ՌՈՒԲԵՆ ՀԱՅՐԱՊԵՏՅԱՆ. «ԻՄ ԹԻԿՆԱԶՈՐՈՒՄ ՏԻԳՐԱՆ ԸՆԴՀԱՆՐԱՊԵՍ ՉԿԱ»

ՌՈՒԲԵՆ ՀԱՅՐԱՊԵՏՅԱՆ. «ԻՄ ԹԻԿՆԱԶՈՐՈՒՄ ՏԻԳՐԱՆ ԸՆԴՀԱՆՐԱՊԵՍ ՉԿԱ»

Ազատամարտիկ Սմբատ Հակոբյանն իրեն ծեծողների մեջ ճանաչել է Ռուբեն Հայրապետյանի թիկնազորի անդամներից` Տիգրանին՝ հավելելով, թե վստահ չէ, թե նա այժմ ՀՖՖ նախագահի թիկնազորում է, բայց գիտի, որ ժամանակին Ռուբեն Հայրապետյանի համար է աշխատել: Ս. Հակոբյանը նաեւ ասում է, որ առանձնահատուկ կոնֆլիկտ Հայրապետյանի հետ չի ունեցել: Բայց անկախ նրանից՝ այդ Տիգրան կոչեցյալը հիմա թիկնապահ է, թե՝ ոչ, նման ծեծուջարդերի կազմակերպման մեծ մասնագետի համարում ունեցող Հայրապետյանի անունն առաջին պլանում է:

Իհարկե՝ այսօր-վաղը ամեն ինչ կպարզվի, առավել եւս, որ մի խումբ ճանաչված ազատամարտիկներ երեկ աննախադեպ քայլի գնացին՝ խոստանալով, որ եթե ոստիկանությունն արագորեն մեղավորներին չգտնի, իրենք են հայտնաբերելու եւ, ըստ «Ապարան» ջոկատի հրամանատար Ռազմիկ Պետրոսյանի` «Մենք մեր ձեւով կպատժենք նրանց, որը շատ ավելի վատ է լինելու, քան ոստիկանության պատիժը»:
Միգուցե նման սպառնալիքը վերջնականապես կսթափեցնի ազատամարտիկների ¥եւ ինչու միայն նրանց¤ նկատմամբ հաճախակի դարձած նման հարձակումներ իրականացնողներին եւ հրամայողներին: Բայց մինչ այդ վերադառնանք Ռ. Հայրապետյանին. ինչո՞ւ է ՀՖՖ նախագահն այսքան հաճախակի հայտնվում սկանդալային պատմությունների կիզակետում: Շատերը, թերեւս, վստահաբար կասեն, որ հարցի պատասխանն իրենք վաղուց ունեն: Բայց այս անգամ փորձեցինք ստանալ նաեւ ՌՈՒԲԵՆ ՀԱՅՐԱՊԵՏՅԱՆԻ կարծիքը: Մեզ հետ զրույցում պարոն Հայրապետյանը նախ բացառեց իր կամ իր թիկնազորի անդամներից որեւէ մեկի առնչությունն ազատամարտիկի ծեծի ենթարկելու պատմության հետ: Իսկ, թե ինչով է պայմանավորված, որ կրկին նրա անվան շուրջ է աղմուկը, ՀՖՖ նախագահը նկատեց.
- Ես շա՞տ եմ իմանում՝ ինչով է պայմանավորված, ես Ձեր հարցին կարա՞մ պատասխանեմ:
- Կարծում եմ՝ այո:
- Ինչ-որ մեկի կողմից պատվեր է իրականացվում: Տեսեք` ինչ է. մարդը կանգնել, ասում է, որ իմ թիկնազորից Տիգրանին ճանաչել է իրեն ծեծողների մեջ: Այնինչ իմ թիկնազորում Տիգրան ընդհանրապես չկա: Էդ բոլորը կարող են ստուգել. իմ թիկնազորում միայն «օֆիցիալ», ոստիկանության հետ պայմանագիր ունեցող անվտանգության աշխատակիցներ են: Կարող են փաստաթղթերով էլ ստուգել` Տիգրան կա՞ իմ թիկնազորում, թե ոչ:
- Իսկ ծեծված ազատամարտիկին՝ Սմբատ Հակոբյանին Դուք ճանաչո՞ւմ եք:
- Իհարկե ճանաչում եմ, մի թաղամասում ենք ապրում, հիսուն տարի է` ճանաչում եմ:
- Իսկ ի՞նչ հարաբերություններ ունեք միմյանց հետ:
- Շատ նորմալ հարաբերությունների մեջ եմ եղել:
- Եղե՞լ:
- Հա: Հիմա` ոչ: Նորմալ հարաբերություններ ունեի հետը մինչեւ այն պահը, որ իր հորեղբոր հարսին փորձել էր բռնաբարել: Դրանից հետո ոչ մի հարաբերության մեջ չեմ:
- Այսինքն, ո՞նց բռնաբարել. դա լրջագույն մեղադրանք է:
- Դե հիմա ես թասիբ ունեմ` չեմ ուզում մանրամասնեմ: Մենակ կասեմ, որ դրանից հետո իր հետ ոչ մի շփում-բան չեմ ունեցել: Սա պարզապես քաղաքական պատվեր է:
- Այդ դեպքում ովքե՞ր են այդ պատվերներ տվողները:
- Չեմ կարող ասել, բայց Դուք ինքներդ չե՞ք տեսնում, որ ես ոչնչի մեջ չեմ խառնվում: Հիմնականում լինում եմ Հայաստանից դուրս. համարյա Հայաստանում չեմ լինում: Ավելի շատ Արցախում եմ լինում, բայց դե էլի անընդհատ իմ անունն է շահարկվում: Մի օր առաջ եմ Արցախից եկել, էսօր էլ էդ զառանցանքը տարածվեց:
- Պարոն Հայրապետյան, ազատամարտիկի ծեծից առաջ էլ Ձեր անունը «շահարկվեց» «Էյր Արմենիայի» համասեփականատիրոջ ծեծի աղմկոտ գործով:
- Այ դա եղել է, ես դրանից չեմ հրաժարվում, երբեք էլ չեմ հրաժարվի:
- Այսինքն՝ Դո՞ւք եք պատվիրել, որ ծեծեն Արսեն Ավետիսյանին:
- Ո՞վ է ծեծել:
- Դե՝ Արսեն Ավետիսյանի կինը դեպքից անմիջապես հետո հանդես եկավ նման հայտարարությամբ:
- Չգիտեմ` ինչ ծեծի մասին է խոսքը, անձամբ ես ապտակել եմ իրեն. էդքանը կարամ ասեմ:
- Իսկ ինչո՞վ «էր արժանացել» այդ ապտակին:
- Դե եկեք էդ հարցին չպատասխանեմ: Ուղղակի հարցը տվեցիք, ազնվորեն պատասխանեցի: Հիմա արժանի էր, թե չէ... Վերցրեք նրա կենսագրությունը, նայեք, տեսեք` ինչեր է արել: Դրանից հետո կհամոզվեք՝ արժանի էր, թե ոչ:
ԻԼՈՆԱ ԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝