ՍՏԵՓԱՆ ՍԱՖԱՐՅԱՆԻ ՈՒ ԱՐՄԵՆ ՄԱՐՏԻՐՈՍՅԱՆԻ ՄԻՋԵՎ ՍԵՎ ԿԱՏՈ՞Ւ Է ԱՆՑԵԼ

ՍՏԵՓԱՆ ՍԱՖԱՐՅԱՆԻ ՈՒ ԱՐՄԵՆ ՄԱՐՏԻՐՈՍՅԱՆԻ

ՄԻՋԵՎ  ՍԵՎ ԿԱՏՈ՞Ւ Է ԱՆՑԵԼ

Ինչպես հայտնի է, ԱԱԾ-ն հայտարարություն է  տարածել «Ժառանգություն» խմբակցության պատգամավոր Զարուհի Փոստանջյանի հայտարարության վերաբերյալ: ԱԱԾ-ն զգուշացրել էր տիկին  Փոստանջյանին, որ ՝«տապալում», «շենքերի քանդում» արտահայտությունները և նման բովանդակությամբ կոչերը ՀՀ քրեական օրենսգրքով նկարագրված հանցավոր արարքների բնութագրիչ հատկանիշներից են, և այդպիսի գործողություններն ուղղակիորեն առնչվում են օրենսդրությամբ ազգային անվտանգության մարմինների առաջ դրված խնդիրներին:

Ուստի ցանկացած նման կոչ, առավել ևս գործողություն կատարելու փորձ կկանխվի ՀՀ ազգային անվտանգության ծառայության տրամադրության տակ եղած բոլոր օրինական միջոցներով»:

«Ժառանգություն» կուսակցության փոխնախագահ Արմեն Մարտիրոսյանին «Իրավունքը» դիմեց անդրադառնալ այս հայտարարությանը: «Ես կարծում եմ, որ  ԱԱԾ-ն ավելի կարեւոր գործերով  պետք է զբաղվի: Մեզ հետեւելու փոխարեն ում պետք է նրան թող հետեւեր: Թող հետեւեն ոչ լեգիտիմ իշխանություններին, որոնք կոռուպցիան ահավոր աստիճանի են հասցրել: ԱԱԾ-ն մեզանից ավելի լավ գիտի, թե իշխանություններն ինչ աստիճանի են կեղծել ընտրությունները»,- ասաց  ընդդիմադիր գործիչը:

Ինչ վերաբերում է նախկին «Ժառանգական» Ստեփան Սաֆարյանի բնութագրումներին` ուղղված «Ժառանգությանը», Արմեն Մարտիրոսյանն ասաց, որ չի ընթերցել եւ չի ուզում ընթերցել Սաֆարյանի  կարծիքը ու մեկնաբանել այն: «Ես կարդում եմ Լարիսա Ալավերդյանի գրածները, ով հստակ ասել է`«Ժառանգություն»-ում կան  սկզբունքային նվիրյալներ, որոնցով պետք է ուժեղանա  «Ժառանգությունը»: Ես եւս այդ կարծիքին եմ»,- ասաց քաղաքական գործիչը:

Կարծիք կա, որ «Ժառանգությունն» իր այս կեցվածքի պատճառով չի հայտնվի հաջորդ խորհրդարանում: «Եթե Ժառանգության խորհրդարանում չհայտվելը կփրկի Հայաստանն այս աղետալի վիճակից, ես համաձայն եմ: Մեր քաղաքացիները տեսնում են անընդհատ բյուրեղացվող ու սկզբունքային «Ժառանգություն» Րաֆֆի Հովհաննիսյանի գլխավորությամբ: Դա էլ հենց մեր քաղաքացիներին դեպի «Ժառանգություն» է բերելու»,- լավատեսորեն ասաց Ա. Մարտիրոսյանը:

«Նկատի ունեք կուսակցությունից որոշ գործիչների դուրս գա՞լը»,- հստակեցրինք  կուսակցության փոխնախագահից: «Նկատի ունեմ բյուրեղացած «Ժառանգություն», որն իր սկզբունքներին հավատարիմ է լինելու»,- եզրափակեց «Ժառանգություն» կուսակցության փոխնախագահը:

ՍՈՆԱ  ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝