Զարմացած

Երեկ մեր Անկախության տոնի կապակցությամբ, զարմանալիորեն որոշել էր ամբողջ աշխարհից, այսինքն` իր օգտատերերից անկախանալ ՍԿԱՅՊԸ: Տեսահեռախոսային այդ կապի հարմար տեսակից օգտվում են նույնիսկ մեր այն հայրենակիցները, ովքեր համակարգչով նույնիսկ պարզագույն գործողություն չեն կարող կատարել, քանզի շատ հարմար է եւ միանգամայն անվճար` ցանկացած ծանոթ-բարեկամիդ հետ զրուցես` անկախ հեռավորությունից: Եվ ահա երեկ սկայպը գժվել էր, եւ բոլոր օգտատերերին ցույց էր տալիս, թե իբր համացանցից դուրս են, սակայն ամենազարմանալին այն էր, որ այդ վիճակով էլ զանգեր կատարել հնարավոր էր: Դե ինչ, թող մեր ամենամեծ անախորժությունները լինեն այդպիսի մանր տեխնիկական թերությունները:

Իսկ մեր դարավոր թշնամի ԹՈՒՐՔԻԱՅՈՒՄ եղել է խափանում, որը ոչ թե տեխնիկական է, այլ արժեհամակարգային: Ընդունված է համարել, որ թուրքերը մեծ հարգանքով են վերաբերվում իրենց պետական դրոշին, սակայն օրերս համացանցով մեկ տարածվել են Ստամբուլում արված լուսանկարները, թե ինչպես, ի զորակցություն Էրդողանի, տեղի ունեցած ցույցից հետո ցուցարարները այդ կիսալուսնի պատկերով կարմիր լաթերը աղբի պես պարզապես նետում են փողոցում: Անշուշտ, լավ է, որ իրենք հասկացել են` իրենց պետություն կոչեցյալի իրական տեղը պատմության աղբանոցն է, պարզապես զարմանալի է, թե ինչպես այդքան կարճ ժամանակում այդպես կտրուկ փոխվեց վերաբերմունքը:
Իսկ ԵԽԽՎ ներկայացուցիչ ՌՈԲԵՐՏ ՈՒՈԼԹԵՐԸ, որը զեկույց էր նախապատրաստել սադրիչ վերնագրով` «Բռնության աճը Լեռնային Ղարաբաղում եւ Ադրբեջանի մյուս գրավյալ տարածքներում»` այդպես էլ քոռուփոշման եղավ, քանզի Արցախի իշխանությունները նրան թույլ չտվեցին Ադրբեջանի կողմից մուտք գործել Արցախ: Ինչպես նշեց ԼՂՀ նախագահի մամլո խոսնակ Դավիթ Բաբայանը. «Նման բան չէր կարող տեղի ունենալ, դա պարզապես բացառված է: Նախեւառաջ մենք իրեն ասել էինք, տեղյակ էինք պահել պաշտոնական Ստեփանակերտի կարծիքը, որ պետք է փոխել ե՛ւ վերնագիրը, ե՛ւ զեկույցի բովանդակությունը: Դա չի կատարել, հետեւաբար սահմանը հատելը շահարկելը պարզապես անտեղի է»: Դե ինչ, դրական նախադեպ է, ու թերեւս այդպես պետք է վարվել ցանկացած, այսպես կոչված, դիվանագետի հետ, որն իրեն թույլ կտա պաշտոնական եզրակացություններ կազմել ադրբեջանական սեւ խավիարի համի ազդեցության տակ:
Եվ, բնականաբար, զարմանքի եւ ուրախության անսպառ աղբյուր է Վրաստանի Հանրապետության վաստակավոր փողկապակեր, այժմ Օդեսայի նահանգապետ ՄԻԽԱՅԻԼ ՍԱՀԱԿԱՇՎԻԼԻՆ: Հարցազրույց տալով ուկրաինական հեռուստաալիքներից մեկին, Սահակաշվիլին զարմանալիորեն շփոթել էր «ընդդիմադիր» եւ «կաշառակեր» կատեգորիաները եւ Ռադայի պատգամավորներից մեկի կալանքը մեկնաբանելիս ասել էր. «Ես կարծում եմ, որ կոնկրետ այս պատգամավորի հետ Ռադայում ամեն բան ճիշտ է արվել: Նա, չգիտես ինչու, ինձ հիշել էր: Չգիտես ինչու, բոլոր ընդդիմադիրները ինձ հիշում են ժամանակ առ ժամանակ: Ավելի շուտ կաշառակերները»: Չնայած, եթե խորը մտածենք, Սահակաշվիլին այդքան էլ չի սխալվել, քանզի օտարերկրյա գրանտ լափելը եւ դրանով սեփական հայրենիքը ծախելը միգուցե կարելի է որակել կաշառակերության վատագույն տեսակ:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝