ԼԱՐՎԱԾ ԻՐԱՎԻՃԱԿ ՆՈՅԵՄԲԵՐՅԱՆԻ ԵՎ ԻՋԵՎԱՆԻ ՍԱՀՄԱՆԱՅԻՆ ԳՅՈՒՂԵՐՈՒՄ

ԼԱՐՎԱԾ ԻՐԱՎԻՃԱԿ ՆՈՅԵՄԲԵՐՅԱՆԻ ԵՎ ԻՋԵՎԱՆԻ

ՍԱՀՄԱՆԱՅԻՆ ԳՅՈՒՂԵՐՈՒՄ

Մեր տեղեկություններով մոտ երկու ժամ է, ինչ գնդակոծվում է Նոյեմբերյանի եւ Իջեւանի սահմանային գյուղերը: Ականանետերը հասնում են նույնիսկ գյուղական համայնքների բնակելի տարածքները: Նոյեմբերյան քաղաքում մի քանի արկ է ընկել, որտեղից տարհանվել են մանկահասակ երեխաները: Գյուղաբնակների շրջանում կան զոհեր:

ՀՀ Պաշտպանության նախարարությունը հաղորդագրություն է տարածել, որտեղ ասվում է.

«Սեպտեմբերի 24-ին ադրբեջանական կողմը խախտել է հրադադարի պահմանման ռեժիմը հայ-ադրբեջանական պետական սահմանի հյուսիսարեւելյան հատվածում` կիրառելով տարբեր տրամաչափի հրաձգային զինատեսակներ եւ ականանետեր: Գնդակոծվել են սահմանամերձ բնակավայրերը, ինչի հետեւանքով ՀՀ Տավուշի մարզում կան զոհեր խաղաղ բնակչության շրջանում:

«Հատկանշական է, որ ադրբեջանական կողմը մշտապես դիմում է սադրիչ գործողությունների ԼՂ հիմնախնդրի կարգավորմանն ուղղված բանակցությունների եւ հանդիպումների նախաշեմին ու միտումնավոր լարվածություն է ստեղծում սահմանագոտում: Այս ամենը կրկին անգամ վկայում է, որ հարեւան պետության ռազմաքաղաքական ղեկավարությունն արհամարհում է ԼՂ խնդրի խաղաղ կարգավորմանն ուղղված նախաձեռնություններն ու պարբերաբար արհեստականորեն ապակայունացնում են իրավիճակը շփման գծում:

Հայաստանի Հանրապետության պաշտպանության նախարարությունը հայտարարում է, որ ստեղծված իրավիճակն Ադրբեջանի ռազմաքաղաքական ղեկավարության նենգ մարտավարության արդյունքն է ու սկզբունքորեն հակասում է ԵԱՀԿ Մինսկի խմբի շրջանակներում հակամարտության կարգավորման բանակցությունների տրամաբանությանը եւ միջազգային մարդասիրական իրավունքի սկզբունքներին:

Հայաստանի Հանրապետության պաշտպանության նախարարությունը եւս մեկ անգամ կոչ է անում ադրբեջանական կողմին զերծ մնալ իրավիճակի լարմանն ուղղված քայլերից եւ գործուն միջոցներ ձեռնարկել իրավիճակի կայունացման ուղղությամբ: Հայաստանի Հանրապետության հետ սահմաներձ ադրբեջանական ազգաբնակչությանը կոչ ենք անում այսուհետ խուսափել սեփական զինված ուժերի համար վահան հանդիսանալուց: Սահմանագոտում իրավիճակը կայունացնելու եւ ադրբեջանական զինված ուժերին զսպելու նպատակով ՀՀ զինված ուժերը դիմելու են համարժեք գործողությունների, ինչի հետեւանքների ամբողջ պատասխանատվությունը կրելու է Ադրբեջանի ռազմաքաղաքական ղեկավարությունը»:

Ա. ՀԱԿՈԲՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝