվազեցնելու և երկարատև ու խաղաղ հանգուցալուծումը խրախուսելու ուղղությամբ»,-ասված է հայտարարության մեջ։

Հիշեցնենք, որ հակառակորդի կրակոցների հետևանքով Տավուշի մարզի Բերդավան ու Պառավաքար համայնքներում երեք խաղաղ բնակիչ է զոհվել: Արդեն մի քանի ժամ է՝ գյուղերի ուղղությամբ կրակոցները դադարել են: 

ՊՆ-ն Հայաստանի Հանրապետության հետ սահմանամերձ ադրբեջանական ազգաբնակչությանը կոչ է արել այսուհետ խուսափել սեփական զինված ուժերի համար վահան հանդիսանալուց: 

«Սահմանագոտում իրավիճակը կայունացնելու և ադրբեջանական զինված ուժերին զսպելու նպատակով ՀՀ զինված ուժերը դիմելու են համարժեք գործողությունների, ինչի հետևանքների ամբողջ պատասխանատվությունը կրելու է Ադրբեջանի ռազմաքաղաքական ղեկավարությունը»,-ասված է ՊՆ հայտարարության մեջ:

Առավոտյան հայտնի դարձավ, որ ի պատասխան Ադրբեջանի կողմից ՀՀ Տավուշի մարզի հայկական գյուղերի գնդակոծության, Հայոց բանակի մարտիկները ոչնչացրել են առնվազն 5 ադրբեջանցի զինծառայողների։ Ոչնչացվել է նաև Պառավաքար գյուղի հանդիպակաց բլուրների վրա գտնվող ադրբեջանական մեկ ռազմական հենակետ։

ԱԳ նախարար Էդվարդ Նալբանդյանը Նյու Յորքում ԼՂ խնդրի կարգավորմամաբ զբաղվող ԵԱՀԿ Մինսկի խմբի համանախագահների հետ հանդիպմանը նշել է. « Այս հերթական սադրանքը դարձավ Ադրբեջանի արձագանքը Մինսկի խմբի համանախագահների հնչեցրած` Հայաստանի և Ադրբեջանի արտգործնախարարների միջև Նյու Յորքում արդյունավետ բանակցություններ ունենալու ակնկալիքին»:

Ավելի վաղ ՀՀ ԱԳՆ-ն հաղորդագրություն էր տարածել, ըստ որի Նյու Յորքում նախատեսված է Հայաստանի արտաքին քաղաքական գերատեսչության ղեկավարի հանդիպումը ԵԱՀԿ Մինսկի խմբի համանախագահների ու Ադրբեջանի արտգործնախարարի հետ։

 

 

Հավանեցի՞ր հոդվածը, կիսվիր ընկերներիդ հետ՝

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝