Զարմացած

Ինչպես հայտնի է, «Ոչ»-ի համաժողովին մասնակցում էր եւ ՊԱՐՈՒՅՐ ՀԱՅՐԻԿՅԱՆԻ կուսակցությունը: Ճիշտ է, հետները Եվրամիության դրոշներ չբերին, սակայն «անկախության սիմվոլը» բավականին ուշագրավ հայտարարություն արեց. «Ինչպես գիտեք, կա «Ոչ»-ի ճակատը, որին մասնակցում են 6 ուժեր, բացի դրանից, ինչ-որ երիտասարդներ նախաձեռնել են հայտարարություն եւ հրավիրել տարբեր քաղաքական ուժերի` արձանագրել, որ օրակարգի առաջնահերթ խնդիրը սահմանադրական փոփոխություններին «ոչ» ասելն է` մնացած խնդիրներն այս պահին երկրորդական են դառնում: ԱԻՄ-ը ստորագրել է այդ հայտարարությունը` դեռեւս չճշտելով մարտավարական խնդիրները. հետագայում ինչպես ենք աշխատելու, ինչ մեթոդներով: Դա մոտավորապես նույնն է թե` որոշել ենք Արագած սարը բարձրանալ, տարբեր տեղերից ասում են` մենք էլ ենք ուզում բարձրանալ, որովհետեւ բարձրանալը ճիշտ ենք համարում. ամեն տարի գոնե մեկ անգամ պետք է Արագած սարը բարձրանաս: Սա է ընդամենը: Ինչ վերաբերում է հետագա գործողությունների ծրագրին, դա հետո կերեւա»: Այն, որ Հայրիկյանը «Ոչ»-ի գործընթացը համեմատում է Արագած լեռ բարձրանալու հետ, համաձայն ենք, համաձայն ենք, որ լեռնագագաթ կարելի է բարձրանալ եւ տարբեր կողմերից` հընթացս կողմնորոշվելով: Բայց, գրողը տանի, ինչպես պետք է գագաթ բարձրանա «լեռնագնացների» թիմը, որն առավելապես բաղկացած է քաղաքական դիակներից: Դուք պատկերացնո՞ւմ եք սար բարձրացող մեռել` այ, Հայրիկյանը պատկերացնում է:

«Ոչ»-ի ճակատով չափազանց շատ է ոգեւորվել հազար անգամ կուսակցություն եւ քաղաքական համոզմունքներ փոխած ՀՄԱՅԱԿ ՀՈՎՀԱՆՆԻՍՅԱՆԸ. «Ես վստահ եմ, որ տեղի կունենա իրական ընդդիմադիր ուժերի լիարժեք համախմբում, ինչի արդյունքում կստեղծվի «Ոչ»-ի միասնական շտաբ: Խնդիրը պարզ է, ընտրությունը ոչ թե տարբեր կուսակցությունների մեջ է, այլ փրկարար «Ոչ»-ի եւ կործանարար «Այո»-ի միջեւ` սպիտակի եւ սեւի, ինչը, անշուշտ, համախմբումը միասնական շտաբի տեսքով դարձնում է այլընտրանք չունեցող բնականոն լուծում»: Չէ, սա արդեն զարմանալիորեն մի բան հիշեցնում է: Հիշո՞ւմ եք, ժամանակին Հմայակը «եռյակ-քառյակների» շտաբ էր սարքում, եւ ինչով դա վերջացավ, այդ թվում եւ ծանրաքաշ ԲՀԿ-ի համար... Իսկ հիմա, գրողը տանի, նորից շտաբ, այս անգամ` «Ոչ»-ի: Ախր, այս նախկին երիտասարդի ստեղծած «շտաբները» տեղով քաղաքական թուղթուգիր են, եւ զարմանալի է, թե ինչպես քաղաքական ձախորդության այդ քայլող մարմնացմանը «Ոչ»-իստները ընդհանրապես մոտիկ թողեցին:
1972-ին ամերիկյան «Պիոներ-10» տիեզերանավը հեռավոր տիեզերք տարավ մի թիթեղ, որի վրա փորագրված էին կին եւ տղամարդ, մեր երկրային քաղաքակրթությունը պատկերող խորհրդանշական ուրվագծեր եւ այլն: Եվ ահա Մեծ Բրիտանիայում տեղի ունեցած աստղագետների եւ փիլիսոփաների գիտաժողովին հանկարծ հայտարարվեց, որ 43 տարի առաջ տիեզերք ուղարկած ուղերձը ռասսիստական եւ սեքսիստական է, չի համապատասխանում ՏՈԼԵՐԱՆՏՈՒԹՅԱՆ սկզբունքներին: Գիտաժողովում դժգոհեցին, որ տղամարդու ուրվագիծը չափազանց առնական է, իսկ կնոջը` չափազանց կանացի, գումարած դրան` տղամարդն ու կինը սպիտակամորթ են (թե փորագրության վրա ինչպես են զանազանել մաշկի գույնը, միայն սատանան գիտի): Պարզապես ապշեցուցիչ է, որ 21-րդ դարում կարող ենք ականատես լինել այդպիսի խավարամտության կամ ռսի ասած` «մռակաբեսության», ու ոչ թե գրանտածիծ իրավապաշտպանների սեմինարին, այլ մի տեղ, ուր բացառապես գիտնականներ են հավաքված: Չէ, կանգնեցրե՛ք մոլորակը, ես իջնեմ... Չնայած իջնելու տեղ էլ չթողին, արդեն տիեզերքն են գենդերացնում:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝