ԱՐԹՈՒՐ ԱԼԵՔՍԱՆՅԱՆԻՆ ԳՈՎԵՐԳՈՂՆԵՐԸ ՉԵ՞Ն ՏԵՍՆՈՒՄ ՆՐԱ ՄԱՐԶԱԴՊՐՈՑԻ ՎԻՃԱԿԸ

ԱՐԹՈՒՐ ԱԼԵՔՍԱՆՅԱՆԻՆ ԳՈՎԵՐԳՈՂՆԵՐԸ ՉԵ՞Ն ՏԵՍՆՈՒՄ ՆՐԱ ՄԱՐԶԱԴՊՐՈՑԻ ՎԻՃԱԿԸ

Լաս Վեգասում կայացած հունահռոմեական ըմբշամարտի Աշխարհի առաջնությունում Հայաստանի միակ ոսկե մեդալակիր Արթուր Ալեքսանյանը դեռ մի քանի օր կհանգստանա, որպեսզի վերականգնվի առաջնությունից հետո: Ապա՝ դարձյալ անցնի մարզումներին: Այս մասին «Իրավունքին» ասաց աշխարհի կրկնակի չեմպիոնի հայր եւ անհատական մարզիչ ԳԵՎՈՐԳ ԱԼԵՔՍԱՆՅԱՆԸ:

-Մեկ տարվա քրտնաջան աշխատանք, եւ Արթուր Ալեքսանյանը պաշտպանեց չեմպիոնի կոչումը: Մի փոքր ներկայացրեք այդ մեկ տարվա աշխատանքը, որը փայլուն արդյունք տվեց:
- Տարվա ընթացքում Արթուրը 6-7 հավաքի մասնակցեց, մարզումների ընթացքն ու ծանրաբեռնվածությունը նախորդ տարիների նման էր: Հավաքներ եղան Երեւանում, Ծաղկաձորում, ինչպես նաեւ Մինսկում` «Սպարտակ» մարզաբազայում: Իսկ եթե Արթուրը հավաքի չէ, ուրեմն մարզվում է Գյումրու մարզադպրոցում: Հավաքների ընթացքում փորձել ենք ուղղել իր սխալները, հասցնել նրան լավագույն մարզավիճակի: Եվ կարելի է ասել` ամեն բան ստացվեց. իր առջեւ դրված բոլոր խնդիրներն Արթուրը կարողացավ լուծել պատվով: Թե՛ հավաքականի գլխավոր մարզչի եւ թե՛ իմ բոլոր հանձնարարականները պատշաճ կատարեց, եւ արդյունքն էլ եղավ հենց Աշխարհի առաջնությունը, որտեղ կարողացավ բարձր որակներ ցուցադրել:
- Նշեցիք, որ անհատական պարապմունքները Արթուրն անցկացնում է Գյումրու ըմբշամարտի մարզադպրոցում, որը, ինչպես գիտենք, խիստ անբարեկարգ վիճակում է, եւ արդեն տեւական ժամանակ է վերանորոգման հարցը չի լուծվում: Ինչ-որ տեղաշարժ կա՞, վերանորոգումն ի վերջո կարվի՞:
- 2008 թվականից այս հարցը բարձրացված է, եւ ամեն տարի լինում են խոստումներ, որ ի վերջո մարզադպրոցի վերանորոգման հարցը կլուծվի: Անցած տարի, երբ Արթուրը չեմպիոն դարձավ, ես մեծ հույս ունեի, որ խնդրին լուծում կտան, քանի որ հարցն ավելի բուռն քննարկվեց, եղան նկարահանումներ, բոլորը տեսան ինչ պայմաններում է մարզվում Արթուրը: Եղան նաեւ մոտավոր հաշվարկման աշխատանքեր, նախագծում, մասնագետներ եկան` դպրոցի սեյսմիկ վիճակը ստուգելու համար, հետո Երեւանից էլ եկան` մեր նախահաշվարկը ստուգելու: Բայց, փաստորեն, ամեն բան մնաց թղթի վրա: Այս պահին ոչ մի աշխատանք չի արվել, եւ ոչ էլ ինչ-որ տեղեկություն կա, թե երբ կարվի:
- Մարզադպրոցը Արթուրի Ալեքսանյանի անունով վերակոչելու հարց բարձրացվեց …
- Այո, Աշխարհի առաջնություն մեկնելուց առաջ ավագանին հաստատեց այդ որոշումը, քաղաքապետարանն էլ այս առումով իր բոլոր գործառույթները կատարեց, եւ դպրոցն այժմ կոչվում է Արթուրի անունով: Կնիքը, բլանկները ամեն ինչ արդեն նոր է, եւ Արթուր Ալեքսանյանի անվան ըմբշամարտի մարզադպրոցը շարունակում է գործել որպես Գյումրու քաղաքապետարանի մարզադպրոցի իրավահաջորդ:
- Իսկ ինչո՞վ է զբաղվում այս օրերին Արթուր Ալեքսանյանը, եւ ո՞րն է լինելու աշխարհի կրկնակի չեմպիոնի հաջորդ քայլը:
- Այս օրերին Արթուրը հանգստանում է: Դե գիտեք՝ ԱՄՆ-ի հետ ժամային տարբերությունը մեծ է, ռեժիմի փոփոխության խնդիր կար` ե՛ւ մեկնելուց ե՛ւ հիմա: Բարեբախտաբար, դա Արթուրի ելույթների վրա չանդրադարձավ, իսկ այստեղ ժամանակ է պետք վերականգնվելու, եւ մի 2 օրից արդեն Արթուրը քիչ-քիչ կսկսի պարապմունքները: Այս տարվա համար այլեւս մրցաշարեր չունենք. կան ուսումնամարզական հավաքներ եւ ընդհանուր մարզումային պրոցես: Եվ քանի որ առաջնությունը վարկանիշային էր, արդեն տարեվերջին Արթուրը հավաքականի գլխավոր մարզչի հետ հաջորդ տարվա պլան պետք է մշակի եւ սկսի նախապատրաստվել Օլիմպիական խաղերին:

ՔՐԻՍՏԻՆԵ ՊԵՏՐՈՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝