Այսօր կայանալիք ֆուտբոլային հանդիպումները Ինչ է պատմում Իսաբեկյանը՝ Նկարիչների միության նախագահի ընտրությունից Էլեկտրաէներգիայի ընդհատումներ կլինեն Երևանում և մարզերում Եղիշե Մելիքյանը նոր պայմանագիր ունի Հայաստանի հավաքականի հետ Նոյեմբերի 22. Օրվա խոսք ԱՄՆ կառավարության պարտքի տոկոսավճարները գերազանցել են պաշտպանության ողջ բյուջեն Հզոր փոթորիկը «ծածկել» է Սոչին (Տեսանյութ) Հաքերները կրկին կոտրել են ՀԴԲ-ի հիմնական տվյալների բազաներից մեկը CNN ԱՄՆ ֆինանսների նախարար. Եվրոպան Ռուսաստանին ավելի շատ է վճարել նավթի համար, քան հատկացրել է Ուկրաինային Ինչպես են նկարիչները նշում նորընտիր նախագահի ընտրության արդյունքները

ԳԵՐՄԱՆԱՑԻ ՊԱՇՏՈՆՅԱՆ ԽՈՍՏՈՎԱՆԵՑ` ԳԵՐՄԱՆԻԱՆ ՄԵՂԱՎՈՐ Է

Արխիվ 12-16

ԳԵՐՄԱՆԱՑԻ ՊԱՇՏՈՆՅԱՆ ԽՈՍՏՈՎԱՆԵՑ` ԳԵՐՄԱՆԻԱՆ ՄԵՂԱՎՈՐ Է

 

ՀՀ մշակույթի նախարարության հրավերով սեպտեմբերի 22-ին Հայաստան է ժամանել Գերմանիայի Դաշնային Հանրապետության Սաքսոնիա-Անհալթ երկրամասի կրթության եւ մշակույթի նախարար ՇՏԵՖԱՆ ԴՈՐԳԵՐԼՈՀԻ գլխավորած պատվիրակությունը: Պատվիրակության կազմում էին նախարարության դպրոցական կրթության վարչության պետ Թորսթեն Քլիմենը, միջազգային եւ ԵՄ կրթական կապերի պատասխանատու Ուվե Բիրկհոլցը եւ նախարարի օգնական Միխայել Շուլցը:

Հայաստան ժամանելու առաջին օրը պարոն Շ. Դորգերլոհն այցելեց Հայոց ցեղասպանության զոհերի հիշատակին նվիրված հուշահամալիր, որտեղ ծաղիկներ դնելով` հարգանքի տուրք մատուցեց 1,5 մլն անմեղ զոհերի հիշատակին: Այնուհետեւ Շ. Դորգերլոհն այցելեց Ցեղասպանության թանգարան-ինստիտուտ եւ շրջելով սրահներով` ծանոթացավ 1915 թվականի եղերական դեպքերը ներկայացնող ցուցանմուշներին:

«ԳԵՐՄԱՆԻԱՆ ՄԵՂԱՎՈՐ Է ՑԵՂԱՍՊԱՆՈՒԹՅՈՒՆ ԻՐԱԿԱՆԱՑՆԵԼՈՒ ՀԱՐՑՈՒՄ»

Թանգարան-ինստիտուտում նա իր շրջայցն ավարտեց` գրանցամատյանում տպավորությունները գրառելով. «Խոնարհվում եմ Հայոց ցեղասպանության զոհերի հիշատակի առջեւ: Կարեւորում եմ միասնաբար աշխատանքը, որի արդյունքում կարող ենք հասնել խաղաղության եւ ունենալ լավ ապագա»:
Լրագրողների հետ զրույցի ընթացքում Շտեֆան Դորգերլոհը փաստեց, որ տպավորված է թանգարանով եւ այնտեղ ներկայացված պատմությամբ. «Այս տարին սովորական չէ, քանի որ ոգեկոչում ենք Հայոց ցեղասպանության զոհերի հիշատակը: Գերմանիան մեղավոր է Ցեղասպանություն իրականացնելու հարցում, եւ այդ պատճառով էլ մենք մեր պատմության մութ էջը նորից քննարկելու շատ ցավալի գործընթաց ենք սկսել: Խորապես համոզված եմ, որ այսօր միայն հաշտեցման գործընթացի շնորհիվ հնարավոր կլինի ունենալ ավելի լավ ու խաղաղ աշխարհ»:

«ՊԵՏՔ Է ՃԻՇՏ ԲԱՌԵՐՈՎ ՀՍՏԱԿՈՐԵՆ ՆԵՐԿԱՅԱՑՆԵԼ ՊԱՏՄՈՒԹՅՈՒՆԸ»

Նրա խոսքով` լավ ապագա ունենալու համար պետք է ասել ճշմարտությունը. «Մենք` գերմանացիներս, հասկացել ենք, որ ճշմարտությունն ասելը մի քիչ ցավոտ է, բայց սա է այն միակ ճանապարհը, որով պետք է ընթանալ` ավելի լավ ապագա ունենալու համար: Պետք է ճիշտ բառերով հստակորեն ներկայացնել պատմությունը: Այսօր էլ` Բեռլինի պատի փլուզումից 25 տարի անց, աշխատում ենք Իսրայելի պետության եւ առհասարակ ժողովուրդների հետ հաշտեցման գործընթացի ուղղությամբ: Քանի որ սա է միակ ճանապարհը, որը տանում է դեպի փայլուն ապագա»:

«ՏԵՂԱԴՐՎԵՑ ՀԱՅԿԱԿԱՆ ՏՈՒՖԻՑ ԽԱՉՔԱՐ` Ի ՀԻՇԱՏԱԿ ԱՆՄԵՂ ԶՈՀԵՐԻ»

Հայոց ցեղասպանության 100-րդ տարելիցին ընդառաջ` Գերմանիայում իրականացվել են մի շարք միջոցառումներ, որոնցից եվրոպացի պաշտոնյան կարեւորեց ապրիլի 23-ին Բեռլինի Մայր տաճարում տեղի ունեցած միջոցառումը. «Գերմանիայում կազմակերպված միջոցառումները հիրավի համաշխարհային արձագանք գտան: Հիշատակման են արժանի Բեռլինի Մայր տաճարում եւ ապրիլի 23-ին Բունդեսթագում տեղի ունեցած հիշատակի արարողությունները: Այդ միջոցառումների ժամանակ Գերմանիայի Դաշնային Հանրապետության նախագահը եւ Բունդեսթագի նախագահը հստակ արտահայտեցին իրենց վերաբերմունքը Հայոց ցեղասպանության վերաբերյալ: Ցեղասպանության 100-րդ տարելիցին ընդառաջ` ի հիշատակ անմեղ զոհերի,  քաղաքի կենտրոնում տեղադրվեց հայկական տուֆից խաչքար:
Ներկայումս մենք աշխատում ենք մի դասագրքի մշակման վրա, որտեղ պետք է ներկայացնենք աշխարհում իրականացվող բոլոր ցեղասպանությունները, այդ թվում նաեւ Հայոց ցեղասպանությունը»:
Հավելենք, որ նախատեսված է  Շ. Դորգերլոհի գլխավորած պատվիակության այցը նաեւ Մ. Մաշտոցի անվան Մատենադարան, Հայաստանի ազգային պատկերասրահ, որտեղ կբացվի «Պատկերներ մի երկրից. Արեւելագերմանական լուսանկարչությունը 1945-1995 թթ.-ին» խորագրով ցուցահանդեսը, ինչպես նաեւ Կոմիտաս թանգարան-ինստիտուտ:
Պատվիրակությունը Հայաստանում կմնա սեպտեմբերի 22-27-ը, որի ընթացքում ՀՀ մշակույթի նախարարության, ՀՀ կրթության եւ գիտության նախարարության եւ  Սաքսոնիա-Անհալթ երկրամասի կրթության եւ մշակույթի նախարարության միջեւ կստորագրվեն կրթության եւ մշակույթի ոլորտներում հետագա համագործակցության մասին մի շարք հուշագրեր:

ԶՎԱՐԹ ԽԱՉԱՏՐՅԱՆ

Հավանեցի՞ր հոդվածը, կիսվիր ընկերներիդ հետ